AKP ភ្នំពេញ ថ្ងៃទី២០ ខែមីនា ឆ្នាំ២០២៥

ក្រុមនិស្សិតមកពីសាកលវិទ្យាល័យ ប៊ែលធី អន្ដរជាតិ ជាង ៥០០នាក់ បានបង្ហាញទឹកចិត្ដសប្បាយរីករាយ និងផ្ដល់នូវសារៈសំខាន់ក្នុងការចុះកម្មសិក្សានៅក្រសួងព័ត៌មាន ដែលបានផ្ដល់នូវចំណេះដឹងថ្មីៗ និងបទពិសោធន៍ជាច្រើនទាក់ទងនឹងការផលិតព័ត៌មាន ការគ្រប់គ្រងព័ត៌មាន និងការផ្សព្វផ្សាយព័ត៌មាន ខណៈពេលនិស្សិតអាចភ្ជាប់រវាងការសិក្សាទ្រឹស្តី និងការអនុវត្តជាក់ស្តែង ព្រមទាំងការត្រៀមខ្លួនសម្រាប់បំពេញការងារទាំងក្នុងក្រប​ខ័ណ្ឌរដ្ឋ និងឯកជនពេលដែលបញ្ចប់ការសិក្សា។

ក្នុងពេលចុះកម្មសិក្សាផ្ទាល់នៅអគ្គនាយកដ្ឋាន ទីភ្នាក់ងារសារព័ត៌មានកម្ពុជា (AKP) នារសៀលថ្ងៃទី២០ ខែ មីនា ឆ្នាំ ២០២៥នេះ ព្រះតេជគុណ មាក់ សំអុន ជានិស្សិតរៀនជំនាញសារព័ត៌មាននៃសាកលវិទ្យាល័យប៊ែលធីអន្តរជាតិមានថេរដីការថា ព្រះអង្គពិតជាមានការចាប់អារម្មណ៍យ៉ាងខ្លាំងក្នុងវិស័យសារព័ត៌មានកម្ពុជាពី​ព្រោះថាវិស័យមួយនេះបានដើរតួនាទីយ៉ាងសំខាន់សម្រាប់ផ្តល់ព័ត៌មានដល់សាធារណជន និងវិស័យនេះកំពុងមានការរីកចម្រើនយ៉ាងខ្លាំងនៅកម្ពុជា។ ព្រះអង្គបន្ដថា ជាក់ស្តែងតាមរយៈការទស្សនកិច្ចសិក្សានៅក្រសួងព័ត៌មានឃើញថាមិនត្រឹមតែព្រះអង្គឃើញការរីកចម្រើនយ៉ាងខ្លាំងក្លាទេ តែក៏បានបង្ហាញពីធនធានមនុស្សនៅកម្ពុជាលើវិស័យព័ត៌មាននេះគួរជាទីមោទនៈ។

ព្រះតេជគុណ មាក់ សំអុន បានមានព្រះថេរដីការឱ្យដឹងបន្ថែមថា៖ «ការរៀននៅសាកលវិទ្យាល័យ និងការបានមកទស្សនកិច្ចសិក្សាផ្ទាល់នេះឃើញថាមុខជំនាញនេះពិតជាមានសារៈសំខាន់មួយដែលមិនអាចខ្វះបានពីព្រោះថាចំណេះជំនាញនេះមិនត្រឹមតែបង្ហាញពីអ្វីដែលមានសម្រាប់ប្រទេសជាតិយើងទេ តែក៏បានជួយឱ្យយើងបានចូលរួមក្នុងការផ្សព្វផ្សាយដើម្បីជួយដោះស្រាយនៅក្នុងសង្គមថែមទៀត។ យើងមា្នក់ៗជានិស្សិតជំនាញលើវិស័យនេះគួរនាំគ្នាបង្ហាញពីអ្វីដែលប្រទេសយើងមានពិសេសការរីកចម្រើនរបស់ប្រទេសជាតិ ក៏ដូចជាការចូលរួមដោះស្រាយបញ្ហានៅក្នុងសង្គមរបស់យើងសំដៅលើកស្ទួយប្រទេសជាតិកាន់តែរីកចម្រើនបន្ថែមទៀត»។

