AKPបន្ទាយមានជ័យថ្ងៃទី២៧ខែមីនាឆ្នាំ២០២៥--នៅ  វិទ្យាល័យ ហ៊ុនសែនមង្គលបូរី ស្រុកមង្គលបូរី កាលពីរសៀលថ្ងៃទី២៦ ខែមីនា ឆ្នាំ២០២៥នេះ បានរៀបចំពិធីដ៏សំខាន់មួយគឺពិធីផ្ទេរប្រគល់សម្ភារៈអេឡិចត្រូនិកបច្ចេកវិទ្យាព័ត៌មាន ដែលជាការគាំទ្រដ៏ថ្លៃថ្លាពីអង្គការសម្រេចសុបិនកុមារកម្ពុជា។ ពិធីនេះប្រព្រឹត្តទៅក្រោមអធិបតីភាពរបស់លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ ដោយមានការចូលរួមពីសំណាក់ថ្នាក់ដឹកនាំស្រុក គណៈគ្រប់គ្រងសាលា លោកគ្រូ អ្នកគ្រូ សិស្សានុសិស្ស និងតំណាងអង្គការសម្រេចសុបិនកុមារកម្ពុជាជាច្រើនរូប។

ព្រឹត្តិការណ៍ដ៏មានអត្ថន័យនេះ បានបង្ហាញពីការប្តេជ្ញាចិត្តរួមគ្នាក្នុងការលើកកម្ពស់គុណភាពនៃការអប់រំតាមរយៈការបញ្ចូលបច្ចេកវិទ្យាព័ត៌មានទៅក្នុងដំណើរការបង្រៀន និងរៀនសូត្រ។ សម្ភារៈអេឡិចត្រូនិកដែលត្រូវបានប្រគល់នាឱកាសនោះ រួមមាន កុំព្យូទ័រយួរដៃ កុំព្យូទ័រលើតុ ម៉ាស៊ីនបញ្ចាំងរូបភាព និងឧបករណ៍បច្ចេកវិទ្យាទំនើបៗផ្សេងទៀត ដែលនឹងក្លាយជាឧបករណ៍ដ៏សំខាន់សម្រាប់គ្រូ និងសិស្សានុសិស្សក្នុងការបង្កើនប្រសិទ្ធភាពនៃការសិក្សា។

ក្នុងឱកាសដ៏ថ្លៃថ្លានោះ លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្ត បានថ្លែងនូវសេចក្តីសោមនស្សរីករាយ និងថ្លែងអំណរគុណយ៉ាងជ្រាលជ្រៅចំពោះអង្គការសម្រេចសុបិនកុមារកម្ពុជា ដែលបានផ្តល់ការគាំទ្រដ៏សំខាន់នេះដល់វិទ្យាល័យ ហ៊ុនសែនមង្គលបូរី។ លោកបានគូសបញ្ជាក់ថា ការផ្តល់សម្ភារៈបច្ចេកវិទ្យាព័ត៌មាននេះ គឺជាការវិនិយោគដ៏មានតម្លៃសម្រាប់ការអភិវឌ្ឍធនធានមនុស្ស ជាពិសេសយុវជនដែលជាទំពាំងស្នងឫស្សីរបស់ប្រទេសជាតិ។

លោក ឈូ ប៊ុនរឿងបានមានប្រសាសន៍ថា "ថ្ងៃនេះ គឺជាថ្ងៃដ៏សំខាន់មួយទៀតសម្រាប់វិស័យអប់រំនៅក្នុងខេត្តបន្ទាយមានជ័យរបស់យើង ជាពិសេសសម្រាប់វិទ្យាល័យ ហ៊ុនសែនមង្គលបូរី។ ខ្ញុំពិតជាមានសេចក្តីសោមនស្សរីករាយ និងសូមថ្លែងអំណរគុណយ៉ាងជ្រាលជ្រៅចំពោះអង្គការសម្រេចសុបិនកុមារកម្ពុជា ដែលបានផ្តល់នូវការគាំទ្រដ៏ធំធេងនូវសម្ភារៈអេឡិចត្រូនិកបច្ចេកវិទ្យាព័ត៌មានដ៏ទំនើបនេះ។"

