AKP កំពង់ស្ពឺ ថ្ងៃទី១៧ ខែមីនា ឆ្នាំ២០២៥-- ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ តំណាងដ៏ខ្ពង់ខ្ពស់របស់ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ អញ្ជើញជាអធិបតីក្នុងកម្មវិធីពិនិត្យ និងព្យាបាលជំងឺដោយឥតគិតថ្លៃជូនប្រជាពលរដ្ឋនៅភូមិសាស្ត្រឃុំព្រៃវិហារ ស្រុកគងពិសី ខេត្តកំពង់ស្ពឺ កាលពីថ្ងៃទី១៦ ខែមីនា ឆ្នាំ២០២៥ ដោយមានការអញ្ជើញចូលរួមពីឯកឧត្តម យឹម សុខុម ប្រធានក្រុមប្រឹក្សាខេត្តកំពង់ស្ពឺ ឯកឧត្តម ជួន វន និងឯកឧត្តមបណ្ឌិត ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ប្រធានសម្ព័ន្ធគ្រូពេទ្យសហភាពសហព័ន្ធយុវជនកម្ពុជា ក្រុមការងារចុះជួយស្រុក និងឃុំ វេជ្ជបណ្ឌិត លោកគ្រូពេទ្យ អ្នកគ្រូពេទ្យ និងក្រុមការងារសម្ព័ន្ធគ្រូពេទ្យ ស.ស.យ.ក.និងប្រជាពលរដ្ឋយ៉ាងច្រើនកុះករ។

ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានបង្ហាញសេចក្តីសប្បាយរីករាយដែលបានមកចូលរួមជាមួយលោក លោកស្រី បងប្អូនប្រជាពលរដ្ឋ ជាពិសេសក្រុមសម្ព័ន្ធគ្រូពេទ្យសហភាពសហព័ន្ធយុវជនកម្ពុជាទាំងអស់ ក្នុងកម្មវិធីពិនិត្យ និងព្យាបាលជំងឺដោយឥតគិតថ្លៃជូនបងប្អូនប្រជាពលរដ្ឋនៅឃុំព្រៃវិហារ ស្រុកគងពិសី។

ទន្ទឹមនឹងនេះ ឯកឧត្តមបានកោតសរសើរ និងថ្លែងអំណរគុណចំពោះក្រុមការងារសម្ព័ន្ធគ្រូពេទ្យសហភាព សហព័ន្ធយុវជនកម្ពុជាទាំងអស់ ដែលបានលះបង់ទាំងពេលវេលា កម្លាំងកាយចិត្ត ស្មារតី និងថវិកា ដើម្បីចុះមកធ្វើការពិនិត្យ និងព្យាបាលជំងឺជូនប្រជាពទាំងអស់ ក្នុងថ្ងៃនេះ ព្រមទាំងបានអំពាវដល់ពុកម៉ែ បងប្អូន ប្រជាពលរដ្ឋឱ្យបន្តយកចិត្តទុកដាក់ចំពោះសុខភាពផ្ទាល់ខ្លួន ជាពិសេសជំងឺរាតត្បាតផ្សេងៗ ដោយឯកឧត្តមបានផ្សារភ្ជាប់អំពីសារៈសំខាន់នៃវិធានការអនាម័យបីយ៉ាងរបស់ក្រសួងសុខាភិបាលគឺ ហូបស្អាត ផឹកស្អាត និងរស់នៅស្អាត។

ជាមួយគ្នានេះដែរ ឯកឧត្តមបណ្ឌិតអភិបាលខេត្តលើកទឹកចិត្តដល់កសិករទូទាំងខេត្តកំពង់ស្ពឺចូលរួមបង្កើតសហគមន៍កសិកម្មទំនើប និងខិតខំបង្កើនការដាំដុះបន្លែបង្កា ដំណាំរួមផ្សំផ្សេងៗ និងធ្វើស្រែបង្កើនរដូវដើម្បីទ្រទ្រង់ជីវភាពប្រចាំថ្ងៃ មួយវិញទៀតបើការដាំដុះ និងការងារបង្កបង្កើនផលជួបប្រទះផលប៉ះពាល់នូវបញ្ហាប្រឈមផ្សេងៗ បងប្អូនអាចជួបពិគ្រោះជាមួយមន្ត្រីកសិកម្មឃុំ សង្កាត់ ឱ្យជួយដោះស្រាយបាន៕

ដោយ លឹម សាន្ត