AKP កំពង់ធំ ថ្ងៃទី១២ ខែមីនា ឆ្នាំ២០២៥ -- លោក ញឹក បានខេង អភិបាលរងខេត្តកំពង់ធំដឹកនាំកិច្ចប្រជុំអនុគណៈកម្មការខ្លឹមសារ ពិធីការ និងព័ត៌មានដើម្បីត្រៀមរៀបចំទៅសង្ក្រាន្តកំពង់ធំ ដែលនឹងប្រព្រឹត្តទៅនាខែមេសាខាងមុខនេះ ដើម្បីឱ្យដំណើរការដោយរលូនប្រកបដោយការទទួលខុសត្រូវខ្ពស់នៅសាលប្រជុំសាលាខេត្តកំពង់ធំ កាលពីរសៀលថ្ងៃទី១១ ខែមីនា ឆ្នាំ២០២៥។

លោក ញឹក បានខេង បានបញ្ជាក់ថាសង្រ្កាន្កកំពង់ធំដែលត្រៀមរៀបចំនាពេលខាងមុខនេះ ត្រូវតែធានាឱ្យបានថាការបែងចែកតួនាទីភារកិច្ចនីមួយៗរបស់ក្រុមការងារដែលជាសមាជិកគណៈកម្មការខ្លឹមសារ ពិធីការ និងព័ត៌មានមានភាពច្បាស់លាស់ទៅតាមផ្នែករាងៗខ្លួនដើម្បីឱ្យពិធីដំណើរការទៅបានដោយរលូននិងមានភាពសប្បាយរីករាយជូនប្រជាពលរដ្ឋ។

លោកអភិបាលរងខេត្តបានសំណូមពរដល់ក្រុមការងារផ្នែកផ្សព្វផ្សាយបន្តផ្សព្វផ្សាយបន្ថែមពីទីតាំងកម្សាន្តដែលរដ្ឋបាលខេត្តបានរៀបចំ និងទីតាំងទេសចរណ៍ ព្រមទាំងរមណីយដ្ឋាន អាហារដ្ឋានពិសេសៗ ដើម្បីឱ្យភ្ញៀវទេសចរជាតិ និងអន្តរជាតិ ចូលមកកម្សាន្តក្នុងពិធីបុណ្យចូលឆ្នាំខ្មែរក្នុងខេត្តកំពង់ធំនាពេលខាងមុននេះ។

សូមបញ្ជាក់ថា រដ្ឋបាលខេត្តកំពង់ធំនឹងរៀបចំព្រឹត្តិការណ៍ “សង្ក្រាន្តកំពង់ធំ” រយៈពេល០៣ថ្ងៃចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ នៅសួនស្ទឹងសែន ក្រុងស្ទឹងសែន ខេត្តកំពង់ធំ៕

ដោយ ស៊ុម វណ្ណា