ចំពោះកញ្ញា ប៉េងហួត ចាន់លីដា ជានិស្សិតរៀនជំនាញសារព័ត៌មាននៃសាកលវិទ្យាល័យប៊ែលធីអន្តរជាតិដែរនោះ ក៏បានបញ្ជាក់ឱ្យដឹងថា តាមរយៈការបង្ហាញពីមន្រ្តីជំនាញៗផ្នែកសារព័ត៌មាននៅក្រសួងព័ត៌មានឃើញថា   វិស័យសារព័ត៌មានកម្ពុជាមិនត្រឹមតែមានគុណភាពគួរជាទីមោទនៈសម្រាប់យុវជនជំនាន់ក្រោយទេ តែបើនិយាយពីបច្ចេកវិទ្យាមិនចាញ់ប្រទេសធំៗលើពិភពលោកឡើយ។ កញ្ញារូបនេះបន្ដថា កម្ពុជាក៏មានវិស័យសារព័ត៌មានរីកចម្រើន ជាពិសេសសា្ថប័នព័ត៌មានរបស់រដ្ឋ ដែលមានការរីកចម្រើនយ៉ាងឆាប់រហ័ស នាយុគសម័យថ្មីនេះ ។

ជានិស្សិតរូបនេះមកពីខេត្តរតនគិរី ដែលជាតំបន់ស្ថិតនៅភាគឦសានប្រទេសកម្ពុជា កញ្ញា ប៉េងហួត ចាន់លីដា បានលើកឡើងដែរថា ក្នុងនាមជាអ្នករស់នៅតំបន់ដាច់ស្រយ៉ាល ហើយបានមកសិក្សានៅរាជធានីភ្នំពេញបានធ្វើឱ្យកញ្ញាមានការចាប់អារម្មណ៍យ៉ាងខ្លាំងលើវិស័យព័ត៌មាន ផ្សាភ្ជាប់នឹងប្រទេសជាតិ ដែលកាលពីមុននេះកញ្ញាមិនបានគិតដល់ទេ ពិសេសពេលដែលមកទស្សនកិច្ចសិក្សានៅក្រសួងព័ត៌មាន ពិតជាធ្វើឱ្យកញ្ញាមើលឃើញកាន់តែទូលំទូលាយលើវិស័យព័ត៌មាននៅកម្ពុជាក៏ដូចជានៅលើពិភពលោក។

កញ្ញា ប៉េងហួត ចាន់លីដា បានបញ្ជាក់បន្ថែមថា៖ «កម្ពុជាពិតជាមានធនធានមនុស្សលើគ្រប់វិស័យ ហើយក្រសួងព័ត៌មានក៏សម្បូរទៅដោយធនធានមនុស្សមួយ ដែលខ្ញុំមិននឹកស្មានដល់ដែរ។ បើខ្ញុំមិនបានមកទស្សនកិច្ចសិក្សាទេគឺពិតជាមិនបានដឹងឡើយអ្វីដែលកម្ពុជាមាននាពេលបច្ចុបុ្បន្ន»។

ជាមួយគ្នានេះ យុវជន ខុន សារ៉ាក់ ដែលជានិស្សិតមួយរូបទៀតសិក្សាលើមុខវិជ្ជាសារព័ត៌មានដែរនោះ មកពីខេត្តកំពង់ស្ពឺ ដែលបានចុះមកទស្សនកិច្ចសិក្សានៅក្រសួងព័ត៌មានបាននិយាយថា ក្នុងនាមជានិស្សិតផ្នែកសារព័ត៌មានមួយរូប លោកមើលឃើញថា កម្ពុជាសម្បូរទៅដោយសារព័ត៌មានច្រើន ហើយលោកចង់ឱ្យនិស្សិតដែលសិក្សាលើមុខជំនាញវិជ្ជាជីវៈសារព័ត៌មាននេះជួយលើកស្ទួយកម្ពុជាឱ្យកាន់តែរីកចម្រើនឈានទៅមុខទៀតតាមរយៈសារព័ត៌មាន។ លោកក៏បានជំរុញដល់និស្សិតបញ្ចប់ការសិក្សាផ្នែកសារព័ត៌មានទាំងអស់ត្រូវផលិតព័ត៌មានដែលពិត ហើយចូលរួមប្រឆាំងព័ត៌មានក្លែងក្លាយផងដែរ។