លោកប្រធានមន្ទីរបានបន្តថា "បច្ចេកវិទ្យាព័ត៌មានដើរតួនាទីយ៉ាងសំខាន់នៅក្នុងសង្គមបច្ចុប្បន្ន ហើយការបំពាក់បំប៉ននូវឧបករណ៍ទាំងនេះដល់សាលារៀន គឺជាការត្រៀមលក្ខណៈដ៏ចាំបាច់មួយសម្រាប់សិស្សានុសិស្សរបស់យើង ឱ្យពួកគេមានលទ្ធភាពស្វែងយល់ និងប្រើប្រាស់បច្ចេកវិទ្យាឱ្យមានប្រសិទ្ធភាព។ នេះមិនត្រឹមតែជួយបង្កើនគុណភាពនៃការបង្រៀន និងរៀនសូត្រប៉ុណ្ណោះទេ ប៉ុន្តែថែមទាំងបើកឱកាសឱ្យសិស្សានុសិស្សទទួលបាននូវចំណេះដឹង និងជំនាញថ្មីៗ ដែលជាតម្រូវការចាំបាច់នៅក្នុងទីផ្សារការងារនាពេលអនាគតផងដែរ"។

លោក ឈូ ប៊ុនរឿង ក៏បានលើកទឹកចិត្តដល់គណៈគ្រប់គ្រងសាលា លោកគ្រូ អ្នកគ្រូ ព្រមទាំងសិស្សានុសិស្សទាំងអស់ ឱ្យប្រើប្រាស់សម្ភារៈទាំងនេះឱ្យបានពេញលេញ និងប្រកបដោយការទទួលខុសត្រូវខ្ពស់ ដើម្បីជាប្រយោជន៍ដល់ការសិក្សា និងការអភិវឌ្ឍខ្លួន។       

លោកបានសង្កត់ធ្ងន់ថា "ខ្ញុំសង្ឃឹមយ៉ាងមុតមាំថា សម្ភារៈដែលទទួលបាននាពេលនេះ នឹងក្លាយជាកម្លាំងចលករដ៏សំខាន់មួយ ក្នុងការជំរុញឱ្យវិទ្យាល័យ ហ៊ុនសែនមង្គលបូរី កាន់តែរីកចម្រើន និងក្លាយជាគំរូសម្រាប់សាលារៀនដទៃទៀតនៅក្នុងខេត្តរបស់យើង"។

បន្ថែមពីលើនេះ លោកប្រធានមន្ទីរក៏បានថ្លែងនូវការប្តេជ្ញាចិត្តរបស់មន្ទីរអប់រំ យុវជន និងកីឡាខេត្ត ក្នុងការបន្តគាំទ្រ និងសហការជាមួយអង្គការដៃគូនានា ដើម្បីលើកកម្ពស់វិស័យអប់រំឱ្យកាន់តែមានភាពរីកចម្រើន និងឆ្លើយតបទៅនឹងតម្រូវការនៃសង្គមជាតិ។

នេះគឺជាសក្ខីភាពមួយទៀតដែលបង្ហាញពីការយកចិត្តទុកដាក់ និងកិច្ចសហការយ៉ាងជិតស្និទ្ធរវាងរាជរដ្ឋាភិបាល អង្គការសង្គមស៊ីវិល និងសហគមន៍ ក្នុងការកសាងអនាគតដ៏ភ្លឺស្វាងសម្រាប់កូនចៅខ្មែរ តាមរយៈការផ្តល់នូវឱកាសសិក្សាប្រកបដោយគុណភាព និងបរិយាបន្ន។ ការបំពាក់នូវបច្ចេកវិទ្យាទំនើបដល់សាលារៀន គឺជាជំហានដ៏សំខាន់មួយឆ្ពោះទៅរកការអប់រំឌីជីថល ដែលជាផ្នែកមួយដ៏សំខាន់ក្នុងការអភិវឌ្ឍប្រទេសជាតិឱ្យកាន់តែរីកចម្រើនក្នុងយុគសម័យសេដ្ឋកិច្ចឌីជីថលនេះ។

នៅក្នុងពិធីនោះផងដែរ តំណាងអង្គការសម្រេចសុបិនកុមារកម្ពុជា បានបង្ហាញពីគោលបំណង និងចក្ខុវិស័យរបស់អង្គការក្នុងការចូលរួមចំណែកដល់ការអភិវឌ្ឍវិស័យអប់រំនៅកម្ពុជា ជាពិសេសការផ្តល់ឱកាសឱ្យកុមារ និងយុវជនទទួលបាននូវការអប់រំប្រកបដោយគុណភាព និងសមធម៌៕

ដោយ៖ ឈុនសារ៉ាត