AKP ភ្នំពេញ ថ្ងៃទី២៦ ខែមីនា ឆ្នាំ២០២៥-- បន្ទាប់ពីរយៈពេល៤ថ្ងៃនៃយុទ្ធនាការហែលទឹកទន្លេមេគង្គ និងការជួបសំណេះសំណាលជាមួយសហគមន៍រួចមក ក្រុមអ្នកហែលទឹករបស់អង្គការ WWF បានបញ្ចប់បេសកកម្មហែលទឹកចម្ងាយ១២០គីឡូម៉ែត្រប្រកបដោយសុវត្ថិភាពដោយឆ្លងកាត់ទីជម្រកសត្វផ្សោត កាលពីថ្ងៃទី២០ ខែមីនា ឆ្នាំ ២០២៥ ដែលយុទ្ធនាការហែលទឹកនេះដើម្ប រៃអង្គាសថវិកាសម្រាប់កម្មវិធី អភិរក្សសត្វផ្សោត។

តាមរយៈយុទ្ធនាការហែលទឹកទន្លេមេគង្គ អង្គការ WWF បានរៃអង្គាសថវិកាប្រមាណជាង ២០ ០០០ ដុល្លារអាមេរិក សម្រាប់កម្មវិធី អភិរក្សសត្វផ្សោត ហើយថវិកាទាំងនេះនឹងផ្តល់ការគាំទ្រដល់កម្មវិធី ឆ្មាំទន្លេមេគង្គ និងកម្មវិធីស្រាវជ្រាវសំខាន់ៗសម្រាប់កិច្ចការអភិរក្ស។ ជាលទ្ធផល ក្រុមការងាររបស់អង្គការ WWF បានទទួលការជួយគាំទ្រពី រដ្ឋបាលជលផល នៃក្រសួងកសិកម្មរុក្ខាប្រមាញ់ និងនេសាទ អជ្ញាធរខេត្តស្ទឹងត្រែង និងក្រចេះ អង្គការដៃគូ ព្រមទាំងសហគមន៍។ 

ជាការប្តេជ្ញាចិត្ត ជាក់ស្តែង សហគមន៍អេកូទេសចរណ៍កោះផ្តៅ និងកោះព្រហ្មចារី បានចូលរួមធ្វើការប្តេជ្ញាការពារសត្វផ្សោត និងទន្លេមេគង្គរបស់យើង រួមគ្នាជាមួយក្រុមអ្នកហែលទឹក ជាពិសេសនោះ គឺ រដ្ឋបាលខេត្តទាំងពីរ ក៏បានប្រកាសពីការគាំទ្រចំពោះគំនិតផ្តួចផ្តើមទាំងនេះផងដែរ៕

ដោយ ណយ នឿន (ប្រភព៖ WWF)