AKP កំពង់ធំ ថ្ងៃទី២០ ខែមីនា ឆ្នាំ២០២៥-- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ កាលពីថ្ងៃទី១៩ ខែមីនា ឆ្នាំ២០២៥ បានអញ្ជើញជួបសំណេះសំណាលសួរសុខទុក្ខកងកម្លាំងចម្រុះដែលប្រចាំការការពារទប់ស្កាត់ និងបង្ក្រាបបទល្មើសធនធានធម្មជាតិចំនួន៤ ទីបញ្ជាការស្រាលនៅក្នុងភូមិសាស្ត្រដែនជម្រកសត្វព្រៃ ព្រៃឡង់ ដែលប្រព្រឹត្តទៅនៅតំបន់អូរជះ ឃុំសុចិត្រ ស្រុកសណ្ដាន់ ខេត្តកំពង់ធំ។

ក្នុងឱកាសនោះ ឧត្តមសេនីយ៍ទោ សោម ស៊ុន បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានិងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ចំពោះកងកម្លាំងចម្រុះទាំងអស់ ដែលបបាននិងកំពុងបំពេញភារកិច្ចយ៉ាងសកម្មក្នុងការការពារទប់ស្កាត់ និងបង្ក្រាបបទល្មើសធនធានធម្មជាតិក្នុងភូមិសាស្ត្រខេត្តកំពង់ធំប្រកបដោយប្រសិទ្ធភាព និងស្មារតីទទួលខុសត្រូវខ្ពស់។

ឧត្តមសេនីយ៍ទោ សោម ស៊ុន បានកោតសរសើរចំពោះកងកម្លាំងចម្រុះទាំងអស់ស្ថិតនៅក្នុងទីបញ្ជាការស្រាលទាំង៤ដែលប្រចាំការការពារទប់ស្កាត់ និងបង្ក្រាបបទល្មើសធនធានធម្មជាតិក្នុងភូមិសាស្ត្រដែនជម្រកសត្វព្រៃ ព្រៃឡង់នៅក្នុងរយៈពេលជាង១០ ខែកន្លងទៅនេះ គឺបងប្អូនបានខិតខំយកចិត្តទុកដាក់បំពេញភារកិច្ចតាមបទបញ្ជារបស់ប្រមុខរាជរដ្ឋាភិបាលនិងបទបញ្ជារបស់ថ្នាក់ដឹកនាំគ្រប់លំដាប់ថ្នាក់ ព្រមទាំងបទបញ្ជារបស់ឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំទទួលបានជោគជ័យ ដោយបានការពារមិនឱ្យមានការកាប់ទន្ទ្រានព្រៃឈើយកដីរដ្ឋជាថ្មីទៀតបានឡើយ និងបានរកឃើញដីព្រៃ ដែលជនល្មើសបានលួចកាប់ទន្ទ្រានកន្លងទៅបានជាង៣៣០០ហិកតាដែលយើងកំពុងគ្រប់គ្រង ត្រៀមដាំស្តារព្រៃឈើឡើងវិញនៅក្នុងរដូវវស្សាខាងមុខ។ កងកម្លាំងចម្រុះរបស់យើងដែលមានកងទ័ពជាស្នូលក៏បានចូលរួមយ៉ាងសកម្មក្នុងការបង្ក្រាបការកាប់ និងដឹកជញ្ជូនឈើខុសច្បាប់ បានជាច្រើនម៉ែត្រគូប ព្រមទាំងបានចាប់ខ្លួនជនសង័្សយដែលប្រព្រឹត្តបទល្មើស និងវត្ថុតាងជាក់ស្តែងបញ្ជូនទៅកាន់តុលាការ ដើម្បីផ្ដន្ទាទោសតាមច្បាប់បានមួយចំនួនផងដែរ។

ឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ត្រៃយ៍ការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានប្រគល់ភារកិច្ចជូនកងកម្លាំងចម្រុះទាំងអស់ត្រូវខិតខំបន្តសកម្មភាពឱ្យដូចភ្លៀងរលឹមមិនឱ្យមានការកើតឡើងជាថ្មី នូវការកាប់ទន្ទ្រានដីព្រៃរបស់រដ្ឋធ្វើជាកម្មសិទ្ធិនិងការកាប់អាជ្រៀកឈើខុសច្បាប់ បានទៀតជាដាច់ខាត។

ទន្ទឹមនឹងនេះ ឧត្តមសេនីយ៍ទោ សោម ស៊ុន បានប្រគល់ជូនស្បៀងអាហារគ្រឿងឧបភោគបរិភោគ ប្រេងឥន្ធនៈដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុនី តាមរយៈឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ជូនដល់កងកម្លាំងចម្រុះ ចំនួន៤ទីបញ្ជាការស្រាល ដែលកំពុងបំពេញបេសកកម្ម ក្នុងតំបន់ដែនជម្រកសត្វព្រៃ ព្រៃឡង់រួមមាន៖ ប្រេងសាំងចំនួន ៨០០លីត្រ អង្ករចំនួន ៤០០ គីឡូក្រាម ត្រីខកំប៉ុងចំនួន៣កេសធំ និងទឹកត្រីទឹកស៊ីអ៊ីវចំនួន១៥យួរ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)