ក្នុងឱកាសនោះ ឯកឧត្ដម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានថ្លែងបញ្ជាក់ឱ្យដឹងនៅរសៀលថ្ងៃទី២០ ខែមីនា ឆ្នាំ២០២៥នេះថា ដំណើរទស្សនកិច្ចរបស់និស្សិតនៃសាកលវិទ្យាល័យ ប៊ែលធី អន្ដរជាតិរយៈពេល៣ ថ្ងៃ នៅក្រសួងព័ត៌មាននេះ គឺពិតជាមានសារៈសំខាន់សម្រាប់ឱ្យនិស្សិតទាំងអស់ ទទួលបាននូវបទពិសោធន៍ក្នុងការអនុវត្ដដោយផ្ទាល់តាមរយៈការជួបជាមួយអ្នកជំនាញក្នុងវិស័យព័ត៌មាន និងសោតទស្សន៍ ដោយ​ទទួលបានការសិក្សារៀនសូត្របន្ថែមទាក់ទងនឹងជំនាញ ការដកស្រង់នូវបទពិសោធន៍ក្នុងការផលិត​ព័ត៌​មាន ការគ្រប់គ្រងព័ត៌មាន និងការផ្សព្វផ្សាយរបស់ប្រព័ន្ធផ្សព្វផ្សាយរដ្ឋ ដែលស្ថិតនៅក្រោមចំណុះក្រសួងព័ត៌មាន ដែលមានអគ្គនាយកដ្ឋានព័ត៌មាន និងសោតទស្សន៍, អគ្គនាយកដ្ឋានទូរទស្សន៍ជាតិកម្ពុជា, អគ្គនាយកដ្ឋានទីភ្នាក់ងារសារព័ត៌មានកម្ពុជា AKP និងអគ្គនាយកដ្ឋានវិទ្យុជាតិកម្ពុជា។ ឯកឧត្ដមបានលើកឡើងថា អ្វីដែលទទួលបានពីការចុះកម្មសិក្សារបស់និស្សិតនេះ នឹងក្លាយទៅជាទុនមួយដ៏មានសារៈសំខាន់ក្នុងកម្មវិធីសិក្សារបស់ពួកគាត់ និងឈានទៅបញ្ចប់ការសិក្សាលើមុខវិជ្ជាសារព័ត៌មាន ដើម្បីក្លាយជាធនធានមនុស្ស រួមចំណែកអភិវឌ្ឍន៍វិស័យព័ត៌មាន និងសោតទស្សន៍នៅកម្ពុជាឱ្យកាន់តែរីកចម្រើនថែមទៀត។ ឯកឧត្ដមបានឱ្យដឹងទៀតថា តាមរយៈការចុះកម្មសិក្សារបស់ប្អូនៗជានិស្សិតនៅក្រសួងព័ត៌មាននេះពួកគាត់ផ្ដល់នូវសារៈសំខាន់លើវិស័យព័ត៌មាន និងសោតទស្សន៍ ជាពិសេសតួនាទីដ៏សំខាន់ប្រព័ន្ធផ្សព្វផ្សាយរបស់រដ្ឋដែលមានទូរទស្សន៍ជាតិកម្ពុជា វិទ្យុជាតិកម្ពុជា ទីភ្នាក់ងារសារព័ត៌មានកម្ពុជា AKP កាសែតកម្ពុជា និងទស្សនាវដ្ដី ដែលជាសំឡេងរបស់ជាតិក្នុងការចូលរួមថែរក្សា ការពារសុខសន្ដិភាពអស់រយៈពេលជាង៤៦ឆ្នាំ ដើម្បីរួមចំណែកក្នុងការចូលរួមអភិវឌ្ឍន៍សង្គម-សេដ្ឋកិច្ច។

