AKP តាកែវ ថ្ងៃទី១៩ ខែមីនា ឆ្នាំ២០២៥--

នៅសាលាគរុកោសល្យភូមិភាគ និងវិក្រឹតការខេត្តតាកែវ បានរៀបចំការប្រឡងចូលរៀនពុទ្ធិកមធ្យមសិក្សាបឋមភូមិទាំង៤ខេត្ត រួមមាន៖ ខេត្តតាកែវ ខេត្តកំពត ខេត្តកំពង់ស្ពឺ និងខេត្តព្រះសីហនុ កាលពីថ្ងៃអង្គារ ទី១៨ ខែមីនា ឆ្នាំ២០២៥ ដោយមានការនិមន្ត និងអញ្ជើញចូលរួមកាត់ស្រោមវិញ្ញាសាប្រឡង ដោយព្រះឧបាលិវង្ស កែវ សាវ៉ន ព្រះមង្គលទិព្វលោករង្សី ព្រះមេគណខេត្តតាកែវ លោកស្រី គា សុភូ អភិបាលរងខេត្តតាកែវ លោក ជួង វ៉ាន ប្រធានមន្ទីរធម្មការ និងសាសនាខេត្តតាកែវ ព្រមទាំងមានការនិមន្ត និងអញ្ជើញចូលរួមពីព្រះសង្ឃ និងមន្ត្រីជាគណៈមេប្រយោគទាំង៤ខេត្តចូលរួមផងដែរ។

ព្រះឧបាលិវង្ស កែវ សាវ៉ន ព្រះមង្គលទិព្វលោករង្សី ព្រះមេគណខេត្តតាកែវ បានធ្វើការណែនាំទៅដល់បេក្ខសាមណសិស្ស ដែលបានចូលរួមប្រឡងទាំងអស់ ត្រូវតែខិតខំប្រឹងប្រែងក្នុងការប្រឡង។ត្រូវគោរពឲ្យខាងតែបានចំពោះបទបញ្ជាផ្ទៃក្នុងនៃការប្រឡង ជៀសវាងការបង្កភាពអាណាធិបតេយ្យនៅក្នុងបន្ទប់ប្រឡង និងបានមានថេរដីកាបន្តថា ដើម្បីធានាបាននូវប្រសិទ្ធភាពក្នុងការប្រឡង បេក្ខសមណសិស្សត្រូវខិតខំប្រឹងប្រែង និងបញ្ចេញឱ្យអស់ពីសមត្ថភាពដែលខ្លួនមាន ហើយពិសេសត្រូវរក្សាឱ្យបាននូវសណ្ដាប់ធ្នាប់ក្នុងពេលប្រឡង មិនត្រូវបង្កភាពរញ៉េរញ៉ៃដោយលួចចម្លងគ្នា ឬយកព្រុយយ៉ុងចូលក្នុងបន្ទប់ប្រឡងឡើយ និងមិនត្រូវដើរឆ្លងកាត់ពីតុមួយទៅតុមួយទៀតនោះទេ។ ពោលគឺធ្វើយ៉ាងណាត្រូវគោរពឱ្យបានជាដាច់ខាត និងអនុវត្តឱ្យបានល្អនូវបទបញ្ជាផ្ទៃក្នុងរបស់មណ្ឌលប្រឡង។ ប្រសិនបើមានបេក្ខសមណសិស្សអង្គណាប្រព្រឹត្តផ្ទុយនឹងបទបញ្ជា នឹងត្រូវធ្លាក់ដោយស្វ័យប្រវត្តិ។

ព្រះមេគណខេត្តតាកែវបានបញ្ជាក់ថា ការប្រឡងចូលរៀនពុទ្ធិកមធ្យមសិក្សាបឋមភូមិនាពេលនេះ គឺជាការរួមចំណែកយ៉ាងសំខាន់ ក្នុងការបណ្ដុះបណ្ដាលធនធានមនុស្សក្នុងជួរព្រះសង្ឃ និងលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋឱ្យកាន់តែរីកចម្រើន ជាពិសេសនឹងមានសេចក្ដីថ្លៃថ្នូរជូនជាតិមាតុភូមិ ព្រោះព្រះពុទ្ធសាសនាជាមូលដ្ឋានគ្រឹះនៃចរិយាធម៌ គុណធម៌ សីលធម៌ និងការពង្រឹងនូវគុណភាពលើអភិបាលកិច្ចគ្រប់លំដាប់ថ្នាក់ ដើម្បីឱ្យកិច្ចការពុទ្ធសាសនាមានសណ្ដាប់ធ្នាប់ល្អ ធានាបាននូវការសាមគ្គីភាពក្នុងជួរពុទ្ធសាសនិកជន។

សម្រាប់ការប្រឡងចូលរៀនពុទ្ធិកមធ្យមសិក្សាបឋមភូមិទាំង៤ខេត្ត គឺខេត្តតាកែវ ខេត្តកំពត ខេត្តកំពង់ស្ពឺ និងខេត្តព្រះសីហនុ នៅពេលនេះមានបេក្ខសមណសិស្សប្រឡងសរុបចំនួន២២៨អង្គ/នាក់ ចែកចេញជា១១បន្ទប់។ ដោយឡែកសម្រាប់ការរៀបចំ និងទំនុកបម្រុងចង្ហាន់និងភេសជ្ជៈប្រគេនបេក្ខសមណសិស្សប្រឡងទាំងអស់ ដោយព្រះញាណសោភ័ណ យន វាសនា ព្រះបាឡាត់គណខេត្តតាកែវ និងជាព្រះចៅអធិការវត្តសីហរតនារាម និងពុទ្ធបរិស័ទជិតឆ្ងាយជាច្រើនរូបជួយឧបត្ថម្ភទំនុកបម្រុងផងដែរ៕

ដោយ អ៊ុច សៀង