AKP ភ្នំពេញ ថ្ងៃទី១៩ ខែមីនា ឆ្នាំ២០២៥ -- ប្រាក់រង្វាន់លើកទឹកចិត្តរបស់រាជរដ្ឋាភិបាលកម្ពុជាចំនួន ៤ ៩៨៤ ៩០០ ០០០ រៀល (ប្រមាណ ១ ២៤៦ ២២៥ ដុល្លារអាមេរិក) ត្រូវបានប្រគល់ជូនដល់ម្ចាស់ជ័យលាភី ដែលដណ្តើមបានមេដាយមាស ប្រាក់ សំរឹទ្ធ នៅក្នុងការប្រកួតកីឡាសាកលវិទ្យាល័យអាស៊ីអាគ្នេយ៍ លើកទី២១ កីឡាសិស្សមធ្យមអាស៊ីអាគ្នេយ៍ លើកទី១៣ ជើងឯកកម្រិតពិភពលោក កម្រិតអាស៊ី និងកម្រិតអាស៊ីអាគ្នេយ៍ កាលពីឆ្នាំ២០២៣ និងឆ្នាំ២០២៤កន្លងមក។

ពិធីប្រគល់ទទួលនេះបានប្រារពធ្វើឡើង នៅមជ្ឈបណ្ឌលជាតិហ្វឹកហ្វឺនកីឡា នៅល្ងាចថ្ងៃទី១៩ ខែមីនា ឆ្នាំ២០២៥ ក្រោមអធិបតីភាព ឯកឧត្តម បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា។

ឯកឧត្តម ប៉ុន សុខ អគ្គនាយក នៃអគ្គនាយកដ្ឋានកីឡាជម្រាបជូនថា ប្រភេទកីឡា ដែលដណ្តើមបានមេដាយមានចំនួន ១១ប្រភេទ រួមមាន៖ កីឡាប៉េតង់ ការ៉ាតេ ចំបាប់ កាយសម្ព័ន្ធ កីឡាហែលទឹកពាក់ជើងទា កាយវប្បកម្ម យុទ្ធគុនចម្រុះ វ៉ូវីណាម ជឺជីតស៊ូ តេក្វាន់ដូ WT និងយូដូ ដែលដណ្តើមបានកីឡាករ កីឡាការិនីសរុបចំនួន ១៦៣នាក់ (កីឡាករ៩៦នាក់ និងកីឡាការិនី ៦៧នាក់) និងគ្រូបង្វឹក សរុប ៥៣ នាក់ គ្រូបង្វឹកធំ ២៥ នាក់ និងគ្រូជំនួយ ២៨នាក់ ដោយសរុបរួមទាំងកីឡាករ កីឡាការិនី គ្រូបង្វឹក និង  គ្រូជំនួយ សរុបរួម ២១៦នាក់។ ចំពោះថវិការាជរដ្ឋាភិបាល ដែលត្រូវបានផ្តល់ជូនម្ចាស់ជ័យលាភីជាការលើកទឹកចិត្តសរុបជាទឹកប្រាក់ចំនួន ៤ ៩៨៤ ៩០០ ០០០ រៀលគត់ បើគិតជាដុលារអាមេរិក សរុប ១ ២៤៦ ២២៥ ដុល្លារអាមេរិក។

