AKP ភ្នំពេញ ថ្ងៃទី១៤ ខែមីនា ឆ្នាំ២០២៥–សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នារសៀលថ្ងៃទី១៤ ខែមីនា ឆ្នាំ២០២៥នេះ អញ្ជើញជាអធិបតី ក្នុងពិធីបិទសន្និបាតប្រចាំឆ្នាំ លើកទី២ បូកសរុបលទ្ធផលការងារ ឆ្នាំ២០២៤ និងលើកទិសដៅផែនការ ឆ្នាំ២០២៥ របស់សមាគមឧកញ៉ាកម្ពុជា
នៅដឹ ព្រេមៀ សេនធ័រ សែនសុខ។

លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា បានឱ្យដឹងថាសមិទ្ធផលសំខាន់ៗមួយចំនួននៃសមាគមឧកញ៉ាកម្ពុជាមានជាអាទិ៍៖
ទី១. កិច្ចការសមាជិកភាព៖ គិតត្រឹមថ្ងៃទី៣១ ខែធ្នូ ឆ្នាំ២០២៤ សមាគម មានសមាជិកចំនួន ៤៤៦រូប កើនឡើង ២៦% ធៀបនឹងឆ្នាំ២០២៣ ក្នុងនោះទីប្រឹក្សាជាន់ខ្ពស់៨រូប, ក្រុមប្រឹក្សាភិបាល៤៥រូប, សកម្ម៣៤រូប និងទ្រទ្រង់៣៥៤រូប) ដែលមានគោរមងារជា លោកអ្នកឧកញ៉ា ៥រូប អ្នកឧកញ៉ា ១៤០រូប និង ឧកញ៉ា ៣០១រូប ។
ទី២. កិច្ចការច្បាប់៖ សមាគមបានចូលរួមផ្តល់ធាតុចូលទៅលើច្បាប់ និងបទដ្ឋានគតិយុត្តនានាជាច្រើន។ ក្រៅពីនេះ សមាគមបានចូលរួមយ៉ាងសកម្មក្នុងការសម្របសម្រួល និងការដោះស្រាយវិវាទក្រៅប្រព័ន្ធតុលាការ ជូនសមាជិកសមាជិកា បានជាច្រើនករណី ជាពិសេសការផ្សព្វផ្សាយ ចេញសេចក្តីប្រកាសព័ត៌មាន និងសេចក្តីជូនដំណឹងនានា ដើម្បីការពារកិត្តិយស និងសេចក្តីថ្លៃថ្នូរ នៃគោរមវន្ត។
ទី៣. កិច្ចការរដ្ឋបាល និងហិរញ្ញវត្ថុ៖ សមាគមបាននិងកំពុងបំពេញការងារបានយ៉ាងល្អ និងត្រឹមត្រូវតាមស្តង់ដារ ដើម្បីធានាបាននូវតម្លាភាព សុក្រឹតភាព គណនេយ្យភាព ការសន្សំសំចៃ និងប្រើប្រាស់ចំគោលដៅស្របទៅតាមទស្សនវិស័យ និងបេសកកម្មរបស់សមាគម ជាពិសេស ការគ្រប់គ្រងចំណូល និងចំណាយ ដែលត្រូវបានធ្វើសវនកម្មជាទៀងទាត់ពីក្រុមហ៊ុនសវនករឯករាជ្យ។
ទី៤. កិច្ចការទំនាក់ទំនងសាធារណៈ អន្តរជាតិ និងធុរកិច្ច៖ សមាគម បានបំពេញការងារយ៉ាងសកម្មលើការកសាងទំនាក់ទំនងជាមួយបណ្តាស្ថាប័នជាតិ និងអន្តរជាតិជាច្រើនប្រទេស និងស្ថាប័ន សំដៅពង្រឹង និងពង្រីកកិច្ចសហប្រតិបត្តិការពាណិជ្ជកម្ម និងវិនិយោគទាំងក្នុងនិងក្រៅប្រទេស តាមរយៈការអមដំណើរសម្តេចធិបតី  ក្នុងដំណើរទស្សនកិច្ចផ្លូវការទៅក្រៅប្រទេស និងការអមដំណើរឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងដំណើរបេសកម្មទាក់ទាញ និងជំរុញវិនិយោគនៅក្រៅប្រទេសដូចជាចិន, ថៃ, ឥណ្ឌា, ជប៉ុន, តួកគី, អាល្លឺម៉ង់, អេស្ប៉ាញ, សហរដ្ឋអាម៉េរិក, កាណាដា, បារាំង, ឆែក, និងចក្រភពអង់គ្លេស ជាដើម ។ ក្រៅពីការងារនេះ សមាគម ក៏បានចុះអនុស្សរណៈ រៀបចំកម្មវិធី វេទិកាធុរកិច្ច និងផ្គូផ្គងពាណិជ្ជកម្មជាមួយបណ្តាស្ថាប័នពាក់ពន្ធនានា ជាច្រើនផងដែរ។
ទី៥. កិច្ចការសប្បុរិសធម៌ និងការងារសង្គមកិច្ច៖ ក្រៅពីការធុរកិច្ច សមាគម ក៏បានបំពេញសកម្មភាពសប្បុរិសធម៌ និងការងារសង្គមជាច្រើនផងដែរដែលបានបរិច្ចាគថវិកាអស់ប្រមាណ ៥,៥លានដុល្លារ គឺកើនឡើងចំនួន ៨៧៦ភាគរយ ធៀបនឹងឆ្នាំ២០២៣។ ជាមួយគ្នានេះដែរ នៅឆ្នាំ២០២៥ នេះ សមាគមឧកញ៉ាកម្ពុជាបានកំណត់នូវសកម្មភាពជាអាទិភាពចំនួន ១០ចំណុច ដែលត្រូវអនុវត្តបន្តនៅឆ្នាំ២០២៥ ដែលនឹងត្រូវបង្ហាញជូននៅក្នុងវីដេអូ នៅល្ងាចនេះ៕

ដោយ៖ គង់ សិរីរ័ត្ន