AKP កំពង់ធំ ថ្ងៃទី៥ ខែមេសា ឆ្នាំ២០២៥ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ កាលពីរសៀលថ្ងៃទី០៤ ខែមេសា ឆ្នាំ២០២៥ បានអញ្ជើញដឹកនាំកិច្ចប្រជុំប្រុងប្រៀបរៀបចំកម្មវិធីនានាសម្រាប់ចូលរួមអបអរសាទរក្នុងពិធីសង្ក្រាន្តឆ្នាំថ្មី ឆ្នាំម្សាញ់ សប្តស័ក ពុទ្ធសករាជ២៥៦៩ ដែលនឹងឈានចូលមកដល់នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ ខាងមុខនេះ ដែលកិច្ចប្រជុំនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ។

ឧត្តមសេនីយ៍ទោ សោម ស៊ុន បានមានប្រសាសន៍ថា ជារៀងរាល់ឆ្នាំ បញ្ជាការដ្ឋានតំបន់ប្រតិបត្តិការសឹករងកំពង់ធំតែងតែបានរៀបចំកម្មវិធីនានាក្នុងការចូលរួមអបអរសាទរក្នុងពិធីបុណ្យចូលឆ្នាំថ្មីប្រពៃណីជាតិជារៀងរហូតមក។ ដោយឡែកនៅឆ្នាំនេះ បញ្ជាការដ្ឋានតំបន់ប្រតិបត្តិការសឹករងកំពង់ធំបានប្រុងប្រៀបរៀបចំកម្មវិធីមួយចំនួនមានជាអាទិ៍ ទី១ ការគោរពវិញ្ញាណក្ខន្ធកម្មាភិបាលយុទ្ធជនយុទ្ធនារី ដែលបានបូជាពលីជីវិតដើម្បីបុព្វហេតុជាតិ និងប្រជាជនកម្ពុជានៅវិមានរំលឹកគុណយុទ្ធជនពលីនៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងសូត្រមន្តបង្សុកូលរាប់បាត្រឧទ្ទិសកុសលផលបុណ្យជូនដល់ញាតិការទាំង ៧សន្ដាន និងកម្មាភិបាល យុទ្ធជន យុទ្ធនារី ព្រមទាំងវិញ្ញាណក្ខន្ធវិរជននៃប្រតិបត្តិករនយោបាយឈ្នះឈ្នះដែលនាំមកនូវសុខសន្តិភាព និងការឯកភាពជាតិពេញលេញជូនប្រជាជនកម្ពុជា។ទី២ រៀបចំឱ្យមានការលេងល្បែង របាំប្រជាប្រិយ មានដូចជាចោលឈូង បោះអង្គុញ លាក់កន្សែង វាយក្អម ទាញព្រាត់ ដណ្ដើមស្លឹកឈើ លោតបាវជាក្រុម និងការសម្ដែងរបាំម៉ាឌីហ្សុនកងទ័ព និងទី៣ រៀបចំកម្មវិធីជប់លៀងអបអរសាទរឆ្នាំថ្មីជូនដល់កងកម្លាំងនៅមុនពេលពិធីបុណ្យចូលឆ្នាំថ្មីមកដល់ផងដែរ។

នៅក្នុងឱកាសនោះដែរ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំក៏បានប្រគល់ភារកិច្ចជូនថ្នាក់ដឹកនាំដែលមានការពាក់ព័ន្ធ និងមេបញ្ជាការគ្រប់បណ្ដាកងឯកភាព ត្រូវចាត់តាំងកងកម្លាំងសហការជាមួយកងកម្លាំងប្រដាប់អាវុធទាំងបី មន្ត្រីរាជការ និងអាជ្ញាធរដែនដីគ្រប់លំដាប់ថ្នាក់ដើម្បីចាត់តាំងប្រេីប្រាស់កម្លាំងចូលរួមក្នុងកិច្ចការពារសន្តិសុខសុវត្ថិភាព និងរៀបចំសណ្ដាប់ធ្នាប់ជូនភ្ញៀវទេសចរណ៍ជាតិ អន្តរជាតិ និងប្រជាជនយើងដើម្បីចូលរួមសប្បាយរីករាយក្នុងឱកាសបុណ្យចូលឆ្នាំថ្មីនេះឱ្យទទួលបានជោគជ័យ។

ជាមួយគ្នានេះដែរ មេបញ្ជាការតំបន់ប្រតិបត្តិការសឹករងកំពង់ធំក៏បានក្រើនរំលឹកដល់ថ្នាក់ដឹកនាំ និងមេបញ្ជាការតាមបណ្ដាកងឯកភាពនីមួយៗ ត្រូវចាត់តាំងនាយទាហាន និងកងកម្លាំងប្រចាំការ ប្រចាំបញ្ជា ព្រមទាំងរៀបចំកងកម្លាំងអន្តរាគមន៍ដោយមានមធ្យោបាយ គ្រឿងបំពាក់គ្រប់គ្រាន់ ត្រៀមនៅនឹងកន្លែងដើម្បីចល័តអន្តរាគមន៍ដោះស្រាយបញ្ហាដែលអាចកើតមានជាយថាហេតុផ្សេងៗតាមបទបញ្ជាឱ្យទាន់ពេលវេលា និងមានប្រសិទ្ធភាព៕

ដោយ: ស៊ុម វណ្ណា (ប្រភព: តំបន់សឹករងកំពង់ធំ)