AKP កំពង់ធំ ថ្ងៃទី១៩ ខែមីនា ឆ្នាំ២០២៥-- លោក ជា វ៉ាន់ចាន់ អភិបាលរងខេត្តកំពង់ធំ កាលពីរសៀលថ្ងៃទី១៨ ខែមីនា ឆ្នាំ២០២៥ បានដឹកនាំកិច្ចប្រជុំត្រៀមរៀបចំស្តង់ពិព័រណ៍បង្ហាញពីសមិទ្ធផលនានារបស់ខេត្តកំពង់ធំ ជាពិសេសគម្រោងអភិវឌ្ឍន៍ទេសចរណ៍តំបន់សក្តានុពលផលិតផលសេវាកម្មទេសចរណ៍ក្នុងព្រឹត្តិការណ៍បុណ្យទន្លេលើកទី៩ នៅខេត្តតាកែវ ដោយមានការអញ្ជើញចូលរួមពីលោកលោកស្រីប្រធាន អនុប្រធានមន្ទីរអង្គភាពពាក់ព័ន្ធ។

ក្នុងកិច្ចប្រជុំនោះ លោក ជា វ៉ាន់ចាន់ បានបញ្ជាក់ថាពិធីបុណ្យទន្លេក្នុងខេត្តតាកែវ គឺចាប់ពីថ្ងៃទី២១ ដល់ថ្ងៃទី២៣ ខែមីនា ឆ្នាំ២០២៥ និងបានណែនាំដល់សមាជិកអនុគណៈកម្មការត្រូវសម្រិតសម្រាំងជ្រើសយកផលិតផលដែលជាសក្តានុពលរបស់ខេត្តមកដាក់តាំងកុំឱ្យខ្វះចន្លោះពិសេសផ្លែឈើសម្គាល់ភូមិសាស្ត្រខេត្តកំពង់ធំ "ស្វាយចន្ទី"។

ទន្ទឹមនឹងនេះ លោកអភិបាលរងខេត្តបានបន្តទៀតថា ក្រុមរៀបចំស្លាយត្រូវជ្រើសរើសរូបថតស្តីពីសមិទ្ធផលគ្រប់វិស័យធនធានដែលខេត្តមាននិងសមិទ្ធផលថ្មីៗក្នុងខេត្តសម្រាប់បញ្ចាំងបង្ហាញជូនទស្សនិកជនទូទៅ៕

ដោយ ស៊ុម វណ្ណា