AKP ភ្នំពេញ ថ្ងៃទី២០ ខែមីនា ឆ្នាំ២០២៥-- នៅសណ្ឋាគារអង្គរមិរ៉ាខល (Angkor Miracle Resort & Spa) ឯកឧត្តម ហ៊ែល តូនី អនុប្រធានក្តាប់រួមអាជ្ញាធរទន្លេសាប លោកស្រី Bridget Collier អនុប្រធានបេសកកម្មនៃស្ថានទូតអូស្រ្តាលី និងលោកស្រី Maria Angelica Sotomayor ប្រធានគ្រប់គ្រងការអនុវត្តទឹកប្រចាំអាស៊ីប៉ាស៊ីហ្វិចនៃធនាគារពិភពលោក កាលពីរសៀលថ្ងៃទី១៩ ខែមីនា ឆ្នាំ២០២៥ បានអញ្ជើញជាអធិបតីបិទសិក្ខាសាលាស្តីពីការចាប់ផ្តើមសិក្សា និងវិភាគសន្តិសុខទឹកក្នុងអាងទន្លេសាប។

កិច្ចប្រជុំខាងលើមានសមាសភាពចូលរួមពីសមាជិកសមាជិកាអាជ្ញាធរទន្លេសាប ក្រសួង ស្ថាប័នពាក់ព័ន្ធ ខេត្តពាក់ព័ន្ធជុំវិញបឹងទន្លេសាប ស្ថាប័នអប់រំ និងស្រាវជ្រាវ និងដៃគូអភិវឌ្ឍន៍ ដោយផ្ដោតសំខាន់លើ ៤ចំណុច៖ ទី១. ការពង្រឹងការយល់ដឹងអំពីបញ្ហាសុវត្ថិភាពទឹកនៅក្នុងតំបន់បឹងទន្លេសាប និងដៃស្ទឹងរបស់វា ទី២. គាំទ្រគោលនយោបាយដើម្បីកសាងនូវការឯកភាពគ្នាលើប្រព័ន្ធនៃការគ្រប់គ្រងតំបន់ទន្លេសាប ទី៣. កំណត់ផែនការអភិវឌ្ឍពហុដំណាក់កាល ផ្អែកលើភស្តុតាងសម្រាប់តំបន់ទន្លេសាប និងទី៤. ការផ្លាស់ប្ដូរចំណេះដឹង ការបង្កើតកម្មវិធី និងការបង្កើនសមត្ថភាពភាគីពាក់ព័ន្ធ។ កិច្ចប្រជុំនេះមានគោលបំណងសំខាន់ប្រមូលផ្ដុំភាគីពាក់ព័ន្ធសំខាន់ៗទាំងអស់ ដើម្បីកំណត់ និងឯកភាពគ្នាយ៉ាងច្បាស់លើគោលដៅគម្រោង វិសាលភាព ពេលវេលា តួនាទី ទំនួលខុសត្រូវ និងហានិភ័យដែលអាចកើតមានឡើងធ្វើយ៉ាងណាឱ្យភាគីពាក់ព័ន្ធទាំងអស់មានការយល់ដឹងរួមគ្នាមុននឹងឈានទៅមុខជាមួយនឹងការអនុវត្តគម្រោងរួមគ្នា។

ជាលទ្ធផល កិច្ចប្រជុំនេះសម្រេចបាននូវការចែករំលែក និងពិភាក្សាយ៉ាងស៊ីជម្រៅអំពីបញ្ហាប្រឈម ឱកាស និងផែនការសកម្មភាពដើម្បីធានាសន្និសុខទឹកនៅអាងទន្លេសាប។ ក្រោមប្រធានបទ “ការរួមគ្នាសម្រាប់សន្តិសុខទឹកនៅអាងទន្លេសាប” យើងបានលើកយកជាមូលដ្ឋានគ្រឹះចំនួន ៣យ៉ាងមកវិភាគ ទី១. បញ្ហាទឹក និងបរិស្ថានទឹក ទី២. សង្គម-សេដ្ឋកិច្ច និងទី៣. គោលនយោបាយ និងបច្ចេកទេស ជាទស្សនៈសម្រាប់ការអភិរក្ស និងការអភិវឌ្ឍតំបន់បឹងទន្លេសាប ឈានទៅដល់ការឯកភាពគ្នាលើគោលបំណង វិសាលភាព ពេលវេលា តួនាទី និងទំនួលខុសត្រូវរបស់គម្រោង ការប្រមូលធាតុចូលពីភាគីពាក់ព័ន្ធសំខាន់ៗរួមទាំងការកំណត់ទិន្នន័យ និងព័ត៌មានចាំបាច់ ដើម្បីធ្វើការវាយតម្លៃក៏ដូចជាការកសាង ការរួមបញ្ចូលគ្នាសម្រាប់សន្តិសុខទឹក និងភាពធន់នៅបឹងទន្លេសាប ដោយអនុលោមតាមផែនការចូលរួមរបស់គម្រោង ការពិគ្រោះយោបល់ជាបន្តបន្ទាប់ ការចែករំលែកផ្លាស់ប្តូរចំណេះដឹង និងត្រូវរៀបចំឡើងជាជំហានសំខាន់ៗ ក្រោមគម្រោងសម្រាប់កម្មវិធីសន្តិសុខទឹក និងភាពធន់នៃបឹងទន្លេសាប។

ក្នុងឱកាសនោះ ឯកឧត្តម ហ៊ែល តូនី អនុប្រធានក្តាប់រួមអាជ្ញាធរទន្លេសាប បានមានប្រសាសន៍ថា ទឹកនៅអាងទន្លេសាបគឺជាសម្បត្តិសម្រាប់មនុស្សជំនាន់នេះ និងអនាគត។ យើងនឹងធ្វើឱ្យអាងទន្លេសាបក្លាយជាគំរូនៃការគ្រប់គ្រងទឹកប្រកបដោយចីរភាព។ ការរួមចំណែករបស់យើងមិនត្រឹមតែជាកាតព្វកិច្ចប៉ុណ្តោះទេ គឺជាក្តីសង្ឃឹមសម្រាប់កូនជំនាន់ក្រោយ យើងនឹងមានទឹកគ្រប់គ្រាន់ និងមានសុវត្ថិភាព សម្រាប់ប្រើប្រាស់ប្រចាំថ្ងៃ និងជីវិតប្រកបដោយសុខដុម ។

សូមបញ្ជាក់ថា សិក្ខាសាលាដែលប្រព្រឹត្តទៅដោយជោគជ័យដោយមានកិច្ចសហការជាមួយ ធនាគារពិភពលោក (World Bank - WB) ក្រសួងកិច្ចការបរទេស និងពាណិជ្ជកម្មនៃប្រទេសអូស្ត្រាលី (DFAT) និងAustralian Water Partnership (AWP) ក្នុងការអនុវត្តកម្មវិធីវាយតម្លៃសន្តិសុខ និងភាពធន់នៃ បឹងទន្លេសាប សម្រាប់ឆ្នាំ២០២៤-២០២៦៕

ដោយ ណយ នឿន (ប្រភព៖ អាជ្ញាធរទន្លេសាប)