AKP កំពង់ចាម ថ្ងៃទី០៥ ខែមីនា ឆ្នាំ២០២៥ -- នៅសាលសន្និសីទសាលាខេត្តកំពង់ចាម នាព្រឹកថ្ងៃទី០៥ ខែមីនា ឆ្នាំ២០២៥ ឯកឧត្តម ពេជ សោភ័ន ទេសរដ្ឋមន្ត្រីទទួលបន្ទុកបសកកម្មពិសេស និងជាប្រធានលេខាធិការដ្ឋាន គ.វ.អ បានអញ្ជើញជាអធិបតីនៃការប្រជុំចាប់យុទ្ធនាការគាំទ្រសាលារៀនគោលដៅ គ.វ.អ ក្នុងខេត្តកំពង់ចាម និងខេត្តព្រៃវែង ដោយមានការចូលរួមពីប្រធានក្រុមប្រឹក្សាខេត្ត ឯកឧត្តមអភិបាលខេត្តកំពង់ចាម លោកអភិបាលរងខេត្ត ព្រៃវែង អស់លោកជាអភិបាលក្រុង-ស្រុក ប្រធានមន្ទីរ អង្គភាព រួមទាំងលោកគ្រូ អ្នកគ្រូក្នុងសាលាគោលដៅក្នុងខេត្តកំពង់ចាម និងថ្នាក់ ដឹកនាំមន្ទីរអប់រំយុវជន លោកគ្រូ អ្នកគ្រូខេត្តនៃសាលាគោលដៅក្នុងខេត្តព្រៃវែងនិងមាតាមិតាសិស្សផងដែរ។

ក្នុងសន្ទរកថាស្វាគមន៍ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានលើកឡើងថា ការចាប់ផ្តើមយុទ្ធនាការគាំទ្រសាលារៀនគោលដៅ គ.វ.អ ខេត្តកំពង់ចាម និងព្រៃវែង ពិតជាមានសារសំខាន់ណាស់ក្នុងគោលបំណងអនុវត្តវិធានគន្លឺះក្នុងវិស័យអប់រំ ផ្តោតលើការពង្រឹងអភិបាលកិច្ចសាលាតាមរៀនរបស់រដ្ឋ សំដៅលើកកម្ពស់ចំណេះដឹង វិន័យ សីលធម៌ ចរិយាធម៌ចាប់ពីថ្នាក់មត្តេយ្យដល់មធ្យមសិក្សា ដើម្បីផលិតមូលធនមនុស្សប្រកបដោយចំណេះដឹង និងជំនាញ សីលធម៌ល្អ ឥរិយាបថល្អ និងសមត្ថភាព បំពេញការងារខ្ពស់ឱ្យស្រតាមយុទ្ធសាស្ត្របញ្ចកោណដែលបានកំណត់យក “មនុស្សជាអាទិភាពជាងគេនៃអាទិភាពគន្លឹះទាំង ៥ ដើម្បីឆ្លើយតបទៅនឹងតម្រូវការជាក់ស្តែងរបស់សង្គមសេដ្ឋកិច្ច និងទីផ្សារការងារ។

ឯកឧត្តមអភិបាលខេត្តបានបញ្ជាក់ថា រាជរដ្ឋាភិបាល នីតិកាលទី៧នៃរដ្ឋសភា ក្រោមការ ដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានកំណត់ការអភិវឌ្ឍធនធានមនុស្សមានសារៈសំខាន់ក្នុងការ សម្រេចបាននូវគោលដៅសេដ្ឋកិច្ចឆ្នាំ២០៣០ ដើម្បីក្លាយជាប្រទេសដែលមានចំណូលមធ្យមកម្រិតខ្ពស់។ រាជរដ្ឋាភិបាលបានយកចិត្តទុកដាក់លើការអប់រំ និងការបណ្តុះបណ្តាលដើម្បីបង្កើនធនធានមនុស្ស តាមរយៈការដាក់ចេញនូវយុទ្ធសាស្ត្របញ្ចកោណដំណាក់កាលទី១ ដែលក្នុងនោះ មានមុំ២ពាក់ព័ន្ធនឹងវិស័យអប់រំ ដែលមុំទី១ ផ្តោតលើការអភិវឌ្ឍមូលធនមនុស្ស និងមុំទី៥គឺការ អភិវឌ្ឍបច្ចេកវិទ្យាឌីជីថល និងបានដាក់ចេញនូវវិធានគន្លឹះក្នុងវិស័យអប់រំចំនួន៤ មាន៖ ១- ការពង្រឹងអភិបាលកិច្ចសាលារៀន ២-ការពិនិត្យកែលម្អកម្មវិធីសិក្សា និងរៀបចំកម្មវិធីសិក្សានិងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថសិស្ស ៣-ការយកចិត្តទុកដាក់លើសុខភាពសិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលា និង៤-ការជំរុញ នឹងលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំស្របតាមពាក្យស្លោក ភាពជាដៃគូរដ្ឋ និងសហគមន៍ ដើម្បីការអប់រំ។

