AKP កណ្ដាល ថ្ងៃទី២៧ ខែមីនា ឆ្នាំ២០២៥-- 

ឯកឧត្តម នូ សាខន ប្រធានក្រុមប្រឹក្សាខេត្តកណ្តាល និងលោកជំទាវ នៅថ្ងៃទី២៧ ខែមីនា ឆ្នាំ២០២៥ បានអញ្ជើញជាអធិបតីក្នុងពិធីបុណ្យឆ្លងដងទង់ ក្លោងទ្វារ និងសមិទ្ធផលនានា នៅវត្តទួលរំលេចរតនារាម ក្នុងសង្កាត់ជ្រោយតាកែវ ក្រុងសំពៅពូន ដោយមានការអញ្ជើញចូលរួមពីសមាជិកក្រុមប្រឹក្សាខេត្ត មន្ទីរជុំវិញខេត្ត អាជ្ញាធរក្រុងសំពៅពូន សិស្សានុសិស្ស និងប្រជាពលរដ្ឋជាច្រើនរូប។

ឯកឧត្តម នូ សាខន បានមានប្រសាសន៍ថា ពិធីសម្ពោធសមិទ្ធផលនានាក្នុងឱកាសនេះ គឺជាសមិទ្ធផលថ្មីបន្ថែមទៀតក្នុងព្រះពុទ្ធសាសនា ដែលបានបង្ហាញឱ្យឃើញពីការរីកចម្រើនក្នុងវិស័យពុទ្ធចក្រ ដែលកើតឡើងពីមូលដ្ឋានគ្រឹះដ៏សំខាន់ គឺប្រទេសជាតិមានសុខសន្តិភាព មានការអភិវឌ្ឍលើគ្រប់វិស័យ ទាំងពុទ្ធចក្រ និងអាណាចក្រ។ កត្តាសុខសន្តិភាព និងស្ថេរភាពនយោបាយ គឺជាមូលដ្ឋានគ្រឹះដ៏ចាំបាច់សម្រាប់ប្រទេសជាតិយើង ព្រោះប្រទេសមួយមានសន្តិភាព គឺមានលទ្ធភាពផ្តោតការយកចិត្តទុកដាក់លើកិច្ចអភិវឌ្ឍន៍សេដ្ឋកិច្ចសង្គម និងសុខុមាលភាពរបស់ប្រជាពលរដ្ឋបានល្អប្រសើរ ដូច្នេះសន្តិភាពគឺជាធាតុផ្សំដ៏សំខាន់ សម្រាប់ធានាចីរភាពនៃកិច្ចអភិវឌ្ឍន៍។ ជោគជ័យទាំងនេះផ្តើមចេញពីការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ដែលជាស្ថាបនិកនៃនយោបាយឈ្នះ-ឈ្នះ និងជាបិតាសន្តិភាពរបស់កម្ពុជា ព្រមទាំងការដឹកនាំបន្តវេនពីសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។

ឯកឧត្តមប្រធានក្រុមប្រឹក្សាខេត្តបានបញ្ជាក់បន្ថែមថា ក្រោមដំបូលនៃសន្តិភាព វត្តអារាមត្រូវបានកសាងឡើងវិញជាបន្តបន្ទាប់ពាសពេញប្រទេសគ្រប់រាជធានី ខេត្ត។ ជាក់ស្តែង វិស័យព្រះពុទ្ធសាសនា នៅខេត្តកណ្តាល ក៏មានការរីកចម្រើនគួរឱ្យកត់សម្គាល់ផងដែរ។ ដូចនេះយើងទាំងអស់គ្នាត្រូវចូលរួមថែរក្សាសុខសន្តិភាព និងចូលរួមថែរក្សាសមិទ្ធិផលដែលបានដាក់សម្ពោធឱ្យប្រើប្រាស់ក្នុងថ្ងៃនេះឱ្យបានគង់វង្សស្ថិតស្ថេរ ដើម្បីជាការចូលរួមចំណែក្នុងការលើកស្ទួយដល់វិស័យព្រះពុទ្ធសាសនា។ ឯកឧត្តមប្រធានក្រុមប្រឹក្សាខេត្តបានផ្ដាំផ្ញើដល់សិស្សានុសិស្ស ត្រូវខិតខំរៀនសូត្រ ដើម្បីអនាគតខ្លួនឯង ក្រុមគ្រួសារ និងសង្គមជាតិ ពិសេសត្រូវចៀសឱ្យឆ្ងាយពីគ្រឿងញៀន និងល្បែងអបាយមុខគ្រប់ប្រភេទ។

នាឱកាសនោះដែរ ឯកឧត្តមប្រធានក្រុមប្រឹក្សាខេត្តក៏បានចូលរួមអបអរសាទរដែលវត្តទួលរំលេចរតនារាមទើបតែទទួលបាននូវសមិទ្ធផលថ្មីៗបន្ថែមទៀត ព្រមទាំងបានថ្លែងអំណរគុណយ៉ាងជ្រាលជ្រៅចំពោះសប្បុរសជន និងពុទ្ធបរិស័ទជិតឆ្ងាយទាំងអស់ ដែលបានចូលរួមកសាង ដោយបានឧបត្ថម្ភជាសម្ភារ ថវិកា ក្នុងការកសាងនូវសមិទ្ធផលនានានៅក្នុងវត្តមួយនេះ ដើម្បីបម្រើដល់វិស័យព្រះពុទ្ធសាសនា ដែលជាសាសនារបស់រដ្ឋ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)