AKP បន្ទាយមានជ័យ ថ្ងៃទី២៧ ខែមីនា ឆ្នាំ២០២៥ -- ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានអញ្ជើញចុះជួបសំណេះសំណាលជាមួយថ្នាក់ដឹកនាំសង្កាត់កោះពងសត្វ និងសង្កាត់ភ្នៀត ព្រមទាំងបានចុះពិនិត្យការប្រមូលផលស្រូវរបស់កសិករក្នុងសង្កាត់ទាំងពីរ នៃក្រុងសិរីសោភ័ណ ខេត្តបន្ទាយមានជ័យ នាព្រឹកថ្ងៃទី២៧ ខែមីនា ឆ្នាំ២០២៥។

ក្នុងឱកាសនោះ ឯកឧត្តមរដ្ឋមន្ត្រីបានលើកឡើងអំពីគោលបំណងនៃការចុះពិនិត្យការងារគ្រប់វិស័យក្នុងខេត្តបន្ទាយមានជ័យ ដើម្បីជំរុញឱ្យមានភាពរីកចម្រើនស្របតាមគោលនយោបាយរបស់រាជរដ្ឋាភិបាល និងបានសង្កត់ធ្ងន់លើការជំរុញសកម្មភាពកសិកម្មដើម្បីធានាសន្តិសុខស្បៀង ការផ្តល់សេវាសាធារណៈឱ្យកាន់តែល្អប្រសើរ និងការពង្រឹងការងារភូមិ ឃុំមានសុវត្ថិភាពជូនប្រជាពលរដ្ឋទូទាំងខេត្តប្រកបដោយគុណភាព និងប្រសិទ្ធភាពខ្ពស់។

ទន្ទឹមនឹងនេះ ឯកឧត្តមបានលើកទឹកចិត្តយ៉ាងខ្លាំងឱ្យកសិករខេត្តបន្ទាយមានជ័យ រួមគ្នា ចងក្រងជាសហគមន៍កសិកម្មទំនើប និងបានពន្យល់ថា ការបង្កើតសហគមន៍កសិកម្មទំនើបនឹងផ្តល់នូវអត្ថប្រយោជន៍ជាច្រើនដល់កសិករ រួមមាន ទទួលបានទុនកម្ចីដែលមានការប្រាក់ទាប ដែលជាប្រភពទុនសំខាន់សម្រាប់ការអភិវឌ្ឍកសិកម្ម។ កាត់បន្ថយការចំណាយ តាមរយៈការទិញជី ថ្នាំកសិកម្មជាសមូហភាព ដែលអាចទទួលបានតម្លៃទាបជាងការទិញដោយឡែកៗ និងចៀសវាងការជំពាក់បំណុលដែលនាំឱ្យមានការប្រាក់ខ្ពស់។ បង្កើនទិន្នផល និងគុណភាពផលិតផល តាមរយៈការផលិតទ្រង់ទ្រាយធំ ដែលងាយស្រួលក្នុងការអនុវត្តបច្ចេកទេសកសិកម្មទំនើប។ ទទួលបានការសម្របសម្រួលបច្ចេកទេស ពីមន្ត្រីកសិកម្មឃុំ និងជាពិសេសពីក្រសួងកសិកម្ម រុក្ខាប្រមាញ់ និងនេសាទ ដែលនឹងជួយកសិករក្នុងការបង្កើនចំណេះដឹង និងជំនាញក្នុងការធ្វើកសិកម្ម។

ឯកឧត្តមរដ្ឋមន្ត្រីបានបញ្ជាក់បន្ថែមថា ក្រសួងកសិកម្ម រុក្ខាប្រមាញ់ និងនេសាទ នឹងបន្តគាំទ្រ និងផ្តល់កិច្ចសហការយ៉ាងជិតស្និទ្ធដល់សហគមន៍កសិកម្ម ដើម្បីធានាឱ្យសហគមន៍ទាំងនោះដំណើរការប្រកបដោយប្រសិទ្ធភាព និងនិរន្តរភាព។

សម្រាប់ការលើកឡើងរបស់ឯកឧត្តម ឌិត ទីណា ត្រូវបានកសិករ និងថ្នាក់ដឹកនាំមូលដ្ឋានសាទរយ៉ាងខ្លាំង ដោយពួកគេបានបង្ហាញពីការប្តេជ្ញាចិត្តក្នុងការសហការគ្នាបង្កើតសហគមន៍កសិកម្មទំនើប ដើម្បីលើកកម្ពស់ជីវភាពរស់នៅ និងរួមចំណែកក្នុងការអភិវឌ្ឍវិស័យកសិកម្មនៅខេត្តបន្ទាយមានជ័យឱ្យកាន់តែរីកចម្រើន៕

ដោយ ឈុន សារ៉ាត