AKP បន្ទាយមានជ័យ ថ្ងៃទី១៩ ខែមីនា ឆ្នាំ២០២៥-- 

វេទិកាពិគ្រោះយោបល់ជាមួយសមាគម អង្គការមិនមែនរដ្ឋាភិបាល និងសមាគមន៍ក្នុងខេត្តបន្ទាយមានជ័យ លើកទី១ ឆ្នាំ២០២៥ ក្រោមប្រធានបទ "ភាពជាដៃគូក្នុងការចូលរួមអភិវឌ្ឍន៍មូលដ្ឋានប្រកបដោយចីរភាព" បានប្រព្រឹត្តទៅយ៉ាងជោគជ័យនៅសាលប្រជុំ (ក) សាលាខេត្ត នៅថ្ងៃពុធ ទី១៩ ខែមីនា ឆ្នាំ២០២៥ ក្រោមអធិបតីភាពរបស់ឯកឧត្តម អ៊ុ រាត្រី អភិបាលខេត្តបន្ទាយមានជ័យ និងដោយមានការចូលរួមពីលោក លី សុវណ្ណារិទ្ធ អភិបាលរងខេត្ត ព្រមទាំងតំណាងមកពីតាមមន្ទីរអង្គភាព សមាគម អង្គការមិនមែនរដ្ឋាភិបាល និងសមាគមន៍នានាក្នុងខេត្តជាច្រើននាក់ ដោយវេទិកានេះត្រូវបានរៀបចំឡើងក្នុងគោលបំណងពង្រឹងកិច្ចសហប្រតិបត្តិការរវាងរដ្ឋបាលខេត្ត និងអង្គការសង្គមស៊ីវិល ដើម្បីរួមគ្នាដោះស្រាយបញ្ហាប្រឈម និងជំរុញការអភិវឌ្ឍមូលដ្ឋានប្រកបដោយចីរភាព។

ក្នុងឱកាសនោះ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានគូសបញ្ជាក់ពីសារៈសំខាន់នៃភាពជាដៃគូរវាងរដ្ឋបាលខេត្ត និងអង្គការសង្គមស៊ីវិលក្នុងការចូលរួមអភិវឌ្ឍន៍មូលដ្ឋាន និងបានថ្លែងថា រដ្ឋបាលខេត្តតែងតែចាត់ទុកអង្គការសង្គមស៊ីវិលជាដៃគូដ៏សំខាន់ក្នុងការអនុវត្តផែនការអភិវឌ្ឍន៍ខេត្ត។ វេទិកានេះគឺជាឱកាសដ៏ល្អដើម្បីយើងរួមគ្នាពិភាក្សា និងផ្លាស់ប្តូរយោបល់លើបញ្ហាប្រឈម និងដំណោះស្រាយនានា ដើម្បីជំរុញការអភិវឌ្ឍប្រកបដោយចីរភាពក្នុងខេត្តរបស់យើង។

ឯកឧត្តមអភិបាលខេត្តបានលើកទឹកចិត្តឱ្យអង្គការសង្គមស៊ីវិលបន្តចូលរួមយ៉ាងសកម្មក្នុងការអនុវត្តគម្រោងអភិវឌ្ឍន៍នានា ជាពិសេសក្នុងវិស័យអប់រំ សុខាភិបាល កសិកម្ម និងបរិស្ថាន និងបានសង្កត់ធ្ងន់លើការលើកកម្ពស់តម្លាភាព និងគណនេយ្យភាពក្នុងការអនុវត្តគម្រោង ដើម្បីធានាបាននូវប្រសិទ្ធភាព និងចីរភាព។

ទន្ទឹមនឹងនេះ តំណាងមកពីសមាគម អង្គការមិនមែនរដ្ឋាភិបាល បានកោតសរសើរចំពោះរដ្ឋបាលខេត្តដែលបានរៀបចំវេទិកាដ៏មានសារៈសំខាន់នេះ។ ពួកគេបានបង្ហាញពីការប្តេជ្ញាចិត្តក្នុងការបន្តកិច្ចសហប្រតិបត្តិការជាមួយរដ្ឋបាលខេត្ត ដើម្បីរួមចំណែកដល់ការអភិវឌ្ឍមូលដ្ឋាន។តំណាងអង្គការផ្សេងទៀតបានលើកឡើងពីបញ្ហាប្រឈមនានាដែលពួកគេកំពុងជួបប្រទះក្នុងការអនុវត្តគម្រោង និងបានស្នើសុំការគាំទ្រពីរដ្ឋបាលខេត្ត។

សូមបញ្ជាក់ថា វេទិកាពិគ្រោះយោបល់នេះបានបញ្ចប់ដោយជោគជ័យ ដោយមានការឯកភាពលើចំណុចសំខាន់ៗមួយចំនួន រួមមាន ការបង្កើតក្រុមការងារចម្រុះរវាងរដ្ឋបាលខេត្ត និងអង្គការសង្គមស៊ីវិល ដើម្បីតាមដាន និងវាយតម្លៃការអនុវត្តគម្រោងអភិវឌ្ឍន៍។ ការរៀបចំវេទិកាពិគ្រោះយោបល់ជាទៀងទាត់ ដើម្បីបន្តពង្រឹងកិច្ចសហប្រតិបត្តិការ។ការបង្កើតយន្តការសម្រាប់ចែករំលែកព័ត៌មាន និងបទពិសោធន៍រវាងរដ្ឋបាលខេត្ត និងអង្គការសង្គមស៊ីវិល។ វេទិកាពិគ្រោះយោបល់លើកទី១ ឆ្នាំ២០២៥ នេះបានបង្ហាញពីភាពជាដៃគូដ៏រឹងមាំរវាងរដ្ឋបាលខេត្ត និងអង្គការសង្គមស៊ីវិលក្នុងការចូលរួមអភិវឌ្ឍន៍មូលដ្ឋានប្រកបដោយចីរភាព។ នេះគឺជាជំហានដ៏សំខាន់មួយក្នុងការកសាងខេត្តបន្ទាយមានជ័យឱ្យកាន់តែរីកចម្រើន និងប្រកបដោយភាពរុងរឿង៕

ដោយ ឈុន សារ៉ាត