AKP ភ្នំពេញថ្ងៃទី១០ ខែមីនា ឆ្នាំ ២០២៥៖ តំណាងក្រុមហ៊ុន RMA  (Cambodia) និង Minebea (Cambodia) ជួបពិភាក្សារគ្នា ដើម្បីត្រៀមរៀបចំកិច្ចប្រជុំលើកទី៣ នៃក្រុមប្រឹក្សាផ្ដល់យោបល់សម្រាប់ការអភិវឌ្ឍវិស័យយានយន្ត និងអេឡិចត្រូនិក។

នាព្រឹកថ្ងៃទី១០ ខែមីនា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា និងជាប្រធានលេខាធិការដ្ឋានដឹកនាំ និងសម្របសម្រួលការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា (IDP) បានដឹកនាំសហការីទទួលជួបពិភាក្សាការងារជាមួយ តំណាងក្រុមហ៊ុនឯកជន។ 

លោក ងន សាំង នាយកប្រតិបត្តិក្រុមហ៊ុន RMA (Cambodia) និងជាសហប្រធានតំណាងវិស័យយានយន្ត នៃក្រុមប្រឹក្សាផ្ដល់យោបល់ និង លោក Yasuyuki SUGAWARA អ្នកគ្រប់គ្រងគណនេយ្យក្រុមហ៊ុន Minebea (Cambodia) និងជាតំណាងសហប្រធានតំណាងវិស័យអេឡិចត្រូនិកនៃក្រុមប្រឹក្សាផ្ដល់យោបល់ ក្នុងគោលបំណងពិភាក្សាអំពីការងារ សម្រាប់ត្រៀមរៀបចំកិច្ចប្រជុំលើកទី៣ នៃក្រុមប្រឹក្សាផ្ដល់យោបល់ ដែលគ្រោងនឹងរៀបចំក្នុងអំឡុងខែមេសា ឆ្នាំ២០២៥ ខាងមុខ។ 

គួរបញ្ជាក់ផងដែរថា ក្រុមប្រឹក្សាផ្ដល់យោបល់ គឺជាយន្តការនៃភាពជាដៃគូរវាងរដ្ឋ និងឯកជន ដែលជួយតម្រង់ទិសយុទ្ធសាស្រ្តអភិវឌ្ឍន៍ និងផែនការសកម្មភាពនៃវិស័យទាំងពីរ។ ជាលទ្ធផល ក្រោមការសម្របសម្រួលពីលេខាធិការដ្ឋាន IDP, សហប្រធានទាំង២ នឹងដឹកនាំកិច្ចប្រជុំ ជាមួយបណ្ដា ក្រុមហ៊ុនក្នុងវិស័យទាំងពីរ ដើម្បីប្រមូលព័ត៌មាន បញ្ហាប្រឈម និងសំណូមពរនានា សម្រាប់ រាយការណ៍ ក៏ដូចជាស្នើសុំដំណោះស្រាយ ក្នុងកិច្ចប្រជុំក្រុមប្រឹក្សាផ្ដល់យោបល់។ 

បន្ថែមលើនេះ អង្គប្រជុំបានពិភាក្សាអំពី កិច្ចសហប្រតិបត្តិការនានា ដែលអាចរៀបចំនាពេលអនាគតដូចជា កិច្ចពិភាក្សាលើការអភិវឌ្ឍជំនាញ និងសិក្ខាសាលាចែករំលែកបទពិសោធន៍ក្នុងវិស័យទាំងពីរ ជាដើម។ ជាកិច្ចបញ្ចប់ ឯកឧត្តមប្រធាន បានថ្លែងអំណរគុណ  និងវាយតម្លៃខ្ពស់ដល់តំណាងក្រុមហ៊ុនទាំងពីរ ដែលតែងសហការជាមួយរាជរដ្ឋាភិបាល ដើម្បីរួមគ្នាអភិវឌ្ឍវិស័យទាំងពីរនៅកម្ពុជា ជាពិសេសក្នុងក្របខណ្ឌផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា៕

ដោយ៖ ចរិយា ប្រភព៖ CDC