AKP សៀមរាប ថ្ងៃទី១៩ ខែមីនា ឆ្នាំ២០២៥--

អគ្គលេខាធិការដ្ឋានក្រុមប្រឹក្សាសកម្មភាពជនពិការ បានសហការជាមួយរដ្ឋបាលខេត្តសៀមរាប ដោយមានការគាំទ្រពីកម្មវិធី ACCESS2 និងUNDP នៅថ្ងៃទី១៩ ខែមីនា ឆ្នាំ២០២៥ បើកវគ្គបណ្តុះបណ្តាលស្តីពីហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលសម្រាប់ជនមានពិការភាព ជូនសមាជិកសមាជិកាក្រុមប្រឹក្សាសកម្មភាពជនពិការខេត្ត។

ឯកឧត្តម អ៊ុង សម្បត្តិ អគ្គលេខាធិការនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ  បានមានប្រសាសន៍ថា វគ្គបណ្តុះបណ្តាលថ្ងៃនេះនឹងជួយជំរុញដល់គ្រប់អ្នកពាក់ព័ន្ធ  សិក្សាស្វែងយល់អំពីបទដ្ឋានបច្ចេកទេសហេដ្ឋារចនាសម្ព័ន្ធរូបវន្តបង្កលក្ខណៈងាយស្រួល សម្រាប់ជន មានពិការភាព ជូនសមាជិកក្រុមប្រឹក្សាកម្មភាពជនពិការខេត្តដើម្បីយកទៅអនុវត្តក្នុងស្ថាប័នរបស់ខ្លួន។ លើកកម្ពស់ការគោរពសិទ្ធិ សេរីភាព លុបបំបាត់ការរើសអើង ជំរុញការអភិវឌ្ឍនិងធ្វើបរិយាបន្នជនមានពិការ ភាព ក្នុងការងារសេដ្ឋកិច្ច សង្គម វប្បធម៌ នយោបាយ ស្របតាមច្បាប់ស្តីពី កិច្ចការពារនិងលើកកម្ពស់សិទ្ធិ ជនពិការដែលជាគន្លឹះ ធានាការលើកកម្ពស់សិទ្ធិសេរីភាព សេចក្តីថ្លៃថ្នូរ និងគ្មានឧបសគ្គ។ជំរុញការអនុវត្តផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨និងបង្កើនការយល់ដឹងពីបរិយាបន្នពិការភាព។

សូមបញ្ជាក់ថា ខេត្តសៀមរាប មានជនមានពិការភាព ១៨,៦៧៧នាក់  ក្នុងនោះជនមានពិការភាព ៤,២២៥នាក់ មានប័ណ្ណសមធម៌។ ខេត្តសៀមរាបជាខេត្តដែលយកចិត្តទុកដាក់ និងទទួលបានលទ្ធផលល្អក្នុងកិច្ចការពារ និងលើកកម្ពស់សិទ្ធិជនពិការ បរិយាបន្នពិការភាព ការកំណត់អត្តសញ្ញាណកម្មតាមគំរូសង្គម និងសិទ្ធជាមូលដ្ឋាន ការជ្រើសរើសជនពិការចូលបម្រើការងារ សេវាស្តារលទ្ធភាពពលកម្មកាយសម្បទា មូលនិធិជនពិការ មានការចូលរួម សហការពីអង្គការក្រៅរដ្ឋាភិបាល  និងវិស័យឯកជនជាច្រើន៕

ដោយ ឃុត សៅ