AKP បន្ទាយមានជ័យ ថ្ងៃទី១៤ ខែមីនា ឆ្នាំ២០២៥--សម្តេចមហាមន្ត្រី គុយ សុផល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង បានអញ្ជើញចុះពិនិត្យវឌ្ឍនភាពនៃការសាងសង់អគារសិក្សា២ខ្នង១០បន្ទប់ បន្ទប់ទឹក១ខ្នង៨បន្ទប់ ខ្លោងទ្វារ និងរបងព័ទ្ធជុំវិញបរិវេណវិទ្យាល័យចំណេះទូទៅ និងបច្ចេកទេស ព្រះនរោត្តមសីហមុនីរាជាបន្ទាយឆ្មារ ស្ថិតនៅឃុំបន្ទាយឆ្មារស្រុកថ្មពួក ខេត្តបន្ទាយមានជ័យ កាលពីថ្ងៃទី១៣ ខែមីនា ឆ្នាំ២០២៥ ដោយគម្រោងសាងសង់នេះគឺជាព្រះរាជអំណោយដ៏ខ្ពង់ខ្ពស់បំផុតរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា សម្រាប់ជាប្រយោជន៍ដល់ការអប់រំយុវជននៅតំបន់បន្ទាយឆ្មារ។

ក្នុងឱកាសចុះពិនិត្យនោះ សម្តេចមហាមន្ត្រី គុយ សុផល បានមានប្រសាសន៍ថា គម្រោងនេះគឺជាការបង្ហាញឱ្យឃើញនូវព្រះរាជទ័យដ៏ជ្រាលជ្រៅរបស់ព្រះមហាក្សត្រ ចំពោះវិស័យអប់រំនៅកម្ពុជា ជាពិសេសនៅតំបន់ជនបទដាច់ស្រយាល។ ការសាងសង់អគារសិក្សាថ្មីនេះ នឹងផ្តល់ឱកាសកាន់តែច្រើនដល់សិស្សានុសិស្ស ក្នុងការទទួលបានការអប់រំប្រកបដោយគុណភាព។ការកសាងធនធានមនុស្ស គឺជាកត្តាចាំបាច់សម្រាប់ការអភិវឌ្ឍប្រទេសជាតិ ហើយការអប់រំគឺជាគ្រឹះដ៏សំខាន់នៃធនធានមនុស្ស។

ជាមួយគ្នានោះដែរ សម្តេចមហាមន្ត្រី គុយ សុផល បានជំរុញឱ្យអាជ្ញាធរពាក់ព័ន្ធ និងក្រុមហ៊ុនសាងសង់ បន្តសហការគ្នាយ៉ាងជិតស្និទ្ធ ដើម្បីធានាឱ្យគម្រោងនេះបញ្ចប់តាមផែនការ និងប្រកបដោយគុណភាពខ្ពស់នោះ និងបានប្រគល់ជូនគណៈគ្រប់គ្រងវិទ្យាល័យនូវកុំព្យទ័រចំនួន២០គ្រឿង និងព្រីនធ័រចំនួន២គ្រឿង ដែលជាព្រះរាជអំណោយដ៏ថ្លៃថ្លាបំផុតរបស់ព្រះករុណាជាអម្ចាស់ជីវិតតម្កល់លើត្បូង ព្រះមហាក្សត្រ នៃព្រះរាជាណាចក្រកម្ពុជានៃយើងផងដែរ ស្ថិតនៅភូមិស្រះជ្រៃ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ៕

ដោយ ឈុន សារ៉ាត