AKP កំពង់ធំ ថ្ងៃទី៥ ខែមេសា ឆ្នាំ២០២៥ -- រដ្ឋបាលឃុំឈូក ឃុំគោល និងឃុំតាំងក្រសៅ បាននិងកំពុងរៀបចំតុបតែងលម្អសង្ក្រាន្តឆ្នាំថ្មីនៅគ្រប់វត្តអារាមដើម្បីអបអរសាទរទទួលទេវតាឆ្នាំថ្មីព្រមទាំងបានត្រៀមផែនការរួចជាស្រេចតាមការណែនាំរបស់ប្រធានគណៈបញ្ជាការឯកភាពស្រុកប្រាសាទសំបូរដើម្បីថែរក្សាសុខសុវត្ថិភាពជូនប្រជាពលរដ្ឋកម្សាន្តសប្បាយក្នុងមូលដ្ឋាននារដូវកាលបុណ្យចូលឆ្នាំថ្មី ប្រពៃណីជាតិនាពេលខាងមុខនេះ។

លោក ហ៊ុយ គឹមលី មេឃុំឈូកស្រុកប្រាសាទសំបូរបានមានប្រសាសន៍លើកឡើងកាលពីថ្ងៃទី០៤ ខែមេសា ឆ្នាំ២០២៥ ថា ឆ្នាំនេះក៏ដូចជាឆ្នាំមុនៗដែរ រដ្ឋបាលឃុំបានរៀបចំសង្ក្រាន្តនៅក្នុងបរិវេណវត្តឧសីលវ័ន ហៅវត្តកំពង់ស្បូវ ដែលមានទីឆ្លាធំទូលាយមានដើមឈើធំៗ ម្លប់ត្រជាក់សម្រាប់បងប្អូនប្រជាពលរដ្ឋនិយមមកលេងល្បែងប្រជាប្រិយ និងរាំលេងកម្សាន្តក្នុងរដូវចូលឆ្នាំខ្មែរប្រកបដោយភាពសប្បាយរីករាយក្រោមម្លប់សន្តិភាព។

ព្រះគ្រូចៅអធិការវត្តកំពង់ស្បូវ បានមានសង្ឃថិរៈដីកាថា ពុទ្ធបរិស័ទចូលចិត្តមកវត្តនេះដោយសាទីធ្លាវត្តស្រឡះ មានដើមស្វាយធំៗ ៣ដើមដែលមានអាយុកាលយូរឆ្នាំ និងមានម្លប់ត្រជាក់ ហើយពលរដ្ឋពុទ្ធបរិស័ទមានជំនឿបែរបន់អ្វីស័ក្តិសិទ្ធិបានដូចប្រាថ្នា។

ព្រះគ្រូព្រះនាម ឃុន សេតវិទូ ចៅអធិការវត្តសិរីមង្គលហៅវត្តកំពង់ជ្វា ដែលស្ថិតក្នុងឃុំគោលស្រុកប្រាសាទសំបូរ បានមានសង្ជថេរដិកាថា ក្រោមការដឹកនាំរដ្ឋបាលឃុំ បានលើកទឹកចិត្តប្រជាពលរដ្ឋឱ្យគោរពស្រឡាញ់វប្បធម៌ប្រពៃណី ព្រះពុទ្ធសាសនាពិសេសក្នុងឱកាសបុណ្យចូលឆ្នាំថ្មីខាងមុខនេះ លោកអាចារ្យគណៈកម្មការ បានសម្រេចរៀបចំសង្ក្រាន្តនៅក្នុងវត្តកំពង់ជ្វានេះ។ ជាក់ស្ដែង ថ្ងៃនេះមានការចូលរួមជួបជុំគ្នាយ៉ាងច្រើនសស្រាក់ស្រាំជួយរៀបចំតុបតែងលម្អសង្ក្រាន្ត និងសម្អាតបរិស្ថានទីធ្លាវត្ត ព្រមទាំងពេលល្ងាចៗមានការហាត់សមរបាំផ្សេងៗសម្រាប់អបអរសង្ក្រាន្តឆ្នាំថ្មីផងដែរ។

រដ្ឋបាលឃុំតាំងក្រសៅដែលដឹកនាំដោយលោក ប៊ន រ៉ាបានមានប្រសាសន៍លើកឡើងថា ក្រោមម្លប់សន្តិភាព រដ្ឋបាលឃុំខិតខំអនុវត្តតាមកម្មវិធីគោលនយោបាយជាតិ និងលើកកម្ពស់ជីវភាពប្រជាជន ដោយក្នុងនោះគោលនយោបាយភូមិ-ឃុំមានសុវត្ថិភាព សម្រាប់រដូវកាលចូលឆ្នាំថ្មីខាងមុខនេះ រដ្ឋបាលឃុំ និងប៉ុស្តិ៍រដ្ឋបាលបានសហការដឹកនាំកិច្ចប្រជុំជាមួយមេភូមិ និងប្រជាការពារភូមិ ដើម្បីត្រៀមរក្សាការពារសុវត្ថិភាពឱ្យបានល្អជូនបងប្អូនប្រជាពលរដ្ឋនៅទីប្រជុំជន វត្តអារាម ជាពិសេសនៅក្នុងវត្តតាំងក្រសៅ ដែលបានរៀបចំសង្ក្រាន្តសម្រាប់បងប្អូនមកលេងកម្សាន្តសប្បាយ។

រដ្ឋបាលឃុំទាំង៣ បានពាវនាវ និងសំណូមពរដល់បងប្អូនប្រជាពលរដ្ឋ សូមធ្វើដំណើរបើកបរដោយប្រុងប្រយ័ត្ន គោរពច្បាប់ចរាចរណ៍ដើម្បីសុខសុវត្ថិភាពក្នុងឱកាសឆ្លងឆ្នាំថ្មីប្រពៃណីជាតិខាងមុខនេះ និងទទួលបានសិរីសួស្ដីឆ្នាំថ្មី និងពុទ្ធពរទាំង ៤ប្រការ អាយុ វណ្ណៈ សុខៈពលៈ កុំបីឃ្លៀងឃ្លាតឡើយ៕

ដោយ: ស៊ុម វណ្ណា