AKP ភ្នំពេញ ថ្ងៃទី០៦ ខែមីនា ឆ្នាំ២០២៥-- សៀវភៅកម្រងមេរៀនទាំង៣១ស្ដីពី “នីតិអន្តរជាតិសមុទ្រ” ដែលជាស្នាដៃនិពន្ធដោយ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នឹងត្រូវផ្សព្វផ្សាយជាសាធារណៈក្នុងកម្មវិធីពិព័រណ៍សៀវភៅ នាថ្ងៃទី០៨ ខែមីនា ឆ្នាំ២០២៥ ដើម្បីអបអរសាទរទិវាជាតិអំណានលើកទី១០។

សៀវភៅនីតិអន្តរជាតិសមុទ្រ (International Law of the Sea) គឺជាមែកធាងដ៏មានវ័យចំណាស់ជាងគេមួយក្នុងចំណោមមែកធាងដទៃទៀតនៃនីតិអន្តរជាតិ។ មូលដ្ឋានគ្រឹះនៃនីតិពាណិជ្ជកម្មសមុទ្របុរាណ មានទំនាក់ទំនងជាមួយក្រមសមុទ្ររ៉ូឌៀន (lex Rhodia) ដែលកើតមានតាំងពីសតវត្សរ៍ទី៨មកម្ល៉េះ។ ឫសគល់នៃនីតិមហាសមុទ្រទំនើបមានអត្ថិភាពចាប់ពីសតវត្សរ៍ទី១៧ តាមរយៈអត្ថបទរបស់បញ្ញវន្តជនជាតិហូឡង់ម្នាក់ឈ្មោះ ហ៊ូហ្គោ ក្រូទៀស ក្រោមចំណងជើងថា សេរីភាពសមុទ្រ (Mare Liberum)។ គោលគំនិតសេរីភាពសមុទ្របានក្លាយជាគោលការណ៍គន្លឹះនៃនីតិសមុទ្រ។ វិធានមូលដ្ឋាននៃនីតិមហាសមុទ្រមានការវិវត្តខ្លាំងចាប់ពីឆ្នាំ១៩៣០ ពោលគឺចាប់ពីពេលដែលសង្គមប្រជាជាតិបានចាប់ផ្ដើមធ្វើក្រមនីយកម្មទាក់ទងនឹងនីតិសមុទ្រ។

សូមចូលរួមឱ្យបានច្រើនកុះករក្នុងកម្មវិធីពិព័រណ៍សៀវភៅ ដើម្បីស្វែងរកសៀវភៅជាចំណូលចិត្តរបស់អ្នក និងលើកកម្ពស់ទម្លាប់អាននៅកម្ពុជា ដែលនឹងប្រព្រឹត្តទៅនៅថ្ងៃទី០៨-០៩-១០-១១ ខែមីនា ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា៕

ដោយ៖ ចាន់ សុភឿន (ប្រភព៖ ក្រសួងអប់រំ)