AKP ព្រះសីហនុ ថ្ងៃទី១៩ ខែមីនា ឆ្នាំ២០២៥-- 

ឯកឧត្តម សី វរិន អនុរដ្ឋលេខាធិការក្រសួងមហាផ្ទៃ លោក ឯម ភាព អភិបាលរងខេត្តព្រះសីហនុ លោក សុខ វណ្ណា ប្រធានកម្មវិធី UN-Habitat ប្រចាំព្រះរាជាណាចក្រកម្ពុជា បានអញ្ជើញបើកសិក្សាផ្សព្វផ្សាយផែនការសកម្មភាពទីក្រុងឆ្លាតសម្រាប់ខេត្តព្រះសីហនុ (២០២៤-២០២៨) និងយន្តការទីក្រុងឆ្លាតអាស៊ាន រយៈពេលពីរ គឺថ្ងៃទី១៧-១៨ ខែមីនា ឆ្នាំ២០២៥ នៅសណ្ឋាគារឯករាជ្យ ក្រុងព្រះសីហនុ ត្រូវបានបិទបញ្ចប់ប្រកបដោយបរិយាកាសរីករាយកាលពីថ្ងៃទី១៨ ខែមីនា ឆ្នាំ២០២៥។

លោក ឯម ភាព អភិបាលរងខេត្តព្រះសីហនុ បានស្វាគមន៍សិក្ខាសាលារៀបចំចក្ខុវិស័យទីក្រុងឆ្លាតខេត្តព្រះសីហនុ “ប្រែក្លាយខេត្តព្រះសីហនុ ជាខេត្តដែលប្រើប្រាស់បច្ចេកវិទ្យាឌីជីថល ដើម្បីជំរុញកំណើនសេដ្ឋកិច្ចដោយផ្តោតលើសុវត្ថិភាព និរន្តរភាព និងសុខុមាលភាពសម្រាប់ទាំងអស់គ្នា"។ គោលដៅនៃការបង្កើនសកម្មភាពពាណិជ្ជកម្ម និងលើកកម្ពស់កម្រិតជីវភាព ព្រមទាំងធានានិរន្តភាពបរិស្ថាន តាមរយៈការប្រើប្រាស់បច្ចេកវិទ្យាឌីជីថល ការពង្រឹងសេវាសាធារណៈ ការជំរុញកំណើនសេដ្ឋកិច្ច និងលើកកម្ពស់គុណភាពជីវិតរស់នៅរបស់ប្រជាពលរដ្ឋនៅក្នុងមូលដ្ឋាន។ ឯកសារស្ថាបត្យកម្មបច្ចេកទេស និងក្របខ័ណ្ឌអន្តរប្រតិបត្តិការទីក្រុងឆ្លាតវៃ ការរៀបចំផែនទីបង្ហាញផ្លូវទីក្រុងឆ្លាត ដោយផ្អែកលើស្ថាបត្យកម្មបច្ចេកទេស និងទស្សនទានទីក្រុងឆ្លាតក្រុងព្រះសីហនុផងដែរ  ថ្នាក់ដឹកនាំខេត្តព្រះសីហនុ បានយកចិត្តទុកដាក់យ៉ាងខ្លាំងចំពោះការរៀបចំ និងអភិវឌ្ឍហេដ្ឋារចនាសម្ព័ន្ធទីក្រុងព្រះសីហនុ ក៏ដូចជាការអភិវឌ្ឍតំបន់ឆ្នេរ ការគាំពារបរិស្ថាន និងការរៀបចំក្រុងព្រះសីហនុ ជាទីក្រុងឆ្លាតវៃនាពេលខាងមុខផងដែរ។

ក្នុងឱកាសនោះ ឯកឧត្តម សី វរិន អនុរដ្ឋលេខាធិការក្រសួងមហាផ្ទៃ មានប្រសាសន៍ថា ក្រោមគំនិតផ្តួចផ្តើមពីអង្គការ UN ប្រចាំកម្ពុជា អង្គការ UN-Habitat និងកម្មវិធី 3i របស់ស្ថានទូតអូស្ត្រាលី បានផ្តួចផ្តើមដំណាក់កាលដំបូងនៃការរៀបចំ និងអភិវឌ្ឍទីក្រុងឆ្លាតសម្រាប់ខេត្តព្រះសីហនុ តាមរយៈការផ្តល់ជំនួយបច្ចេកទេស (ទីប្រឹក្សា) ដើម្បីគាំទ្រដល់ការអនុវត្តការងាររដ្ឋបាលខេត្ត បានបង្កើតក្រុមការងារសិក្សាបឋម និងរៀបចំយុទ្ធសាស្ត្រអភិវឌ្ឍន៍ទីក្រុងឆ្លាតវៃសម្រាប់ក្រុងព្រះសីហនុ ដែលដឹកនាំ ដោយលោក គង់ វិតាណៈ អតីតអភិបាលរងខេត្ត ហើយបានធ្វើបច្ចុប្បន្នភាពជាបន្តបន្ទាប់រហូតមកដល់ឆ្នាំ២០២៥នេះ។ ឆ្នាំ២០២៤ គណៈកម្មការសម្របសម្រួល នឹងដឹកនាំការងារទីក្រុងឆ្លាត នៃក្រសួងមហាផ្ទៃ ដោយមានការគាំទ្រពីអង្គការដៃគូនានា និងលេខាធិការដ្ឋានទីក្រុងឆ្លាតអាស៊ាន បានជួយរៀបចំឯកសារសម្រាប់ការដាក់ពាក្យបេក្ខភាពក្រុងព្រះសីហនុ ជាសមាជិកបណ្តាញទីក្រុងឆ្លាតអាស៊ាន និងត្រូវបានប្រកាសជាផ្លូវការ ក្នុងកិច្ចប្រជុំបណ្តាញទីក្រុងឆ្លាតអាស៊ានលើកទី៧ កាលពីថ្ងៃទី៣០ ខែកក្កដា ឆ្នាំ២០២៤ ថ្មីៗកន្លងមកនៅទីក្រុងហ្លួងព្រះបាងនៃសាធារណរដ្ឋប្រជាធិបតេយ្យប្រជាមានិតឡាវ។

ឯកឧត្តមបានបន្តទៀតថា ទិសដៅសកម្មភាពការងារសម្រាប់ឆ្នាំ២០២៥ បន្ទាប់ពីផែនការសកម្មភាពទីក្រុងឆ្លាតសម្រាប់ខេត្តព្រះសីហនុ ឆ្នាំ២០២៤-២០២៨ ត្រូវបានអនុម័តក្នុងកិច្ចប្រជុំក្រុមការងារទីក្រុងឆ្លាតកាលពីថ្ងៃទី៤ ខែធ្នូ ឆ្នាំ២០២៤។ គម្រោងសកម្មភាពចំនួន២ ត្រូវបានជ្រើសរើសម្រាប់អនុវត្តក្នុងឆ្នាំ២០២៥ ក្រោមការគាំទ្រដោយអង្គការ UN-Habitat គឺ៖ ១. ពង្រឹងការអប់រំផ្សព្វផ្សាយដល់ប្រជាពលរដ្ឋ និងរៀបចំប្រព័ន្ធតាម ដានការប្រមូលសំរាមក្នុងក្រុងព្រះសីហនុ និង២. ការអភិវឌ្ឍសមត្ថភាពមន្ត្រីពាក់ព័ន្ធ ក្នុងការគ្រប់គ្រងទិន្នន័យកាម៉េរាឆ្លាតវៃ៕

ដោយ ងូ សុមុនី