AKP ភ្នំពេញ ថ្ងៃទី១៥ ខែមីនា ឆ្នាំ២០២៤ -- ឯកឧត្ដម ឡាំ ជា រដ្ឋមន្រ្ដីទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការអន្ដរក្រសួង បានអញ្ជើញដឹកនាំកិច្ចប្រជុំគណៈកម្មការអន្ដរក្រសួងដើម្បីស្តាប់របាយការណ៍វឌ្ឍនភាព ការសិក្សា និងការពិភាក្សាទៅលើការដោះស្រាយបញ្ហាបាក់ច្រាំងទន្លេបាសាក់ និងព្រែកជ្រៃធំនៅតាមបណ្ដោយព្រំដែនកម្ពុជា-វៀតណាម នៅបន្ទប់ប្រជុំខេត្ដសៀមរាបនៃទីស្ដីការក្រសួងមហាផ្ទៃ កាលពីព្រឹកថ្ងៃទី១៤ ខែមីនា  ឆ្នាំ២០២៥ ដោយមានការអញ្ជើញចូលរួមពីសំណាក់ឯកឧត្តម រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង លោក លោកស្រី សមាជិកនៃគណៈកម្មការអន្តរក្រសួង និងក្រុមជំនួយការសរុបចំនួន ៤៨រូប។

ឯកឧត្ដមរដ្ឋមន្ត្រី បានមានមតិសំណេះសំណាលស្វាគមន៍ ចំពោះវត្តមានឯកឧត្តម លោក លោកស្រីទាំងអស់ ព្រមទាំងបានថ្លែងអំណរគុណចំពោះការចំណាយពេលវេលាអញ្ជើញចូលរួមកិច្ចប្រជុំក្នុងការតាមដាន ពិនិត្យវឌ្ឍនភាព ពិភាក្សា និងកំណត់ផែនការងារអាទិភាពចំពោះមុខរបស់គណៈកម្មការអន្ដរក្រសួង ដើម្បីជាមូលដ្ឋានសម្រាប់ការរៀបចំអនុវត្ដផែនការការងារថ្មីៗបន្ថែមទៀត។
មុននឹងឈានដល់កិច្ចពិភាក្សា ឯកឧត្ដមរដ្ឋមន្រ្ដី បានអនុញ្ញាតឱ្យឯកឧត្ដម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ ធ្វើសេចក្តីរាយការណ៍ជូនអង្គប្រជុំអំពីវឌ្ឍនភាពការងារជារួមពាក់ព័ន្ធនឹងដំណើរការនៃការដោះស្រាយបញ្ហាបាក់ច្រាំងទន្លេបាសាក់ និងព្រែកជ្រៃធំនៅតាមបណ្ដោយព្រំដែនកម្ពុជា-វៀតណាម។

ព្រមជាមួយគ្នានេះ ឯកឧត្ដមរដ្ឋមន្រ្ដី ក៏បានអនុញ្ញាតជូនតំណាងក្រសួងធនធានទឹក និងឧតុនិយម ធ្វើបទបង្ហាញស្ដីពីគម្រោងការពារច្រាំងទន្លេបាសាក់ និងតំណាងក្រសួងសាធារណការនិងដឹកជញ្ជូន ធ្វើបទបង្ហាញស្ដីពីស្ថានភាពច្រាំងនៅតាមបណ្ដោយព្រែកជ្រៃធំ-ព្រែកប៊ិញយី តាមបណ្ដោយព្រំដែនកម្ពុជា-វៀតណាម ជូនអង្គប្រជុំពិនិត្យ និងពិភាក្សាផងដែរ។
បន្ទាប់ពីបានស្ដាប់សេចក្តីរាយការណ៍ខាងលើរួចមក ឯកឧត្ដមរដ្ឋមន្រ្ដី បានធ្វើការកត់សម្គាល់ និងគូសបញ្ជាក់បន្ថែមនូវចំណុចសំខាន់ៗមួយចំនួនជូនអង្គប្រជុំ ដើម្បីជាមូលដ្ឋានក្នុងការពិនិត្យ ពិភាក្សា និងប្រមូលធាតុចូលឱ្យបានគ្រប់ជ្រុងជ្រោយបន្ថែមទៀត។

ក្រោយពីបានពិនិត្យ និងពិភាក្សារួចមក ឯកឧត្ដមរដ្ឋមន្រ្ដី បានកោតសរសើរ និងវាយតម្លៃខ្ពស់ចំពោះឯកឧត្តម លោក លោកស្រី ដែលបានចូលរួមមតិយោបល់យ៉ាងផុសផុលដែលនឹងក្លាយជាធាតុចូលបំពេញបន្ថែមជូនក្រុមការងារបច្ចេកទេសទទួលបន្ទុក។ បន្ថែមពីលើនេះ ឯកឧត្ដមរដ្ឋមន្រ្ដី បានផ្ដល់អនុសាសន៍ណែនាំ និងតម្រង់ទិសដល់ក្រុមការងារសម្រាប់ជាមូលដ្ឋានក្នុងការរៀបចំផែនការអនុវត្តដើម្បីជំរុញវឌ្ឍនភាពការងារថែមមួយកម្រិតទៀត៕

ដោយ ៖ពេជ្រ សំអឿន (ប្រភព៖ រដ្ឋលេខាធិការដ្ឋានកិច្ចការព្រំដែន)