AKP កំពង់ស្ពឺ ថ្ងៃទី១៣ ខែមីនា ឆ្នាំ២០២៥ -- លោកជំទាវបណ្ឌិត សេង វណ្ណសាយ រដ្ឋលេខាធិការ និងជាប្រធានក្រុមការងារបច្ចេកទេសយេនឌ័រប្រចាំក្រសួងធនធានទឹក និងឧតុនិយម ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញជាអធិបតីក្នុងពិធីសំណេះសំណាល និងផ្សព្វផ្សាយប្រកាសដាក់ឱ្យប្រើប្រាស់គោលការណ៍ណែនាំអនុវត្តការងាររបស់សហគមន៍កសិករប្រើប្រាស់ទឹក (ស.ក.ប.ទ) ជូនដល់គណៈកម្មាធិការសហគមន៍កសិករប្រើប្រាស់ទឹកនៃប្រព័ន្ធធារាសាស្ដ្រ ក្នុងភូមិសាស្ត្រខេត្តកំពង់ស្ពឺ។

ពិធីសំណេះសំណាលប្រកបដោយភាពស្និទ្ធស្នាលនេះបានធ្វើឡើងនៅសាលប្រជុំនៃមន្ទីរធនធានទឹក និងឧតុនិយមខេត្តកំពង់ស្ពឺ ដោយមានការអញ្ជើញចូលរួមពីឯកឧត្តមអនុរដ្ឋលេខាធិការ មន្ត្រីនាយកដ្ឋានសហគមន៍កសិករប្រើប្រាស់ទឹក ប្រធាន អនុប្រធាន និងមន្ត្រីរាជការនៃមន្ទីរធនធានទឹក និងឧតុនិយមខេត្តកំពង់ស្ពឺ អភិបាលរងនៃគណៈអភិបាលក្រុង ស្រុក ការិយាល័យជំនាញក្រុង ស្រុក និងគណៈកម្មាធិការសហគមន៍កសិករប្រើប្រាស់ទឹក សរុបប្រមាណ៧២រូប។

លោកជំទាវ សេង វណ្ណសាយ បានមានប្រសាសន៍ថា កិច្ចប្រជុំមានគោលបំណងសំខាន់ដើម្បីពិនិត្យជាក់ស្តែងស្ថានភាពទឹក និងជួបសំណេះសំណាលសួរទុក្ខ ព្រមទាំងពង្រឹងសហគមន៍កសិករប្រើប្រាស់ទឹក (ស.ក.ប.ទ) នៅភូមិសាស្ត្រខេត្តកំពង់ស្ពឺ និងបានផ្តល់អនុសាសន៍តម្រង់ទិសដល់មន្ទីរធនធានទឹក និងឧតុនិយមខេត្ត និងអាជ្ញាធរពាក់ព័ន្ធ ដើម្បីពង្រឹង និងលើកកម្ពស់អភិបាលកិច្ច ព្រមទាំងការគ្រប់គ្រងធនធានទឹកឱ្យកាន់តែមានប្រសិទ្ធភាពថែមទៀត ក្នុងការឈានទៅសម្រេចនូវគោលដៅ "ទឹកដើម្បីការអភិវឌ្ឍប្រដោយនិរន្តរភាព" មាន៖ ១. ត្រូវចុះពន្យល់ណែនាំដល់កសិករឱ្យដឹងពីបរិមាណទឹកដែលមាននៅក្នុងអាង និងការចូលរួមថែរក្សាប្រព័ន្ធធារាសាស្ត្រ។ ទី២. ធ្វើការពន្យល់ណែនាំនិងផ្តល់បច្ចេកទេសថែទាំទំនប់ អាង ប្រឡាយ ជួសជុលទ្វារទឹក និងការគ្រប់គ្រងទឹកដោយមានកាលវិភាគបែងចែកទឹកឱ្យបានច្បាស់លាស់ទៅតាមតម្រូវការចាំបាច់។ ទី៣. ណែនាំដល់ស.ក.ប.ទ ក្នុងការសម្របសម្រួលដោះស្រាយជម្លោះដែលកើតមានក្នុងសហគមន៍។ ទី៤. ពន្យល់ណែនាំដល់ស.ក.ប.ទពីការថែរក្សាអនាម័យបរិស្ថាន នៅតាមទំនប់ អាងទឹកនិងតាមប្រព័ន្ធប្រឡាយស្រោចស្រព។ ទី៥. ផ្សព្វផ្សាយដល់ស.ក.ប.ទពីការប្រែប្រួលអាកាសធាតុ និងការប្រើប្រាស់ទឹកដោយសន្សំសំចៃខ្ពស់។ ទី៦. ជំរុញឱ្យអាជ្ញាធរមូលដ្ឋាន ឃុំ សង្កាត់ចូលរួមសហការជាមួយស.ក.ប.ទ ក្នុងការប្រមូលសេវាកម្មទឹក។ ទី៧. ផ្សព្វផ្សាយអំពីគោលការណ៍ណែនាំចំនួន៥របស់ក្រសួងធនធានទឹក និងឧតុនិយមដល់ស.ក.ប.ទឱ្យបានយល់ដឹង និងទី៨. ផ្សព្វផ្សាយការងារយេនឌ័រក្នុងស.ក.ប.ទ។

ទន្ទឹមនឹងនេះលោកជំទាវបានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រីរាជការមន្ទីរធនធានទឹក និងឧតុនិយមខេត្ត ព្រមទាំងអាជ្ញាធរពាក់ព័ន្ធនៃខេត្តកំពង់ស្ពឺបានសម្រេចនូវសមិទ្ធផលជាច្រើននាពេលកន្លងមក ដើម្បីជំរុញខេត្តកំពង់ស្ពឺឆ្ពោះទៅជាខេត្តមួយដែលធានាបាននូវសន្តិសុខទឹកទាំងបរិមាណ និងគុណភាពសម្រាប់ចូលរួមចំណែកដល់ការអភិវឌ្ឍលើគ្រប់វិស័យ៕

ដោយ លឹម សាន្ត