AKP កំពង់ឆ្នាំង ថ្ងៃទី១៨ ខែមីនា ឆ្នាំ២០២៥ -- ឯកឧត្តម ម៉ែន ធឿន សមាជិកក្រុមប្រឹក្សាខេត្តកំពង់ឆ្នាំង បានអញ្ជើញចូលរួមកិច្ចប្រជុំស្តីពីវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ស្តីពី “កំណែទម្រង់វិមជ្ឈការ និងវិសហមជ្ឈការ សម្រេចបានចក្ខុវិស័យកម្ពុជាឆ្នាំ២០៥០”  តាមរយៈប្រព័ន្ធ ZOOM នៅសាលប្រជុំសាលាខេត្តកំពង់ឆ្នាំង នាថ្ងៃទី១៨ ខែមីនា ឆ្នាំ២០២៥ ក្រោមអធិបតីភាពរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយមានការអញ្ជើញចូលរួមពីលោក យិន សាវ៉េន អភិបាលរងខេត្ត រួមជាមួយឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត មន្ទីរអង្គភាពពាក់ជុំវិញខេត្តជាច្រើននាក់ផងដែរ។

ក្នុងឱកាសនោះ ឯកឧត្តម ម៉ែន ធឿន សមាជិកក្រុមប្រឹក្សាខេត្តកំពង់ឆ្នាំង បានមានប្រសាសន៍ថា នេះជាមោទនភាពមួយរបស់ខេត្តកំពង់ឆ្នាំង ប្រណិតភាពថ្មីរវាងរាជរដ្ឋាភិបាលនិងរដ្ឋបាលថ្នាក់ក្រោមជាតិ គឺជាកិច្ចការថ្មីមួយសម្រាប់យើងទាំងអស់គ្នា ជាពិសេសនៅក្នុងអាណត្តិថ្មីរបស់រាជរដ្ឋាភិបាល អាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចតែងតែផ្តល់ការគាំទ្រ និងជំរុញដល់ការងារកំណែទម្រង់វិមជ្ឈការ និងវិសហមជ្ឈការ ធ្វើយ៉ាងណាឱ្យកំណែទម្រង់នេះបានប្រែក្លាយកាន់តែមុតស្រួច និងស៊ីជម្រៅ ដើម្បីចូលរួមសម្រេចឱ្យបាននូវគោលដៅអភិវឌ្ឍន៍កម្មវិធីនយោបាយរបស់រាជរដ្ឋាភិបាលអាណត្តិទី៧ និងផែនការយុទ្ធសាស្ត្របញ្ចកោណដំណាក់ទី១ របស់រាជរដ្ឋាភិបាល។

ជាមួយគ្នានេះដែរ ឯកឧត្តមប្រធានក្រុមប្រឹក្សាបានជំរុញដល់មន្ត្រីទាំងអស់ឱ្យបន្តរួមចំណែកអនុវត្តតួនាទី ភាកិច្ចរបស់ខ្លួនដើម្បីសម្រេចបាននូវលទ្ធផលក្នុងសមាសភាគទាំង៥ នៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ ដែលយើងបានផ្តោតសំខាន់ការបង្កើន ស្តង់ដារផ្តល់សេវាសាធារណៈ ការអភិវឌ្ឍមូលដ្ឋានការអនុវត្តមុខងារដែលបានផ្ទេរឱ្យមានគុណភាព និងបង្កើន ការប្រាស្រ័យទាក់ទងជាសាធារណៈតាមបណ្តាញសង្គម (ឌីជីថល) ឱ្យមានប្រសិទ្ធភាព តម្លាភាព គណនេយ្យភាពបរិយាបន្ន និងសមធម៌សង្គម។ តាមរយៈការអនុវត្តមុខងារជាជម្រើស និងមុខងារជាកាតព្វកិច្ចឆ្លើយតបទៅនឹង តម្រូវការរបស់ប្រជាពលរដ្ឋក្នុងខេត្តកំពង់ឆ្នាំង ដើម្បីចូលរួមសម្រេចបានចក្ខុវិស័យកម្ពុជានាឆ្នាំ២០៥០៕

ដោយ បៃ ស៊ីថុន