AKP ភ្នំពេញ ថ្ងៃទី២១ ខែមីនា ឆ្នាំ២០២៥

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានថ្លែងអំណរគុណប្រទេសតូហ្គោចំពោះការគាំទ្រការធ្វើ ជាម្ចាស់ផ្ទះកិច្ចប្រជុំកំពូលហ្វ្រង់កូហ្វនីលើកទី២០ នៅឆ្នាំ២០២៦ នៅកម្ពុជា។ នេះបើយោងតាមសេចក្តីប្រកាសព័ត៌មាន ស្ដីពីលទ្ធផលដំណើរទស្សនកិច្ចផ្លូវការរបស់ ឯកឧត្តម Komlan Edo Robert DUSSEY រដ្ឋមន្ត្រីការបរទេសតូហ្គោ នៅកម្ពុជា ចេញផ្សាយថ្ងៃទី២០ ខែមីនា ឆ្នាំ២០២៥។

ក្នុងសេចក្តីប្រកាសព័ត៌មានបានឱ្យដឹងដែរថា តបតាមការអញ្ជើញរបស់ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ឯកឧត្តមសាស្ត្រាចារ្យ Komlan Edo Robert DUSSEY រដ្ឋមន្ត្រី ការបរទេស សមាហរណកម្មតំបន់ និងប្រជាជនតូហ្គោនៅបរទេស នៃសាធារណរដ្ឋតូហ្គោ បានអញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា ពីថ្ងៃទី១៨ ដល់ថ្ងៃទី២០ ខែមីនា ឆ្នាំ ២០២៥ ដើម្បីពង្រឹងទំនាក់ទំនងរវាងកម្ពុជា និងតូហ្គោបន្ថែមទៀត។ ដំណើរទស្សនកិច្ចនេះ កើតមានឡើងចំពេលប្រទេសទាំងពីរប្រារព្ធខួបលើកទី១៥ នៃការបង្កើតទំនាក់ទំនងការទូត។

ក្នុងឱកាសនៃទស្សនកិច្ចនេះ ឯកឧត្តមសាស្ត្រាចារ្យ DUSSEY បានចូលជួបសម្តែងការគួរសមចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានជំនួបទ្វេភាគីជាមួយឯកឧត្តមឧបនាយករដ្ឋមន្ត្រី ប្រាក់ សុខុន ព្រមទាំងបានជួបពិភាក្សាដាច់ដោយឡែកជាមួយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និង ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ឯកឧត្តមឧបនាយករដ្ឋមន្ត្រី ប្រាក់ សុខុន និងឯកឧត្តមសាស្ត្រាចារ្យ Robert DUSSEY បានផ្លាស់ប្តូរទស្សនៈលើការពង្រឹង និងពង្រីកទំនាក់ទំនងកិច្ចសហប្រតិបត្តិការរវាងប្រទេសទាំងពីរ និងបានស្វាគមន៍ចំពោះការប្រារព្ធខួបលើកទី១៥ នៃទំនាក់ទំនងការទូតកម្ពុជា-តូហ្គោ ដែលជា ឱកាសក្នុងការធ្វើឱ្យកាន់តែស៊ីជម្រៅនូវទំនាក់ទំនងទ្វេភាគី ជាពិសេសក្នុងវិស័យពាណិជ្ជកម្ម និង វិនិយោគ។
ឯកឧត្តមសាស្ត្រាចារ្យ DUSSEY បានកោតសរសើរចំពោះសន្តិភាពយូរអង្វែង ស្ថិរភាព និងការអភិវឌ្ឍសេដ្ឋកិច្ច-សង្គមដ៏គួរឱ្យកត់សម្គាល់របស់កម្ពុជា ក្រោមការដឹកនាំរបស់សម្តេចធិបតី នាយករដ្ឋមន្ត្រី។
ឯកឧត្តមឧបនាយករដ្ឋមន្ត្រីបានថ្លែងអំណរគុណប្រទេសតូហ្គោចំពោះការគាំទ្រការធ្វើ ជាម្ចាស់ផ្ទះកិច្ចប្រជុំកំពូលហ្វ្រង់កូហ្វនីលើកទី២០ នៅឆ្នាំ២០២៦ នៅកម្ពុជា។

ជាមួយគ្នានេះដែរ រដ្ឋមន្រ្តីការបរទេសទាំងពីរក៏បានពិភាក្សាអំពីបញ្ហាតំបន់ និងអន្តរជាតិ ដែលជាប្រយោជន៍រួម និងបានបញ្ជាក់ជាថ្មីនូវការ ប្តេជ្ញាចិត្តក្នុងការសម្របសម្រួលយ៉ាងជិតស្និទ្ធ និងការគាំទ្រគ្នាទៅវិញទៅមកនៅលើវេទិកាអន្តរជាតិ។ ក្នុងឱកាសអបអរសាទរខួបលើកទី១៥ នៃទំនាក់ទំនងការទូត រដ្ឋមន្ត្រីការបរទេសទាំងពីរ បានឯកភាពជំរុញការផ្លាស់ប្តូរកម្រិតខ្ពស់ ដោយឯកឧត្តមសាស្ត្រាចារ្យ DUSSEY បានអញ្ជើញ ឯកឧត្តមឧបនាយករដ្ឋមន្ត្រី ទៅបំពេញទស្សនកិច្ចផ្លូវការនៅប្រទេសតូហ្គោ នៅក្នុងឆ្នាំនេះ។ ឯកឧត្តមរដ្ឋមន្ត្រីការបរទេសទាំងពីរ បានចុះហត្ថលេខារួមគ្នាលើអនុស្សរណៈនៃការយោគយល់គ្នា(MoU)ស្តីពីការបង្កើតកិច្ចពិគ្រោះយោបល់ទ្វេភាគី រវាងក្រសួងការបរទេសទាំងពីរ និងកិច្ចព្រមព្រៀងស្តីពីការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូតនិងផ្លូវការ៕

ដោយ៖ ជឹម ណារី