AKP កណ្ដាល ថ្ងៃទី២១ ខែមីនា ឆ្នាំ២០២៥–សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃសុក្រ ៨រោច ខែផល្គុន ឆ្នាំរោង ឆស័កព.ស.២៥៦៨ ត្រូវនឹងថ្ងៃទី២១ ខែមីនា ឆ្នាំ២០២៥នេះ អញ្ជើញជាអធិបតី ក្នុងពិធីសម្ពោធអគារសិក្សា ខ្លោងទ្វារ និងសមិទ្ធផលនានា នៅវិទ្យាល័យ ហ៊ុន សែន សេរីភាពក្រុងតាខ្មៅ ខេត្តកណ្តាល ។

ឯកឧត្តម គួច ចំរើន អភិបាលខេត្តកណ្តាល បានឱ្យដឹងថា វិទ្យាល័យ ហ៊ុន សែន សេរីភាព ស្ថិតនៅក្នុងភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្ដាល នៅលើផ្ទៃដីសរុបប្រមាណ ១៩.១៤៤ម៉ែត្រការ៉េ។ សាលារៀនមានកំណើតតាំងពីឆ្នាំ១៩៨០ មានឈ្មោះថា "សាលាសិក្សាកម្រិត២ទីរួមខេត្ត"  បង្កើតនៅក្រោយថ្ងៃរំដោះពីរបបប្រល័យពូជសាសន៍ប៉ុលពត ហើយធ្លាប់បានប្រជាជនដាក់ឈ្មោះថា "សាលាលិចទឹក" ព្រោះស្ថិតនៅលើដីទំនាបដែលមានតែអគារទ្រុឌទ្រោម។ សាលារៀននេះបានប្តូរពីអនុវិទ្យាល័យទៅជាវិទ្យាល័យនៅឆ្នាំសិក្សា២០០៤-២០០៥ ដែលមាន ឈ្មោះថា វិទ្យាល័យ “ហ៊ុន សែន សេរីភាព” ក្រោមការដឹកនាំរបស់ លោក ហ៊ុយ សុខា ជានាយកវិទ្យាល័យ និងបច្ចុប្បន្នគណៈគ្រប់គ្រងវិទ្យាល័យ ដឹកនាំដោយ លោកនាយក ម៉ម សុធានី ។

ក្នុងឆ្នាំសិក្សា២០២៤-២០២៥ វិទ្យាល័យ ហ៊ុន សែន សេរីភាព មាន គ្រូសរុប​ចំនួន ២៤១នាក់ (ស្រី ១១៥ នាក់) មានសិស្សសរុបចំនួន ៤ ៧៨៥ នាក់ (ស្រី២ ៥១២ នាក់) ចែកចេញជា ៨៤ ថ្នាក់ និងមានអគារ ១០ ខ្នង ស្មើនឹង ១២០ បន្ទប់ (ក្នុងនោះអគារសម្តេចតេជាមាន ៦ ខ្នង ស្មើ ៦៣ បន្ទប់) និងមានអគារសម្រាប់ការបង្រៀន អគារការិយាល័យ បន្ទប់ប្រជុំ បណ្ណាល័យ បន្ទប់ពិសោធន៍ បន្ទប់កុំព្យូទ័រ បន្ទប់សម្ភារ បន្ទប់រៀបចំអាហារសម្រន់ បន្ទប់សំឡេង អាហារដ្ឋាន បន្ទប់ទឹក និងកន្លែងលាងដៃ ជាដើម។

លទ្ធផលប្រឡងសញ្ញាបត្រមធ្យមសិក្សាទុតិយភូមិ សិស្សមកប្រឡង ៥៧៥ នាក់ (ស្រី ៣០៩ នាក់) សិស្សប្រឡងជាប់សរុប ៣៨៤ នាក់ ស្មើនឹង ៦៦.៧៨% (ស្រី ២០៣ នាក់ ស្មើនឹង ៦៥.៧០%) ក្នុងនោះបាននិទ្ទេស A សរុប ២៥ នាក់ (ស្រី ១១នាក់)។

ចំពោះសមិទ្ធផលដែលត្រូវសម្ពោធឆ្លងដាក់ឱ្យប្រើប្រាស់ក្នុងឱកាសនេះ គឺជាចំណងដៃថ្មីបន្ថែមទៀតសម្រាប់វិស័យអប់រំនៅក្នុងខេត្តកណ្តាល និងជាពិសេសសម្រាប់លោកគ្រូ អ្នកគ្រូ សិស្សានុសិស្ស បងប្អូនប្រជាពលរដ្ឋទាំងអស់ជាអាណាព្យាបាលសិស្សនៅក្នុងក្រុងតាខ្មៅផ្ទាល់ ដែល​រួមមាន៖ អគារសិក្សា ១ ខ្នង កម្ពស់ ៣ ជាន់ ស្មើនឹង ៣០ បន្ទប់ ខ្លោងទ្វារ និងសមិទ្ធផលនានា៕

ដោយ៖ គង់ សិរីរ័ត្ន