AKP ភ្នំពេញ ថ្ងៃទី១៩ ខែមីនា ឆ្នាំ២០២៥-- លោក ហូរីណូជី ហ៊ីដេហ៊ីសា សមាជិកតុលាការអន្តរជាតិសម្រាប់ច្បាប់សមុទ្រ បានថ្លែងថា កម្ពុជាទទួលបានអត្ថប្រយោជន៍យ៉ាងសំខាន់ពីការផ្តល់សច្ចាប័នលើអនុសញ្ញាអង្គការសហប្រជាជាតិស្តីពីច្បាប់សមុទ្រ  ដែលជាវិធានការក្នុងការជួយពង្រឹងអភិបាលកិច្ចដែនសមុទ្រ និងកិច្ចសហប្រតិបត្តិការក្នុងតំបន់ ហើយថាប្រទេសជិតខាងរបស់កម្ពុជា និងរដ្ឋជាសមាជិកអាស៊ានសុទ្ធតែជាសមាជិកនៃអនុសញ្ញាអង្គការសហប្រជាជាតិស្តីពីច្បាប់សមុទ្រ តែកម្ពុជាមិនមែនជាសមាជិកនៃអនុសញ្ញានេះនោះទេ។ ដូច្នេះ ដើម្បីឆ្លងកាត់កិច្ចសហប្រតិបត្តិការលើសមុទ្រ ដូចជា នេសាទ រ៉ែ សារធាតុកាបូន ទៅជាកិច្ចសហប្រតិបត្តិការ លោកគិតថា ជាការប្រសើរដែលកម្ពុជាចូលរួមក្នុងអនុសញ្ញាមួយនេះ ដែលនឹងផ្តល់មូលដ្ឋានគ្រឹះសម្រាប់កិច្ចសហប្រតិបត្តិការដែនសមុទ្រ។ ការបញ្ជាក់របស់លោក ហូរីណូជី ហ៊ីដេហ៊ីសា ដូចនេះបានធ្វើឡើងក្នុងវេទិកាស្តីពីការវិវត្តនៃអនុសញ្ញាអង្គការសហប្រជាជាតិស្តីពីច្បាប់សមុទ្រឆ្ពោះទៅរកកិច្ចសហប្រតិបត្តិការដែនសមុទ្រ ក្រោមការសហការរៀបចំដោយមជ្ឈមណ្ឌលកម្ពុជាសម្រាប់ការសិក្សាថ្នាក់តំបន់ និងស្ថានទូតជប៉ុនប្រចាំកម្ពុជានៅសណ្ឋាគារឡឺរ៉ូយ៉ាល់ កាលពីថ្ងៃទី១៨ ខែមីនា ឆ្នាំ២០២៥។

លោក ហូរីណូជី ហ៊ីដេហ៊ីសា បានសង្កត់ធ្ងន់ពីសារៈសំខាន់នៃប្រទេសកម្ពុជាក្នុងការចូលរួមជាមួយសមភាគីអាស៊ានរបស់ខ្លួនក្នុងការអនុម័តទាំងស្រុងនូវអនុសញ្ញាអង្គការសហប្រជាជាតិស្តីពីច្បាប់សមុទ្រដើម្បីទទួលបានសិទ្ធិ និងយន្តការសហប្រតិបត្តិការលើដែនសមុទ្ររបស់ខ្លួន។ លោកបានបន្តថា ទោះបីជាប្រទេសកម្ពុជាបានចូលជាហត្ថលេខីនៃអនុសញ្ញាអង្គការសហប្រជាជាតិស្តីពីច្បាប់សមុទ្រតាំងពីឆ្នាំ១៩៨៣មកក៏ដោយ ក៏សភារបស់កម្ពុជាមិនទាន់បានផ្តល់សច្ចាប័នលើអនុសញ្ញានេះនៅឡើយ ដែលបានចូលជាធរមានក្នុងឆ្នាំ១៩៩៤ សម្រាប់រដ្ឋដែលបានផ្តល់សច្ចាប័ន ឬយល់ព្រម ដោយបានគូសបញ្ជាក់ថា ការចូលជាសមាជិកនៃអនុសញ្ញាអង្គការសហប្រជាជាតិស្តីពីច្បាប់សមុទ្រនឹងផ្តល់នូវក្របខ័ណ្ឌច្បាប់ដ៏សំខាន់មួយសម្រាប់កិច្ចព្រមព្រៀងនាពេលអនាគតស្តីពីជលផល និងការរុករកប្រេង។

លោក ហូរីណូជី ហ៊ីដេហ៊ីសា បានបន្ថែមថា វានឹងបម្រើប្រទេសកម្ពុជាយ៉ាងច្រើនក្នុងការចូលជាសមាជិកនៃអនុសញ្ញាអង្គការសហប្រជាជាតិស្តីពីច្បាប់សមុទ្រនេះ ហើយថាវាមិនមានគុណវិបត្តិក្នុងការផ្តល់សច្ចាប័ន ឬបញ្ចប់អនុសញ្ញានេះនោះទេ។

ដោយឡែក លោក ពូ សុធីរៈ ទីប្រឹក្សាជាន់ខ្ពស់មជ្ឈមណ្ឌលកម្ពុជាសម្រាប់ការសិក្សាថ្នាក់តំបន់បានសង្កត់ធ្ងន់ទៅលើការប្រកួតប្រជែងភូមិសាស្ត្រនយោបាយដែលកំពុងកើនឡើងក្នុងចំណោមមហាអំណាចធំៗ និងការកើនឡើងនូវចំណុចសំខាន់ៗនៃដែនសមុទ្រ និងបានគូសបញ្ជាក់ថា ក្របខណ្ឌច្បាប់អន្តរជាតិដូចជាអនុសញ្ញាអង្គការសហប្រជាជាតិស្តីពីច្បាប់សមុទ្រនេះជាដើម គឺមានសារៈសំខាន់ណាស់សម្រាប់ការដោះស្រាយវិវាទដោយសន្តិវិធី ជាពិសេសទាក់ទងនឹងការទាមទារដែនដី និងដែនសមុទ្រត្រួតស៊ីគ្នា និងការគ្រប់គ្រងប្រកបដោយនិរន្តរភាពនៃធនធានសមុទ្រ។ លោកថា ច្បាប់សមុទ្រគឺជាធាតុផ្សំដ៏សំខាន់នៃច្បាប់អន្តរជាតិ ដែលដែនសមុទ្រជាវេទិកាសម្រាប់រដ្ឋនានាក្នុងការគ្រប់គ្រងការប្រព្រឹត្តរបស់ខ្លួនដោយផ្អែកលើគោលការណ៍ច្បាប់ដែលបានបង្កើតឡើង ធានានូវកិច្ចសហប្រតិបត្តិការ និងការគោរពគ្នាទៅវិញទៅមកក្នុងការប្រើប្រាស់សមុទ្រ៕

ដោយ៖ ចាន់ សុភឿន