AKP ភ្នំពេញ ថ្ងៃទី២៣ ខែមីនា ឆ្នាំ២០២៥--

ក្នុងការបំពេញទស្សនកិច្ចនៅចក្រភពអង់គ្លេស ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានដឹកនាំគណៈប្រតិភូធ្វើទស្សនកិច្ច និងសិក្សាស្វែងយល់អំពីកម្មវិធីកិច្ចការពារកុមារ ការថែទាំជំនួសចំពោះកុមារ និងការបណ្តុះបណ្តាលជំនាញសង្គមកិច្ច នៅសាកលវិទ្យាល័យ East Anglia នាទីក្រុង Norwich ដោយបានស្តាប់បទបង្ហាញដោយសាស្ត្រាចារ្យដែលមានបទពិសោធន៍ច្រើនឆ្នាំលើជំនាញសង្គមកិច្ច និងការសិក្សាស្រាវជ្រាវផ្នែកកិច្ចការថែទាំជំនួសចំពោះកុមារ ជាពិសេសការថែទាំកុមារនៅតាមគ្រួសារជាអាទិ៍ ស្ថានភាពនៃការថែទាំកុមារដោយគ្រួសារធម៌នៅតំបន់អឺរ៉ុប ផលប៉ះពាល់នៃការថែទាំកុមារនៅក្នុងមណ្ឌល និងសារៈប្រយោជន៍នៃការថែទាំកុមារដោយគ្រួសារធម៌ ការលើកកម្ពស់ការថែទាំដោយគ្រួសារធម៌ និងការស្មុំកូនជាដើម ព្រមទាំងមានការផ្លាស់ប្តូរនូវបទពិសោធន៍អំពីការអនុវត្តជាក់ស្តែងនៃកម្មវិធីថែទាំកុមារដោយគ្រួសារធម៌ និងនៅតាមមណ្ឌលថែទាំកុមារក្នុងបរិបទប្រទេសកម្ពុជាផងដែរ។

ក្នុងឱកាសនោះ ឯកឧត្តមរដ្ឋមន្ត្រី ជា សុមេធី បានវាយតម្លៃខ្ពស់ចំពោះការងារដែលសាកលវិទ្យាល័យ  East Anglia បាន និងកំពុងធ្វើលើការងារបណ្តុះបណ្តាលជំនាញផ្នែកសង្គមកិច្ច និងការសិក្សាស្រាវជ្រាវពាក់ព័ន្ធនឹងការថែទាំជំនួសចំពោះកុមារ ព្រមទាំងបានចែករំលែកមកដល់គណៈប្រតិភូកម្ពុជា ដើម្បីជាមូលដ្ឋានសម្រាប់បង្កើនប្រសិទ្ធភាពនៃការអនុវត្តកម្មវិធីថែទាំកុមារនាពេលអនាគត។ ជាមួយគ្នានេះ សាស្ត្រាចារ្យទាំងអស់ក៏បានគាំទ្រយ៉ាងក្លៀវក្លាចំពោះទស្សនកិច្ចចែករំលែកបទពិសោធន៍គ្នានេះ និងស្នើឱ្យមានទំនាក់ទំនងគ្នាបន្តទៀតទៅថ្ងៃខាងមុខ ដើម្បីពង្រឹងកិច្ចសហការលើការងារសិក្សាស្រាវជ្រាវ និងការផ្លាស់ប្តូរកម្មសិក្សាផ្នែកសង្គមកិច្ចរវាងសាកលវិទ្យាល័យ និងក្រសួងសង្គមកិច្ច អតីតយុទ្ធជន និងយុវនីតិសម្បទា។

តមកគណៈប្រតិភូក៏បានធ្វើទស្សនកិច្ចនៅការិយាល័យកណ្តាលអង្គការ Care for Children ដើម្បីទស្សនាសកម្មភាពរបស់បុគ្គលិក និងសមិទ្ធផលនានារបស់អង្គការដែលបានអនុវត្តនៅបណ្តាប្រទេសគោលដៅដូចជា ប្រទេសចិន វៀតណាម និងប្រទេសថៃជាដើម ព្រមទាំងបានសម្តែងនូវការប្តេជ្ញាចិត្តក្នុងការពង្រឹងកិច្ចសហប្រតិបត្តិបន្ថែមទៀត ដើម្បីអនុវត្តគម្រោងអភិវឌ្ឍន៍ការទុកដាក់កុមារក្នុងគ្រួសារនៅកម្ពុជារយៈពេល៣ឆ្នាំបន្ត (២០២៥-២០២៨) ឱ្យទទួលបានប្រសិទ្ធភាព៕

ដោយ៖ ចាន់ សុភឿន (ប្រភព៖ ក្រសួងសង្គមកិច្ច)