AKP សៀមរាប ថ្ងៃទី០៥ ខែមីនា ឆ្នាំ២០២៥-- ភូមិចំនួន៨ រួមមានភូមិសំរោងកញ្ចោច ភូមិបឹងភូមិស្ពានតូច ភូមិយាង ភូមិឬស្សីលក ភូមិទទឹងថ្ងៃភូមិក្រូច ភូមិត្រពាំងរុននៃឃុំឬស្សីលកស្រុកជីក្រែង ខេត្តសៀមរាប ត្រូវបានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត សហការជាមួយរដ្ឋបាលស្រុកជីក្រែង ប្រកាសកំណត់តំបន់វិនិច្ឆ័យសម្រាប់ធ្វើការចុះបញ្ជីដីធ្លីមានលក្ខណៈជាប្រព័ន្ធ នៅថ្ងៃទី០៥ ខែមីនា ឆ្នាំ២០២៥។

លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ឱ្យដឹងថា ការចុះបញ្ជីដីធ្លីមានលក្ខណៈជាប្រព័ន្ធត្រូវមានការបោះបង្គោល កំណត់ព្រំដី ដោយត្រៀមបង្គោលរឹងមាំសម្រាប់បោះព្រំដី។ ត្រូវមានឯកសារ អត្តសញ្ញាណម្ចាស់ដី ដូចជាអត្តសញ្ញាណប័ណ្ណសញ្ជាតិខ្មែរ សៀវភៅគ្រួសារ សៀវភៅស្នាក់នៅសេចក្តីចម្លងសំបុត្របញ្ជាក់កំណើត សេចក្តីចម្លងសំបុត្រអាពាហ៍ពិពាហ៍ សេចក្តីចម្លងសំបុត្រមរណភាពលិខិតបញ្ជាក់ភាពនៅលីវ។ មួយទៀតគឺឯកសារ អត្តសញ្ញាណដីត្រូវមានបណ្ណសម្គាល់សិទ្ធិកាន់កាប់ប្រើប្រាស់ដីធ្លីបណ្ណសម្គាល់សិទ្ធិកាន់កាប់អចលនវត្ថុ បង្កាន់ដៃទទួលពាក្យ លិខិតផ្ទេរសិទ្ធិដីធ្លី លិខិតអំណោយផ្តាច់ លិខតបញ្ជាក់ឬលិខិតអះអាងប្រវត្តិដីនិងលិខិតផ្សេងៗ។

លោក ហ៊ី សាយ បានបន្តថា ការចុះបញ្ជីដីធ្លីមានលក្ខណៈជាប្រព័ន្ធ ត្រូវអនុវត្តតាមនីតិវិធីជា៥ ដំណាក់កាលដូចជា៖ ទី១. កំណត់តំបន់ធ្វើការវិនិច្ឆ័យ និងដំណើរការផ្សព្វផ្សាយពីការចុះបញ្ជីដីធ្លីមានលក្ខណៈជាប្រព័ន្ធ។ ទី២. ប្រតិបត្តិការបច្ចេកទេស ចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់សុរិយោដី និង បញ្ជីឈ្មោះម្ចាស់ដី។ ទី៣. ការបិទផ្សាយជាសាធារណៈនូវឯកសារនៃការវិនិច្ឆ័យ មានរយៈពេល១៥ ថ្ងៃ ដើម្បីទុកលទ្ធភាពឱ្យម្ចាស់ដី និង អ្នកដែលពាក់ព័ន្ធ ធ្វើការផ្ទៀងផ្ទាត់ឈ្មោះ ស្ថានភាពគ្រួសារ និង ក្បាលដីរបស់ខ្លួនព្រមទាំងធ្វើការតវ៉ាក្នុងករណីមានការខុសឆ្គង។ ទី៤. ការសម្រេចលើឯកសារវិនិច្ឆ័យ ធ្វើរបាយការណ៍ពីលទ្ធផលនៃការបិទផ្សាយជាសាធារណៈនូវឯកសារនៃការវិនិច្ឆ័យដើម្បីពិនិត្យ និងសម្រេចលើការផ្តល់សិទ្ធិចំពោះក្បាលដីណា ដែលមិនមានទំនាស់ ឬ មិនពាក់ព័ន្ធនឹងដីរដ្ឋ និងទី៥ជាដំណាក់កាលចេញវិញ្ញាបនបត្រ និងប្រគល់ជូនម្ចាស់ដី។

លោក ធូ ចន្ថុល អភិបាលរងស្រុកជីក្រែង បានណែនាំដល់ប្រជាពលរដ្ឋដែលមានដីនៅក្នុងឃុំឬស្សីលក ទាំង០៨ភូមិខាងលើ ត្រូវចូលរួមសហការជាមួយក្រុមការងារវាស់វែង និងចង្អុលបង្ហាញទីតាំងក្បាលដី ព្រំដី និងបោះបង្គោលច្បាស់លាស់ និងមានការឯកភាពគ្នា ចៀសវាងមានជម្លោះ ដើម្បីទទួលមកវិញនូវវិញ្ញាបនបត្រសម្គាល់ម្ចាស់អចលនវត្ថុទាំងអស់គ្នា។

លោកអភិបាលរងស្រុកបញ្ជាក់ថា ដីរបស់បងប្អូនពលរដ្ឋដែលបានចុះបញ្ជីដីធ្លីមានលក្ខណៈជាប្រព័ន្ធនេះ គឺទទួលបានអត្ថប្រយោជន៍ច្រើនណាស់ក្នុង ការលើកស្ទួយកម្រិតជីវភាពគ្រួសារ កាត់បន្ថយទំនាស់ដីធ្លី ធានាសុវត្ថិភាពក្នុងការកាន់កាប់ដីធ្លី ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដដែលត្រូវបានការពារដោយច្បាប់ និងធានាដោយរដ្ឋ ដែលអាចបង្កបង្កើនផល និងប្រកបរបរផ្សេងៗលើដីរបស់ខ្លួនដោយគ្មានការព្រួយបារម្ភឡើយ៕

ដោយ ឃុត សៅ