AKP កំពង់ធំ ថ្ងៃទី២០ ខែមីនា ឆ្នាំ២០២៥ -- កិច្ចប្រជុំស្ដីពីការផ្សព្វផ្សាយរៀបចំបញ្ជីសារពើភណ្ឌប្រកាសទ្រព្យសម្បត្តិរដ្ឋ ឆ្នាំគោល "២០២៤" និងជំរុញការធ្វើបណ្ណកម្មសិទ្ធិលើដីរដ្ឋទូទាំងខេត្តកំពង់ធំ ដែលបានរៀបចំធ្វើឡើងនៅសាលប្រជុំរដ្ឋបាលខេត្ត នាព្រឹកថ្ងៃទី២០ ខែមីនា ឆ្នាំ២០២៥ ក្រោមវត្តមានរបស់លោកស្រីលំ គន្ធារី អភិបាលរងខេត្តកំពង់ធំ។

លោកស្រី លំ គន្ធារី បានធ្វើការណែនាំ និងជំរុញដល់អ្នកទទួលខុសត្រូវតាមមន្ទីរអង្គភាព និងរដ្ឋបាលក្រុងស្រុកទាំងអស់ត្រូវធ្វើយ៉ាងណាពន្លឿនរៀបចំធ្វើបញ្ជីសារពើភណ្ឌទ្រព្យសម្បត្តិរដ្ឋក្នុងឆ្នាំ២០២៤កន្លងមកដោយមានកើនឡើងឬថយចុះដើម្បីជំរុញការធ្វើវិញ្ញាបនបត្រសម្គាល់អចលនវត្ថុឱ្យបានទាន់ពេលវេលា។ កន្លងមកក្រសួងសេដ្ឋកិច្ច និងហិរញ្ញវត្ថុ បានស្នើសុំជាបន្តបន្ទាប់មកដល់អាជ្ញាធរខេត្តអំពីការផ្ដល់បញ្ជីសារពើភ័ណ្ឌទ្រព្យសម្បត្តិរដ្ឋដែលមន្ទីរអង្គភាពជុំវិញខេត្ត និងអាជ្ញាធរក្រុងស្រុក ឃុំសង្កាត់ បានកាន់កាប់ និងប្រើប្រាស់ទ្រព្យសម្បត្តិរដ្ឋទាំងអស់ត្រូវរៀបចំបញ្ជីសារពើភណ្ឌទ្រព្យសម្បត្តិរដ្ឋរៀងរាល់ឆ្នាំ និងតារាងកើនឡើងឬថយចុះទ្រព្យសម្បត្តិរដ្ឋប្រចាំឆ្នាំ។ ដើម្បីពន្លឿនការងារនេះឱ្យបានទាន់ពេលវេលា មន្រ្តីពាក់ព័ន្ធទាំងអស់ត្រូវយកចិត្តទុកដាក់សហការធ្វើការងារនេះឱ្យបានឆាប់ ស្របតាមច្បាប់ជាធរមាន។

លោកស្រី លំ គន្ធារី បានបញ្ជាក់ថា មន្រ្តីដែលរៀបចំធ្វើបញ្ជីនេះត្រូវដឹងពីគោលការណ៍សំខាន់ៗមួយចំនួនក្នុងការរៀបចំបញ្ជីសារពើភណ្ឌរបស់រដ្ឋរួមមានការផ្គូផ្គងបញ្ជីសារពើភណ្ឌទ្រព្យសម្បត្តិរដ្ឋដោយយកបញ្ជីចាស់និងយកឯកសារពាក់ព័ន្ធដើម្បីធ្វើការពិនិត្យផ្ទៀងផ្ទាត់បូកសរុបវាយតម្លៃទ្រព្យសម្បត្តិរដ្ឋក្នុងបញ្ជីសារពើភណ្ឌរដ្ឋរបស់មន្ទីរ អង្គភាពរដ្ឋបាលខេត្ត ក្រុង-ស្រុកនិងឃុំសង្កាត់នីមួយៗនិងត្រូវធ្វើស្ថិតិទីតាំងដីរបស់ខ្លួនឱ្យបានច្បាស់លាស់ និងគ្រប់ជ្រុងជ្រោយដោយបញ្ជាក់អំពីចំនួនបណ្ណកម្មសិទ្ធិរួច និងមិនទាន់មានបណ្ណកម្មសិទ្ធិ។

កិច្ចប្រជុំនេះបានធ្វើឡើងក្នុងគោលបំណងផ្សព្វផ្សាយសារាចរណែនាំលេខ០១៩សហវ.សរ.អទច ស្តីពីការដាក់ឱ្យប្រើប្រាស់ប្រព័ន្ធបច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ជំនាន់ថ្មី និងលិខិតបទដ្ឋានគតិយុទ្ធជាធរមានដើម្បីជំរុញដល់ការធ្វើបណ្ណកម្មសិទ្ធដីរដ្ឋ និងការចុះបញ្ញីសារពើភណ្ឌ នីតិវិធីនៃការធ្វើបណ្ណកម្មសិទ្ធិដីរដ្ឋ៕

ដោយ ស៊ុម វណ្ណា