ឯកឧត្តមបណ្ឌិតសភាចារ្យ ហង់ជួន ណារ៉ុន បានវាយតម្លៃខ្ពស់ និងថ្លែងអំណរគុណដល់កីឡាករ កីឡាការិនី និងគ្រូបង្វឹកទាំងអស់ ដែលបានប្រឹងប្រែងអស់កម្លាំងចិត្តប្រកួតដណ្តើមបានមេដាយជូនជាតិពីការប្រកួតកម្រិតអន្តរជាតិ។ ឯកឧត្តមបណ្ឌិតសភាចារ្យមានប្រសាសន៍ថា ការផ្តល់ការលើកទឹកចិត្តរបស់សម្តេចតេជោកន្លងមកនេះ គឺបានជួយទៅដល់ការលើកទឹកចិត្តឱ្យកីឡាករ កីឡាការិនីរបស់យើងខិតខំប្រឹងប្រែង ក្នុងនោះក្រសួងអប់រំ យុវជន និងកីឡាក៏បានដាក់ចេញនូវវិធានការកំណែទម្រង់កែលម្អរចនាសម្ព័ន្ធ និងផ្តល់ប្រាក់ឧបត្ថម្ភជូនដល់សហព័ន្ធកីឡាជាតិ ពិសេសផ្តល់ឱកាសដល់កីឡាករ កីឡាការិនីបានចេញទៅប្រកួតអន្តរជាតិទាំងក្នុងស្រុក និងក្រៅស្រុក។ ដូច្នេះទើបធ្វើឱ្យអត្តពលិកកម្ពុជាមានសមត្ថភាពដណ្តើមបានមេដាយច្រើន ដែលចំនួនមេដាយទទួលបាននេះ លើសថវិកាដែលក្រសួងអប់រំ យុវជន និងកីឡាមាន ទើបតម្រូវស្នើសុំបន្ថែមពីក្រសួងសេដ្ឋកិច្ច និងហិរញ្ញវត្ថុ ហើយថវិកាយូរបន្តិច ប៉ុន្តែគ្រប់ភាគីពាក់ព័ន្ធប្រឹងប្រែងពន្លឿន ដើម្បីផ្តល់ជូនម្ចាស់ជ័យលាភី។

ឯកឧត្តមឧបនាយករដ្ឋមន្ត្រីបានបញ្ជាក់ទៀតថា ប្រាក់រង្វាន់តែត្រូវបានផ្តល់ជូនម្ចាស់ជ័យលាភីទាំងអស់គឺការផ្តល់ជូនដោយមានតម្លាភាព ដោយផ្តល់តាមគណនេយ្យម្ចាស់ជ័យលាភីដោយផ្ទាល់ លើកលែងតែអ្នកដែលគ្មានគណនេយ្យ ឬបើកមិនទាន់។ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡាបានជំរុញឱ្យកីឡាករ កីឡាការិនីដែលទទួលបានជ័យលាភីសូមប្រឹងប្រែហ្វឹកហាត់ដុសខាតសមត្ថភាពបន្ថែម ដើម្បីត្រៀមការប្រកួតអន្តរជាតិនានា ពិសេសគឺស៊ីហ្គេម លើកទី៣៣ នៅប្រទេសថៃ នាចុងឆ្នាំ២០២៥ ។ ជាមួយគ្នានោះ ឯកឧត្តមក៏បានផ្តល់អនុសាសន៍បន្ថែមដល់ថ្នាក់ដឹកនាំសហព័ន្ធកីឡាជាតិត្រូវសម្លឹងមើល និងរៀបចំផែនការឱ្យបានល្អចំពោះអត្តពលិកថ្នាល ដោយត្រូវស្វែងរកធនធានថ្នាលមានសក្តានុពលយកមកហ្វឹកហាត់បំប៉ន ត្រៀមកីឡាយុវជនអាស៊ី ឆ្នាំ២០២៩ ដែលកម្ពុជាទទួលធ្វើជាម្ចាស់ផ្ទះ។

សូមបញ្ជាក់ថា ១១ប្រភេទកីឡានេះ ដណ្តើមបានមេដាយ គិតចាប់ពីឆ្នាំ២០២៣ និង២០២៤ ពីការប្រកួតកីឡាសាកលវិទ្យាល័យអាស៊ីអាគ្នេយ៍ លើកទី២១, កីឡាសិស្សមធ្យមអាស៊ីអាគ្នេយ៍លើកទី១៣, ជើងឯកពិភពលោក ជើងឯកអាស៊ី និងកម្រិតអាស៊ីអាគ្នេយ៍។ មេដាយសរុប ដែលដណ្តើមមានចំនួន ១៦០គ្រឿង  មេដាយមាស ៣១គ្រឿង ប្រាក់ ៤៩គ្រឿង និងមេដាយសំរឹទ្ធ ៨០គ្រឿង សរុបប្រាក់រង្វាន់លើកទឹកចិត្តរបស់រាជរដ្ឋាភិបាលកម្ពុជាមានចំនួន ៤ ៩៨៤ ៩០០ ០០០ រៀល ឬប្រហាក់ប្រហែល ១ ២៤៦ ២២៥ ដុល្លារអាមេរិក៕

ដោយ ហេង ណាលីន (រូបភាព៖ យឹម សុវឌ្ឍនា)