AKP ព្រះសីហនុ ថ្ងៃទី១០ ខែមីនា ឆ្នាំ២០២៥-- 

រដ្ឋបាលខេត្តព្រះសីហនុដង្ហែពានរង្វាន់ជ័យលាភីអង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាលខេត្តព្រះសីហនុក្រោមអធិបតីភាព ឯកឧត្តម សុខ គាង ប្រធានក្រុមការងារវិស័យអប់រំ យុវជន និងកីឡានៃក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ លោកជំទាវ សេង សុមេត្តា ប្រធានក្រុមការងារចុះមូលដ្ឋានក្រុងព្រះសីហនុ និងក្រុងកោះរ៉ុង ឯកឧត្តម វង្ស ផាណាត ប្រធានក្រុមប្រឹក្សាខេត្ត ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីនុ  ដោយមានការចូលរួមពីឯកឧត្តម លោកជំទាវក្រុមប្រឹក្សាខេត្ត មន្ត្រីរាជការ កងកម្លំាងប្រដាប់អាវុធ ដោយដង្ហែចូលសាលាមត្តេយ្យធនធានក្រុងព្រះសីហនុ នាព្រឹកថ្ងៃចន្ទ ទី១០ ខែមីនា ឆ្នាំ២០២៥។

ឯកឧត្តម ម៉ាង ស៊ីណេត តាងនាមក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋទូទាំងខេត្តព្រះសីហនុ បានសម្ដែងក្ដីសោមនស្សរីករាយជាអនេកប្បការប្រកបដោយមោទកភាពដ៏ជ្រាលជ្រៅ ដែលរាជរដ្ឋាភិបាលកម្ពុជាសម្រេចទទួលស្គាល់ជ័យលាភីអង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាលប្រចាំឆ្នាំ២០២៤ ដល់សាលាមតេ្តយ្យសិក្សាធនធាន ក្រុងព្រះសីហនុ ចំណាត់ថា្នក់លេខ១ វិទ្យាល័យ ហ៊ុន សែន វាលរេញ ចំណាត់ថា្នក់លេខ៥ និងមន្ទីរពេទ្យបង្អែកខេត្តព្រះសីហនុ ចំណាត់ថា្នក់លេខ៧។

ជោគជ័យដែលទទួលបាននាពេលនេះ គឺពិតជាបាននំាមកនូវកិត្តិយសដ៏ធំធេងសម្រាប់វិស័យអប់រំ និងវិស័យសុខាភិបាលនៅខេត្ត ដែលកន្លងមកក្រុមការងាររាជរដ្ឋាភិបាលចុះមូលដ្ឋានខេត្ត ក្រុង ស្រុក ឃុំ សង្កាត់ រដ្ឋបាលខេត្ត និងរដ្ឋបាលក្រុង ស្រុក បានខិតខំយកចិត្តទុកដាក់ខ្ពស់ និងចាត់ទុកជាវិស័យអាទិភាព ជាពិសេសបានជួយឧបត្ថម្ភគាំទ្រគ្រប់រូបភាពដល់វិស័យទាំងពីរ ក្នុងគោលបំណងជំរុញកុមារដែលជាទំពាំងស្នងឫស្សី និងយុវជនដែលជាសសរទ្រូងរបស់ប្រទេសជាតិឱ្យមានការសិក្សាប្រកបដោយគុណភាព និងមានសមត្ថភាព ព្រមទាំងបន្តពង្រឹងប្រតិបត្តិការលើប្រព័ន្ធសុខាភិបាលឱ្យកាន់តែមានប្រសិទ្ធភាព ដោយផ្ដោតពិសេសលើការផ្ដល់សេវាសុខភាពមានគុណភាព សុវត្ថិភាព ស័ក្តិសិទ្ធភាព និងសមធម៌ជូនប្រជាពលរដ្ឋ។ មហាសមិទ្ធផលនេះកើតចេញពីការខិតខំប្រឹងប្រែងយកអស់កម្លាំងកាយចិត្តដោយមិនគិតពីការនឿយហត់ និងថ្ងៃឈប់សម្រាករបស់គណៈកម្មការវាយតម្លៃអង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាលខេត្ត ថ្នាក់ដឹកនាំ មន្រ្តីរាជការ បុគ្គលិកនៃមន្ទីរអប់រំយុវជន និងកីឡាខេត្ត និងមន្ទីរសុខាភិបាលខេត្ត ព្រមទាំងផ្តល់សេវាថែទាំសុខភាព លើកកម្ពស់ប្រសិទ្ធភាពនៃកិច្ចដំណើរការមុខងារវិស័យសុខាភិបាលក្នុងខេត្តព្រះសីហនុ ឆ្លើយតបប្រកបដោយសមធម៌ និងគណនេយ្យភាពខ្ពស់ជូនប្រជាជន។

ទន្ទឹមនឹងនេះ ឯកឧត្តមអភិបាលខេត្តបានថ្លែងអំណរគុណចំពោះឯកឧត្ដម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ និងលោកជំទាវ និងក្រុមការងាររាជរដ្ឋាភិបាលចុះមូលដ្ឋានខេត្ត ក្រុង ស្រុក ឃុំ សង្កាត់ ព្រមទាំងអ្នកឧកញ៉ា ឧកញ៉ា សប្បុរសជន និងអ្នកពាក់ព័ន្ធដែលបានខិតខំព្យាយាមលះបង់កម្លាំងកាយចិត្ត ប្រាជ្ញាស្មារតី និងធនធាន ឧបត្ថម្ភគាំទ្រគ្រប់រូបភាពដល់វិស័យអប់រំ និងវិស័យសុខាភិបាលក្នុងខេត្តព្រះសីហនុ រហូតទទួលបានលទ្ធផលយ៉ាងត្រចះត្រចង់នាពេលនេះ។

ក្នុងឱកាសនោះ ឯកឧត្តម សុខ គាង បានអបអរសាទរពានរង្វាន់ជ័យលាភីអង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាល ឆ្នាំ២០២៤ នៅខេត្តព្រះសីហនុ ក្រោមការដឹកនាំរបស់ឯកឧត្តម សាយ សំអាល់ ឧបនាយករដ្ឋមន្ត្រី ដោយមើលឃើញពីចក្ខុវិស័យការអភិវឌ្ឍរីកចម្រើនរបស់ខេត្តព្រះសីហនុ ក្នុងការបណ្តុះបណ្តាលធនធានមនុស្ស ដោយមានការចូលរួមពីលោកគ្រូ អ្នកគ្រូ អាណាព្យាបាល និងអាជ្ញាធរគ្រប់លំដាប់ថ្នាក់ ទើបយើងទទួលបានជ័យលាភីពានរង្វាន់សាលាមត្តេយធនធានក្រុង ទទួលបានពានជ័យលាភីលេខ១  សូមចូលរួមអបអរសាទរ និងលើកពាននាថ្ងៃនេះ និងឈានសម្រេចបាន ពានបន្ថែមទៀតនៅឆ្នាំខាងមុខ៕

ដោយ ងូ សុមុនី