ឯកឧត្ដមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានបន្ថែមថា៖ «យុវជនមានតួនាទីសំខាន់ណាស់ក្នុងការរួមចំណែកអភិរក្ស និងអភិវឌ្ឍន៍វិស័យព័ត៌មាន និងសោតទស្សន៍នៅកម្ពុជាឱ្យកាន់តែរីកចម្រើនបន្ថែមទៀត ដោយចូលរួមផ្សព្វផ្សាយអំពីឧត្ដមភាពប្រព័ន្ធផ្សព្វផ្សាយរដ្ឋ របស់ជាតិយើង។ ទន្ទឹមនេះ យុវជនក៏ត្រូវចូលរួមតាមរយៈការផលិត ផ្សព្វផ្សាយព័ត៌មាន និងការគ្រប់គ្រងព័ត៌មានប្រកបដោយការទទួលខុសត្រូវ ផ្សាយព័ត៌មានដែលមានគុណភាព ផ្ដល់ចំណេះដឹង ព័ត៌មានបែបអប់រំ ឆ្លើយបតទៅនឹងតម្រូវការរបស់យុវជនក្នុងសង្គមទាំងប្រព័ន្ធផ្សព្វផ្សាយបែបប្រពៃណី និងទំនើប ធានាការទទួលព័ត៌មានរបស់ប្រជាពលរដ្ឋឱ្យមានភាពត្រឹមត្រូវ និងមានសុវត្ថិភាព»។

ការលើកឡើងរបស់ឯកឧត្ដមអ្នកនាំពាក្យក្រសួងព័ត៌មានបែបនេះ បានធ្វើឡើងក្នុងខណៈពេលដែលនិស្សិតនៃ សាកលវិទ្យាល័យ ប៊ែលធី អន្ដរជាតិ ចុះកម្មសិក្សានៅក្រសួងព័ត៌មាន រយៈពេល៣ថ្ងៃ ចាប់ពីថ្ងៃទី១៨ ដល់ថ្ងៃទី២០ ខែមីនា ឆ្នាំ២០២៥។

បើតាមឯកឧត្ដម ទេព អស្នារិទ្ធ ដំណើរទស្សនកិច្ចរបស់និស្សិតនៃសាកលវិទ្យាល័យ ប៊ែលធី អន្ដរជាតិនាឱកាសនេះ ធ្វើឡើងស្ថិតក្នុងក្របខ័ណ្ឌនៃកិច្ចសហប្រតិបត្តិការរវាងក្រសួងព័ត៌មាន និងសាកលវិទ្យាល័យ ប៊ែលធី អន្តរជាតិ ដើម្បីបើកឱកាសឱ្យសិស្ស និស្សិតដែលកំពុងសិក្សានៅសាលាប៊ែលធី អាចផ្សារភ្ជាប់ការសិក្សាអំពីទ្រឹស្តី និងការអនុវត្ត ហើយបើសិនជាយើងមិនបានផ្សារភ្ជាប់រវាងការសិក្សាជាមួយទ្រឹស្តីនោះទេ គឺជួបការលំបាកនៅពេលចេញទៅធ្វើការងារ។ ឯកឧត្ដមបានឱ្យដឹងបន្ថែមទៀតថា តាមរយៈការចុះកម្មសិក្សារបស់ប្អូនៗជានិស្សិតនៅក្រសួងព័ត៌មាននេះ ពួកគេបានស្វែងយល់យ៉ាងច្បាស់ពីសារៈសំខាន់នៃវិស័យព័ត៌មាន និងសោតទស្សន៍កម្ពុជា។

សូមជម្រាបជូនថា ការធ្វើទស្សនកិច្ចរបស់ និស្សិត នៃសាកលវិទ្យាល័យ ប៊ែលធី អន្តរជាតិ ក្នុងគោលបំណងដើម្បីឱ្យបានយល់ដឹងអំពីការបំពេញកិច្ចការងារ បទពិសោធន៍ ទ្រឹស្ដីដែលបានសិក្សានៅក្នុងថ្នាក់មកអនុវត្តន៍ផ្ទាល់ ជាពិសេស ទស្សនកិច្ចសិក្សាមួយនេះ អាចជួយពង្រឹងកិច្ចសហប្រត្តិបត្តិការរវាងសាកលវិទ្យាល័យ ប៊ែលធី អន្តរជាតិ និងក្រសួងព័ត៌មាន ហើយក៏ជាឱកាសការងារដ៏ល្អមួយសម្រាប់និស្សិតផងដែរ ៕

ដោយ៖ ដេប៉ូ និង រិទ្ធី