AKP ភ្នំពេញ ថ្ងៃទី២១ ខែមីនា ឆ្នាំ២០២៥-- ក្រុមការងារការិយាល័យស៊ើបអង្កេត និងទប់ស្កាត់ការរត់ពន្ធនុយក្លេអ៊ែរនៃក្រសួងថាមពលសហរដ្ឋអាមេរិក (Nuclear Smuggling Detection and Deterrence Program) ហៅកាត់ថា NSDD បានបញ្ចប់បេសកកម្មរបស់ខ្លួនកាលពីថ្ងៃទី២០ ខែមីនា ឆ្នាំ២០២៥នេះ បន្ទាប់ពីបានបំពេញទស្សនកិច្ចនៅកម្ពុជាអស់រយៈពេលមួយសប្តាហ៍កន្លងមក ជាមួយនឹងការប្តេជាបន្តកិច្ចសហប្រតិបត្តិការ អោយកាន់តែរឹងមាំនាពេលអនាគត។

លោក BENJAMIN LEE ប្រធានគម្រោងNSDD បានថ្លែងអំណរគុណចំពោះឯកឧត្តម នាយឧត្តមសេនីយ៍បណ្ឌិត ផន ណារ៉ា និងក្រុមការងារអាជ្ញាធរជាតិអាវុធគីមី ដែលបានធ្វើជាម្ចាស់ផ្ទះ ក្នុងសប្តាហ៍កន្លងមកនេះ។ យើងមានការចាប់អារម្មណ៍យ៉ាងខ្លាំងចំពោះបទបង្ហាញដ៏ស៊ីជម្រៅ និងសកម្មភាពដែលបានបង្ហាញតាមរយៈការសន្ទនា និងការពិភាក្សាដោយស្មោះត្រង់ ជួនកាលប៉ះលើប្រធានបទរសើបផងដែរ ធ្វើឱ្យការយល់ដឹងរបស់យើងកាន់តែស៊ីជម្រៅ អំពីគ្នាទៅវិញទៅមក និងបានផ្តល់ជាផែនទីបង្ហាញផ្លូវ អំពីរបៀបដែលយើងអាចឆ្ពោះទៅមុខក្នុងភាពជាដៃគូនេះ។

លោក Benjamin Lee បានបង្ហាញការចាប់អារម្មណ៍ជាខ្លាំង ចំពោះការប្តេជ្ញាចិត្តមិនផ្លាស់ប្តូរ ចំពោះបេសកកម្មនៃការរក្សាប្រទេសកម្ពុជាឱ្យមានសុវត្ថិភាពពីការគំរាមកំហែងនៃអាវុធនុយក្លេអ៊ែរ។ ទោះបីជាធនធានមានកម្រិតក៏ដោយ វាគឺជាភស្តុតាងដែលថា អាផ្ញាធរជាតិអាវុធគីមី មានការប្តេជ្ញាចិត្តពេញលេញក្នុងការអនុវត្តអាណត្តិស្របច្បាប់របស់ខ្លួន។ វិធីសាស្រ្តរបស់អស់លោក មិនមែនជាការលាលែងពីតំណែងនៅពេលប្រឈមមុខនឹងបញ្ហានោះទេ ប៉ុន្តែជាវិធីមួយ នៃភាពធន់ និងការតាំងចិត្តជំនះឧបសគ្គជាមួយនឹងវិជ្ជាជីវៈ និងស្មារតីនៃកាតព្វកិច្ច។ លោកប្រធានគម្រោងបានប្តេជ្ញាបន្តពង្រឹងភាពជាដៃគូដ៏រឹងមាំ និងមានតម្លាភាព កសាងឡើងលើភាពស្មោះត្រង់ និងការទំនាក់ទំនងបើកចំហ ហើយធ្វើការឆ្ពោះទៅរកគោលដៅរួម នៃការប្រឆាំងការរត់ពន្ធនុយក្លេអ៊ែរ និងការរក្សាពិភពលោកឱ្យមានសុវត្ថិភាពពីអំពើភេរវកម្មនុយក្លេអ៊ែរ។

តាងនាមឱ្យអគ្គលេខាធិការដ្ឋានអាជ្ញាធរជាតិអាវុធគីមី ឯកឧត្តម ឧត្តមសេនីយ៍ទោ នឿន វិទ្យា អគ្គលេខាធិការរងនៃអគ្គលេខាធិការដ្ឋាន អាជ្ញាធរជាតិទប់ស្កាត់អាវុធគីមី បានថ្លែងអំណរគុណចំពោះគណៈប្រតិភូនៃការិយាល័យស៊ើបអង្កេត និងទប់ស្កាត់ការរត់ពន្ធនុយក្លេអ៊ែរNSDD ចំពោះការបំពេញបេសកម្មដ៏សំខាន់មកកាន់កម្ពុជា។ យើងបានផ្លាស់ប្តូរចំណេះដឹង និងបទពិសោធន៍សំខាន់ៗ និងបានពិភាក្សាគ្នាយ៉ាងផុសផុល និងការធ្វើបទបង្ហាញអំពីបទពិសោធន៍ជាក់ស្តែងរបស់NSDDផងដែរ។ ធនធានមនុស្ស និងសម្ភារបរិក្ខាររបស់អាជ្ញាធរជាតិអាវុធគីមី គឺមានកំណត់នៅក្នុងវិស័យដ៏ស្មុគស្មាញនេះ។ ប៉ុន្ទែថ្វីបើធនធានរបស់យើងនៅមានកម្រិតក្តី យើងនៅតែប្តេជ្ញាសហការជាមួយទីភ្នាក់ងារជាតិ និងអន្តរជាតិពាក់ព័ន្ធ ដើម្បីតាមដាន និងទប់ស្កាត់ការជួញដូរខុសច្បាប់នូវសារធាតុនុយក្លេអ៊ែរ និងវិទ្យុសកម្ម ដូចដែលយើងទាំងអស់គ្នាបានដឹងហើយថា នេះមិនមែនជាការគំរាមកំហែងថ្នាក់ជាតិប៉ុណ្ណោះទេ ប៉ុន្តែជាការគំរាមកំហែងកម្រិតពិភពលោកដ៏គួរឱ្យបារម្ភ។ ដូច្នេះយើងត្រូវការជាចាំបាច់នូវកិច្ចគាំទ្ររយៈពេលយូរ និងប្រកបដោយនិរន្តរភាពពីNSDD។ ក្រៅពីកិច្ចការបច្ចេកទេស ទំនាក់ទំនងភាពជាដៃគូ និងមិត្តភាពក៏មានសារៈសំខាន់ខ្លាំងផងដែរ។ យើងគប្បីត្រូវរក្សាទំនាក់ទំនងដ៏រឹងមាំ និងជិតស្និទ្ធ រវាងNSDD និងអាជ្ញាធរជាតិអាវុធគីមីឱ្យខាងតែបាន ដែលទាំងនេះហើយជាកូនសោឆ្ពោះទៅរកភាពជោកជ័យ ក្នុងគម្រោងនេះ៕

ដោយ សំ សាម៉ន