AKP កំពង់ឆ្នាំង ថ្ងៃទី២៧ ខែមីនា ឆ្នាំ២០២៥-- លោក យិន សាវ៉េន អភិបាលរងខេត្ដកំពង់ឆ្នាំងនិងជាប្រធានគណៈកម្មាធិការប្រយុទ្ធប្រឆាំងនឹងជំងឺអេដស៍បានអញ្ជើញជាអធិបតីក្នុងកម្មវិធីបើកសិក្ខាសាលាស្ដីពីវឌ្ឍនៈរបស់គណៈកម្មាធិការប្រយុទ្ធនិងជំងឺអេដស៍ខេត្តកំពង់ឆ្នាំងប្រចាំឆមាសទី១ ឆ្នាំ២០២៥ កម្មវិធីនេះធ្វើនៅមន្ទីពេទ្យខេត្តកំពង់ឆ្នាំង កាលពីថ្ងៃទី២៦ ខែមីនា ឆ្នាំ២០២៥ ដោយមានការអញ្ជើញចូលរួមពីលោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង លោក លោកស្រី ប្រធានមន្ទីរអង្គភាពជុំវិញខេត្ដ និង អភិបាល ក្រុង ស្រុកទាំង៨  ចូលរួមផងដែរ។

ក្នុងឱកាសនោះលោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងបានមានប្រសាសន៏ឱ្យដឹងថា ប៉ុន្មានឆ្នាំចុងក្រោយនេះខេត្តកំពង់ឆ្នាំង គឺធានារក្សាបាន គ្មានប្រជាពលរដ្ឋណាស្លាប់ដោយករណី ​ឆ្លង​រាលដាល​មេរោគ​អេដស៍​និង​ជំងឺអេដស៍នោះទេ ក្នុង​ដំណាក់កាល​ដែល​ស្ថានភាព​ថវិកា​មាន​បញ្ហា​ប្រឈម រួម​នឹង​និន្នាការ​ធ្លាក់ចុះ​នៃ​ហិរញ្ញប្បទាន​ក្រៅប្រទេស។ នៅក្នុង​រយៈពេល​​ដំណាក់កាល​នេះ យើង​ទាំងអស់គ្នា​ចាប់ផ្តើម​បំពេញ​តួនាទី​ក្នុង​ភាពជា​ម្ចាស់ រួម​នឹង​ការ​ពង្រឹង​ភាពជា​អ្នកដឹកនាំ ជាពិសេស​ការទទួលខុសត្រូវ​របស់​គណៈកម្មាធិការ​ប្រយុទ្ធ​នឹង​ជំងឺអេដស៍ នៅ​តាម​បណ្តាមន្ទីរ ស្ថាប័ន ខេត្ត ស្រុក រួម​ជាមួយ​អង្គការ​ដៃគូ ក្នុង​ការ​ពង្រីក​សក្តា​នុ​ពល​នៃ​បទ​អន្តរាគមន៍​នានា ក៏ដូចជា​ធ្វើការ​សិក្សា​ស្រាវជ្រាវ និង​ជំរុញ​លើកទឹកចិត្ត​អ្នក​សង្ស័យ​ថា​ផ្ទុកមេរោគ​អេដស៍ ឱ្យមក​ទទួល​សេវា​ធ្វើតេស្ត​រក​មេរោគ​អេដស៍ ដើម្បី​ឈាន​ឆ្ពោះទៅ​សម្រេច​បានគោលដៅគ្មានមេរោគអេដស៍។​

ទន្ទឹមនឹងនេះលោក យិន សាវ៉េន អភិបាលរងខេត្ដកំពង់ឆ្នាំងបានមានប្រសាសន៍ថា ដើម្បីឈានទៅសំរេចទិសដៅយុទ្ធសាស្រ្តជាតិលុបបំបាត់ជម្ងឺ-មេរោគអេដស៍ អោយបាន យើងត្រូវរួមគ្នាគិតគូ ទាំងមន្ទីរស្ថាប័នពាក់ព័ន្ធជុំវិញខេត្ត កងកំលាំងប្រដាប់អាវុធ អង្គការដៃគូ អាជ្ញាធរដែនដី បណ្តាញអ្នកស្ម័គ្រចិត្តភូមិ និងសហគមន៍ ដែលជាក្រុមការងារពិសេស ត្រូវជម្រុញការងារនេះសម្រេចតាមទិសដៅយុទ្ធសាស្រ្តជាតិ ប្រទេសកម្ពុជា គ្មានមេរោគអេដស៍ ។

ក្នុងបរិបទនេះលោកអភិបាលរងខេត្តបានបញ្ជាក់ទៀតថា ក្នុងកាងារប្រយុទ្ធនឹងជំងឺអេសដ៍ដែលក្នុងនោះ៩០% នៃអ្នកផ្ទុកមេរោគអេដស៍​កំពុងទទួលបានការព្យាបាលដោយថ្នាំប្រឆាំងមេរោគអេដស៍ តែចំនួននៃការឆ្លងមេរោគអេដស៍ថ្មី ជាពិសេសក្នុងចំណោមយុវជនវ័យក្មេង និងការស្លាប់ដោយសារជំងឺអេដស៍នៅតែជាការព្រួយបារម្ភ ដែលយើងទាំងអស់គ្នាត្រូវផ្តោតការយកចិត្តទុកដាក់ និងចូលរួមប្រយុទ្ធទប់ស្កាត់ឱ្យសកម្មបំផុត។ ការរើសអើង និងការមាក់ងាយនៅគ្រប់ទម្រង់ចំពោះអ្នករស់នៅជាមួយមេរោគអេដស៍ និងក្រុមប្រឈមមុខនៅតែ មានបន្តដែលជាឧបសគ្គចម្បងសម្រាប់ការឆ្លើយតបនឹងមេរោគអេដស៍ផងដែរ។ ម្យ៉ាងទៀត ប្រជាពលរដ្ឋទាំងអស់ត្រូវតែរស់នៅស្អាត ផឹកស្អាត និងរស់នៅក្នុងបរិស្ថានល្អ កុំចោសសំរាមពាលវាលពាសកាល។បងប្អូនប្រជាពលរដ្ឋទាំងអស់ និងមន្ត្រីជំនាញពាក់ព័ន្ធ ចូលរួមយ៉ាងសកម្មរក្សាបាននូវបរិស្ថាន ពិសេសអនាម័យជុំវិញផ្ទះ សម្រាម ព្រៃស្មៅ និងសំបកកំប៉ុងផ្សេងៗ។ល។ ដែលជាបច្ច័យអាក្រក់ផ្ដល់ជំរកដល់សត្វមូស បណ្ដាលឱ្យបង្ករការរំខានដល់បងប្អូនប្រជាពលរដ្ឋពិសេសកុមារតូចបណ្ដាលឱ្យមានមេរោគគ្រុន ក្រៅពីមេរោគអេដស៍ផងដែរ ៕

ដោយ៖ បៃ ស៊ីថុន