AKP ភ្នំពេញ ថ្ងៃទី១៧ ខែមីនា ឆ្នាំ២០២៥-- ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងារអភិវឌ្ឍន៍សហគមន៍ជនបទតាមរយៈការអភិវឌ្ឍ “ភូមិគំរូ” នៅក្នុងប្រទេសកម្ពុជា នារសៀលថ្ងៃចន្ទ ទី១៧ ខែមីនា ឆ្នាំ២០២៥ នៅទីស្ដីការក្រសួង ដោយមានការអញ្ជើញចូលរួមពីឯកឧត្តមរដ្ឋលេខាធិការប្រចាំការ ឯកឧត្តមរដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រធាននាយកដ្ឋាន ថ្នាក់ដឹកនាំ ព្រមទាំងមន្ដ្រីរាជការជំនាញនៃនាយកដ្ឋានអភិវឌ្ឍន៍សហគមន៍ និងលោក លោកស្រីប្រធានមន្ទីរអភិវឌ្ឍន៍ជនបទទាំង ២៥ រាជធានី ខេត្ត។

លោក អឿន ធារិទ្ធ ប្រធាននាយកដ្ឋានអភិវឌ្ឍន៍សហគមន៍ បានធ្វើបទបង្ហាញស្ដីពីលទ្ធផលផ្ទៀងផ្ទាត់ការវាយតម្លៃលក្ខណៈសម្បត្តិ “ភូមិគំរូគន្លឹះ” ឆ្នាំ២០២៥ ដោយផ្អែកលើលក្ខណៈវិនិច្ឆ័យទាំង ៥ចំណុចដែលបានកំណត់ រួមមាន៖ សេដ្ឋកិច្ច សង្គម និងវប្បធម៌ សុខភាព និងបរិស្ថានរស់នៅ ហេដ្ឋារចនាសម្ព័ន្ធ និងអភិបាលកិច្ច។

តាមរយៈបទបង្ហាញ ឯកឧត្តម ឆាយ ឫទ្ធិសែន បានថ្លែងអំណរគុណចំពោះថ្នាក់ដឹកនាំ មន្ដ្រីជំនាញ និងប្រធានមន្ទីរទាំងអស់ ដែលបានខិតខំបំពេញការងារឱ្យសម្រេចបានលទ្ធផលល្អប្រសើរ និងបានមានប្រសាសន៍ថា ក្នុងនីតិកាលទី៧នៃរដ្ឋសភា ក្រសួងបានដាក់ចេញជាផែនការសម្រាប់អភិវឌ្ឍភូមិគំរូឱ្យបានចំនួន២៣០ភូមិ ដោយគិតចាប់ពីឆ្នាំ២០២៥ ដល់ឆ្នាំ២០២៨ ដោយបច្ចុប្បន្ន ក្រសួងបាន និងកំពុងអនុវត្តភូមិគំរូចំនួន៦៤ភូមិរួចហើយ ហើយក្រសួងនឹងជ្រើសរើសភូមិដែលមានសក្ដានុពល ដើម្បីអភិវឌ្ឍឱ្យក្លាយជាភូមិគំរូគន្លឹះឱ្យបានចំនួន៥០ភូមិ ក្នុងមួយឆ្នាំ។

ជាមួយគ្នានោះដែរ ឯកឧត្តមរដ្ឋមន្រ្តីក៏បានណែនាំថ្នាក់ដឹកនាំ និងមន្ដ្រីជំនាញទាំងអស់ ឱ្យបន្ដយកចិត្តទុកដាក់ដល់ភូមិគំរូដែលបានឱ្យអភិវឌ្ឍរួច ឱ្យរក្សានិរន្ដរភាព និងត្រូវយកចិត្តទុកដាក់ខ្ពស់ក្នុងការអភិវឌ្ឍភូមិគំរូគន្លឹះបន្ថែមទៀតឱ្យទទួលបានជោគជ័យ ក្នុងគោលដៅចូលរួមចំណែកអនុវត្តនូវយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល លើការរៀបចំ “ចលនាភូមិគំរូ” ឱ្យទទួលបានជោគជ័យ៕

ដោយ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)