AKP ភ្នំពេញ ថ្ងៃទី២២ ខែមីនា ឆ្នាំ២០២៥-- 

ឯកឧត្តម ហែម ក្រាញ់តូនី ប្រធានរដ្ឋបាលស្តីទីអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានថ្លែងថា ភាពយន្តឯកសារ “រឿងរ៉ាវរបស់ខ្ញុំ” គឺជាចែករំលែកអំពីការចងចាំដ៏ឈឺចាប់របស់ដើមបណ្ដឹងរដ្ឋប្បវេណី ការទន្ទឹងរង់ចាំជាច្រើនទសវត្សរ៍របស់ក្រុមគ្រួសារ និងការតស៊ូរបស់ប្រទេសមួយដែលបានប្រឈមនឹងអតីតកាលរបស់ខ្លួន ហើយថាតាមរយៈភាពយន្តឯកសារ “រឿងរ៉ាវរបស់ខ្ញុំ” ការឈឺចាប់របស់ជនរងគ្រោះទាំងអស់នឹងត្រូវបានដឹងឮ ទទួលស្គាល់ និងផ្តល់កិត្តិយស ព្រមទាំងធានាថាមនុស្សជំនាន់ក្រោយនឹងបានស្វែងយល់អំពីសារៈសំខាន់នៃយុត្តិធម៌ និងសច្ចភាពប្រវត្តិសាស្ត្រ”។ ការលើកឡើងរបស់ឯកឧត្តមបែបនេះធ្វើឡើងក្នុងឱកាសនៃការចាក់បញ្ចាំងភាពយន្តឯកសារ “រឿងរ៉ាវរបស់ខ្ញុំ”នៅក្នុងមហោស្រពភាពយន្តអន្តរជាតិកម្ពុជាលើកទី១៤ នារសៀលថ្ងៃទី២២ ខែមីនា ឆ្នាំ២០២៥ នៅសាលសន្និសីទចតុមុខ។

ឯកឧត្តមបានបន្តថា នៅក្នុងប្រទេសកម្ពុជា ការរៀបរាប់អំពីរឿងរ៉ាវតាមរយៈខ្សែភាពយន្ត បានដើរតួនាទីយ៉ាងសំខាន់ក្នុងការព្យាបាល និងធានាថាមេរៀនប្រវត្តិសាស្ត្រមិនត្រូវបានបំភ្លេចចោលឡើយ។ ភាព យន្តឯកសារ “រឿងរ៉ាវរបស់ខ្ញុំ” ដែលត្រូវបានសហការផលិតដោយអង្គជំនុំជម្រះវិសាមញ្ញក្នុងតុលាការកម្ពុជា និងស្ថាប័នប្រព័ន្ធផ្សព្វផ្សាយអប់រំកម្ពុជា(EBC) ដែលជាភាពយន្ដជាសំឡេងរបស់ដើមបណ្តឹងរដ្ឋប្បវេណីចំនួន៩រូប រៀបរាប់អំពីបទពិសោធន៍ផ្ទាល់ខ្លួនរបស់ពួកគាត់នៅក្នុងសម័យខ្មែរក្រហម និងការចូលរួមផ្ដល់សក្ខីកម្មនៅក្នុងអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)។

សូមជម្រាបជូនថា អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) គឺជាសាលាក្តីកូនកាត់មួយដែលត្រូវបានបង្កើតឡើងដើម្បីជំនុំជម្រះក្ដីលើឧក្រិដ្ឋកម្មដែលបានកើតឡើងនៅក្នុងរបបរបបខ្មែរក្រហមពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩។ ចាប់តាំងពីបង្កើតឡើងមកអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានដើរតួនាទីយ៉ាងសំខាន់ក្នុងការស្វែងរកយុត្តិធម៌ ការផ្សះផ្សាជាតិ  និងការចងចាំជាប្រវត្តិសាស្ត្រនៅកម្ពុជា៕

ដោយ៖ ចាន់ សុភឿន