AKP ព្រះវិហារ ថ្ងៃទី០៨ ខែមេសា ឆ្នាំ២០២៥--ប្រតិភូដឹកនាំដោយ ឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ និងជាអនុប្រធានលេខាធិការដ្ឋាន គណៈកម្មការជាតិប្រឆាំងភេរវកម្ម នៅថ្ងៃទី០៧ ខែមេសា ឆ្នាំ២០២៥ អញ្ជើញចុះសួរសុខទុក្ខ នឹងសំណេះសំណាល ជាមួយនាយទាហាន និងពលទាហាន កងពលធំអន្តរាគមន៍លេខ៣ ដែលឈរជើងតាមបណ្តោយព្រំដែនជួរមុខទិសទី១តំបន់ប្រាសាទព្រះវិហារ ដើម្បីអបអរសាទរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ។ 

ពិធីនេះក៏មាន ចូលរួមពីសំណាក់ លោកឩត្តមសេនីយ៏ឯកស្រី ឌឹក មេបញ្ជាការង កងទ័ពជើងគោកមេបញ្ជាការកងពលធំអន្តរាគមន៏លេខ៣នឹង លោកមេបញ្ជាការកងពលតូចអន្តរាគមន៏ចំណុះទាំង៣រួមនិងលោកមេបញ្ជាការរងព្រមទាំងនាយនិងពលទាហានជាច្រើនកុះករ ។

លោកឧត្តមសេនីយ៍ឯក ស្រី ឌឹក បានអានរបាយការណ៍ ស្វាគមន៍និងរាយការណ៍ អំពីស្ថានភាពទូទៅ នៅតាមបន្ទាត់ព្រំដែន កម្ពុជា- ថៃ ឡាវ បច្ចុប្បន្ន មានស្ថានភាពស្ងប់ស្ងាត់ ជាធម្មតា និងរាយការណ៍ អំពីការអភិវឌ្ឍន៍ និងសមិទ្ធផលនានា ដែលបានកសាងរួច និងកំពុងតែបន្តរកសាង ក្នុងទីបញ្ជាការកងពលធំអន្តរាគមន៍លេខ៣ ដែលទទួលបានពីការឧបត្ថម្ភរបស់អង្គភាពប្រឆាំងអំពើពុករលួយ ដែលជាអង្គភាពសម្ព័ន្ធមេត្រីភាព ។ 

ឯកឧត្តម ឱម យ៉ិនទៀង បានមានព្រសាសន៍សំដែងនូវមនោសញ្ចេតនារីករាយអបអរសារទរជាមួយ មេបញ្ជាការ មេបញ្ជាការរង និងពលទាហានទាំងអស់ នៃកងពលធំអន្តរាគមន៍លេខ៣ និងសំដែងនូវការកោតសរសើរដោយស្មោះចំពោះសកម្មភាពដ៍រស់រវើកនិងស្មោះត្រង់រួមចំណែកអភិវឌ្ឍន៍កម្ពុជានាពេលកន្លងមកនេះ ប្រកបដោយស្មារតីទទួលខុសត្រូវខ្ពស់ អង់អាចក្លាហាន មោះមុត មានវិនយ័ សេចក្តីថ្លៃថ្នូរ ហើយនូវគ្រប់កាលៈទេសៈតែងតែទ្រទ្រង់ការពារបានយ៉ាងរឹងមាំ នូវបូរណភាពទឹកដី និងចូលរួមចំណែកថែរក្សាសុខសន្តិភាព ស្ថិរភាពជាតិ និងសណ្តាប់ធ្នាប់សង្គម សាកសមជាទីពឹងរបស់ប្រជាជន និងសង្គមជាតិទាំងមូល។

ឯកឧត្តមទេសរដ្ឋមន្ត្រី បានប្រសាសន៍បន្តទៀតថា កម្លាំងកងពលធំអន្តរាគមន៍លេខ៣ គឺជាកម្លាំង ជាស្នូលមួយក្នុងការការពារបូរណភាពទឹកដីនៅតាមបណ្តោយខ្សែបន្ទាត់ព្រំដែន កម្ពុជា ថៃ ឡាវ និងជាកម្លាំងរក្សាសន្តិសុខសណ្តាប់ធ្នាប់សាធារណៈនៅក្នុងសង្គមដ៏ល្អ ដែលមិនអាចខ្វះបាន ។ 

នៅក្នុងពិធីចុះសំណេះសំណាលនិងសួរសុខទុក្ខដល់នាយទាហាន និងពលទាហាន នាឱកាសនោះ ឯកឧត្តម កិត្តិនីតិកោសលបណ្ឌិត ឱម យ៉ិនទៀង ព្រមទាំងក្រុមការងារ បាននាំយក នៅសម្ភារៈ គ្រឿងឧបភោគបរិភោគ មួយចំនួនធំ រួមទាំងថវិកាមួយចំនួន ដើម្បីចែកជូន ដល់នាយហាន និងពលទាហាន ដើម្បីអបអរសាទរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ៕

ដោយ៖ ទិត ស្រ៊