AKP ភ្នំពេញ ថ្ងៃទី១០ ខែមីនា ឆ្នាំ២០២៥ -- ការបង្កើតការបណ្តុះ និងចែកកូនឈើជូនប្រជាពលរដ្ឋយកទៅដាំស្តារព្រៃ ដាំនៅតាមទីសាធារណៈនានា គឺជួយបង្កើនភាពបៃតងនិងផ្តល់ប្រយោជន៍ដល់ការរស់នៅរបស់មនុស្សជាតិ។ ដើម្បីចូលរួមចំណែកដល់យុទ្ធនាការ «ពន្លកបៃតង» របស់ក្រសួងបរិស្ថាន អង្គការសម្ព័ន្ធមិត្តសត្វព្រៃ (Wildlife Alliance Cambodia) បានចូលរួមបណ្តុះកូនឈើបានជាង៥០ម៉ឺនដើម នៅតាមថ្នាលបណ្តុះកូនឈើធំៗចំនួន២កន្លែង នៅក្នុងភូមិសាស្រ្តនៃឧទ្យានជាតិជួរភ្នំក្រវាញ។ ការបង្កើតជាថ្នាលបណ្តុះកូនឈើឡើង គឺជាការបណ្ដុះគំនិតរបស់ប្រជាពលរដ្ឋកម្ពុជា ក្នុងការស្រឡាញ់ដើមឈើ ស្រឡាញ់ភាពបៃតង និងស្រឡាញ់បរិស្ថាន។

លោក អាត់ ណុច ប្រធានគ្រប់គ្រងស្ថានីយបណ្តុះកូនឈើ អង្គការសម្ព័ន្ធមិត្តសត្វព្រៃ បានឱ្យដឹងថា ទីតាំងបណ្តុះកូនឈើ២កន្លែងរបស់អង្គការសម្ព័ន្ធមិត្តសត្វព្រៃនេះគឺទីតាំងទី១ស្ថិតនៅឃុំជីផាត ស្រុកថ្មបាំង ខេត្តកោះកុង និងទីតាំងទី២ស្ថិតនៅឃុំអូរសោម ស្រុកវាលវែង ខេត្តពោធិ៍សាត់នេះ មានចំនួនជាង៥០ម៉ឺនដើម ក្នុងនោះមានចំនួន២១មុខដើម្បីឱ្យស្របតាមយុទ្ធនាការ ”ពន្លកបៃតង” របស់ក្រសួងបរិស្ថាន។

លោកប្រធានបាននិយាយថា កូនឈើដែលបណ្តុះស្ថិតនៅក្នុងបន្ទាត់ក្រហមពោលគឺប្រភេទដើមឈើដែលកម្រ ហើយដែលអាចឈានដល់ផុតពូជនោះមានចំនួន៧ប្រភេទក្នុងនេះដូចជា គ្រញូង នាងនួន បេង ធ្នុង ឈើទាល កកោះ និង គគីរ។ គម្រោងនេះក៏ជាផ្នែកមួយសំខាន់សម្រាប់ជួយដល់ជីវភាពប្រជាសហគមន៍ដើម្បីបញ្ចប់ការចូលព្រៃកាប់ឈើ និងបរបាញ់សត្វព្រៃខុសច្បាប់ផងដែរ។

អ្នកស្រី ធី ស្រីលីន បុគ្គលិកស្ថានីយបណ្តុះកូនឈើឆាយវល្លិ៍ពេន អង្គការសម្ព័ន្ធមិត្តសត្វព្រៃ បានលើកឡើងថា តាមរយៈការងារក្នុងស្ថានីយបណ្តុះកូនឈើនេះដែរវាពិតជាបានជួយអ្នកស្រីឱ្យមានការងារធ្វើ ដោយមិនចាំបាច់ចេញទៅប្រកបរបរឆ្ងាយពីផ្ទះឬធ្វើចំណាកស្រុកទៀតឡើយ។អ្នកស្រីពិតជាសប្បាយចិត្តដោយសារជីវភាពល្អប្រសើរជាងមុន និងបានរួមរស់នៅក្បែរផ្ទះសម្បែងជួបជុំគ្រួសារ ខុសពីមុនមួយថ្ងៃៗចេញទៅព្រៃបាត់ៗពីផ្ទះ។ 

អ្នកស្រីបានឱ្យដឹងបន្ថែមថា កាលពីមុននេះស្វាមី និងក៏ដូចជាខ្លួនអ្នកស្រីតែងចូលព្រៃកាប់ឈើ ចាប់សត្វព្រៃ តែពេលនេះបានមកធ្វើការបណ្តុះកូនឈើជាមួយអង្គការសម្ព័ន្ធសត្វព្រៃធ្វើឱ្យគ្រួសារអ្នកស្រីយល់ដឹងច្រើនពីផលប្រយោជន៍ដើមឈើ និងពេលនេះស្រឡាញ់ចូលចិត្តដើមឈើ និងក៏ដូចជាសត្វព្រៃ។

អ្នកស្រី យិន សុខធី  ស្រ្តីមួយរូបទៀតដែលមកចូលរួមធ្វើការបណ្តុះកូនឈើ ជាមួយអង្គការសម្ព័ន្ធសត្វព្រៃ បានប្រាប់ថាកាលពីមុននេះស្វាមី និងក៏ដូចជាខ្លួនអ្នកស្រីតែងចូលព្រៃកាប់ឈើ ចាប់សត្វព្រៃ តែពេលនេះបានមកធ្វើការបណ្តុះកូនឈើជាមួយអង្គការសម្ព័ន្ធសត្វព្រៃធ្វើឱ្យគ្រួសារអ្នកស្រីយល់ដឹងច្រើនពីផលប្រយោជន៍ដើមឈើ និងពេលនេះស្រឡាញ់ចូលចិត្តដើមឈើ និងក៏ដូចជាសត្វព្រៃ។

គួររំលឹកថា អង្គការសម្ព័ន្ធមិត្តសត្វព្រៃមានគម្រោងការបណ្តុះកូនឈើ ដើម្បីចែកជូនសហគមន៍ រដ្ឋបាលថ្នាក់ក្រោមជាតិ និងអាជ្ញាធរ ព្រមទាំងប្រជាពលរដ្ឋយកទៅដាំស្តារព្រៃឈើតំបន់រិចរិលឡើងវិញនៅតាមសហគមន៍តំបន់ការពារធម្មជាតិនិងនៅតាមទីតាំងសាធារណៈមួយចំនួន។ ដើមឈើមានផលប្រយោជន៍ធំធេងណាស់សម្រាប់ប្រទេសជាតិធ្វើឱ្យមានគម្របបៃតង និងមានអត្ថប្រយោជន៍សម្រាប់មនុស្ស និងសត្វគ្រប់ប្រភេទ។ ក្រៅពីផលប្រយោជន៍ជាឈើប្រើប្រាស់ និងជាមុខងារក្នុងប្រព័ន្ធអេកូឡូស៊ី ព្រៃឈើនៅមានមុខងារដ៏សំខាន់មួយទៀត គឺការស្រូបយកឧស័្មនកាបូនិច (ឧស័្មនផ្ទះកញ្ចក់) ពីបរិយាកាសដែលមុខងារនេះដើរតួនាទីសំខាន់ក្នុងការកាត់បន្ថយឧស័្មនផ្ទះកញ្ចក់សកល៕

ដោយ៖ ដេប៉ូ