AKP កំពង់ធំ ថ្ងៃទី២៥ ខែមីនា ឆ្នាំ២០២៥--ក្នុងឱកាសអញ្ជើញដឹកនាំក្រុមការងារថ្នាក់ខេត្ត/ស្រុកព្រមទាំងកម្លាំងជំនាញចុះត្រួតពិនិត្យទីតាំងដីព្រៃលិចទឹកស្ថិតនៅក្នុងភូមិសាស្រ្តភូមិខ្សាច់ជីរស់ ឃុំកំពង់គោ ស្រុកកំពង់ស្វាយ ខេត្តកំពង់ធំ កាលពីថ្ងៃទី២៤ ខែមីនា ឆ្នាំ២០២៥ ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានមានប្រសាសន៍ថា រដ្ឋបាលខេត្តកំពង់ធំហាមដាច់ខាតមិនអនុញ្ញាតឱ្យជនខិលខូចណាមួយអាចទន្ទ្រានរំលោភយកដីរដ្ឋនៅតំបន់បីមកធ្វើជាកម្មសិទ្ធិរបស់ខ្លួនឡើយ។ 

ទីតាំងដីដែលជនខិលខូចមួយចំនួន នៅតែរុករានទន្ទ្រានរំលោភយកដីរបស់រដ្ឋនៅតំបន់ហាមឃាត់មកធ្វើស្រែប្រាំងមានប្រហែល២ពាន់ហិកតា ស្ថិតនៅតំបន់ខ្វាក់តូច ខ្វាក់ធំ ក្នុងភូមិសាស្ត្រឃុំកំពង់គោ ស្រុកកំពង់ស្វាយ ខេត្តកំពង់ធំ ត្រូវអនុវត្តទៅតាមគោលការណ៍របស់រាជរដ្ឋាភិបាលកម្ពុជាឱ្យមានប្រសិទ្ធភាពខ្ពស់។

ក្នុងឱកាសនោះ ឯកឧត្តម នួន ផារ័ត្ន បានសំណូមពរដល់បងប្អូនប្រជាពលរដ្ឋទាំងអស់ដែលអាស្រ័យផលធ្វើស្រែប្រាំងនៅដីតំបន់៣ដែលបានឆ្វៀល ហើយសូមរក្សាឱ្យបានល្អ ហាមជាដាច់ខាតមិនឱ្យបន្តទន្ទ្រានយកដីរបស់រដ្ឋទៀតឡើយ។ ប្រសិនបើបងប្អូនប្រជាពលរដ្ឋ ឃើញសកម្មភាពដែលជនខិលខូចកំពុងតែធ្វើសកម្មភាពអ្វីមួយនៅលើដីតំបន់៣ដែលជាដីរបស់រដ្ឋ សូមរាយការណ៍មកអាជ្ញាធរមូលដ្ឋានដើម្បីចុះអន្តរាគមន៍ឱ្យបានទាន់ពេលវេលា៕

ដោយ ស៊ុម វណ្ណា