ក្នុងកិច្ចប្រជុំ ឯកឧត្តម ពេជ សោភ័ន បានពាំនាំសេចក្តីនឹករលឹករបស់សម្តេចធិបតី និងលោកជំទាវបណ្ឌិតដែលជានិច្ចជាកាលបានយកចិត្តទុកដាក់អំពីការអភិវឌ្ឍមូលធនមនុស្ស ជូនចំពោះលោកគ្រូ អ្នកគ្រូ ដែលបានខិតខំប្រឹងប្រែងការអនុវត្តវិធានការគន្លឹះក្នុងវិស័យអប់រំនិងគាំទ្រគោលនយោបាយរបស់រាជរដ្ឋាភិបាល នីតិកាលទី៧ ចំពោះការអភិវឌ្ឍធនធានមនុស្ស ជាពិសេសក្នុងការបង្រៀនកូន ចៅរបស់យើងទទួលបានជោគជ័យ។ វិធានការគន្លឹះក្នុងវិស័យអប់រំ គឺជាវិធានការថ្មីស្រឡាង ដែលតម្រូវឱ្យលោកគ្រូ អ្នកគ្រូ ក៏ដូចជាអ្នកពាក់ព័ន្ធទាំងអស់ ចូលរួមអនុវត្តទាំងអស់គ្នា ដើម្បីផលិតមូលធនមនុស្ស ប្រកបដោយចំណេះដឹង និងសមត្ថភាពខ្ពង់ខ្ពស់ ចាប់ពីមត្តេយ្យសិក្សារហូតដល់មធ្យមសិក្សា។ រាជរដ្ឋាភិបាល នីតិកាលទី៧នៃរដ្ឋសភាក្រោមការដឹកនាំរបស់សម្ដេចធិបតី បានដាក់ចេញនូវគោលនយោបាយ នៅក្នុងការអភិវឌ្ឍន៍វិស័យអប់រំ តាមរយៈវិធានការគន្លឹះក្នុងវិស័យអប់រំ និងចក្ខុវិស័យកម្ពុជាឆ្នាំ២០៣០ និង២០៥០ ប្រែក្លាយប្រទេសកម្ពុជា ជាប្រទេសដែលមានចំណូលខ្ពស់ ស្របតាមយុទ្ធសាស្ត្របញ្ចកោណតំណាក់កាលទី១ ដោយផ្តោតសំខាន់ទៅលើ មនុស្ស ផ្លូវ ទឹក ភ្លើង និងបច្ចេកវិទ្យា និងវិធានការគន្លឹះនៃវិស័យអប់រំ ក្នុងនោះ ១. ការពង្រឹករដ្ឋបាលសាធារណៈប្រកបដោយគណនេយ្យភាព តម្លាភាព និងប្រសិទ្ធភាព ប្រសិទ្ធផល ២. ការលើកកម្ពស់គុណភាពអប់រំ ៣. ការលើកកម្ពស់គុណភាពសុខាភិបាល ៤.ការពង្រឹងគោលនយោបាយភូមិ ឃុំ សង្កាត់មានសុវត្ថិភាព និង៥. ការពង្រឹងលើកកម្ពស់គុណភាពយុត្តិធម៌។

ឯកឧត្តមទេសរដ្ឋមន្ត្រី បានសង្កត់ធ្ងន់ថា ការលើកកម្ពស់គុណភាពអប់រំ ត្រូវឈរលើវិធានការគន្លឹះ៤ មាន លើកកម្ពស់អភិបាលកិច្ចគុណភាពសាលារៀន  ការកែសម្រួលកម្មវិធីសក្សា ការលើកកម្ពស់សុខភាពសិស្សានុសិស្ស  និងលើកទឹកចិត្តការចូលរួមពីមាតាបិតា និងសហគមន៍ ដែលជាវិធានការឆ្លើយតបទៅនឹងការយកចិត្តទុកដាក់ខ្ពស់របស់រាជរដ្ឋាភិបាលលើកុមារដែលជាទំពាំងស្នងឫស្សី និងយុវជនដែលជាសសរទ្រូងរបស់ប្រទេសជាតិឱ្យមានការសិក្សាប្រកបដោយគុណភាព  និងមានសមត្ថភាព ក្នុងការកសាងសង្គមជាតិ៕

ដោយ ឆាយ ម៉ុត