AKP ភ្នំពេញ ថ្ងៃទី០៥ ខែមីនា ឆ្នាំ២០២៥-- ក្នុងឆ្នាំ២០២៤ ក្រសួងមហាផ្ទៃបានសហការជាមួយអាជ្ញាធរជាតិប្រយុទ្ធប្រឆាំងគ្រឿងញៀន ក្រសួង ស្ថាប័នពាក់ព័ន្ធ និងគណៈកម្មាធិការត្រួតពិនិត្យគ្រឿងញៀន រាជធានី ខេត្ត ផ្សព្វផ្សាយអប់រំលើកកម្ពស់ការយល់ដឹងអំពីបញ្ហាគ្រឿងញៀនបានចំនួន១៤៦.៥៦៦លើក អ្នកចូលរួមសរុបចំនួន២៤.៤៦៤.០៦០អង្គ/នាក់។ នេះបើតាមលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ។

អ្នកនាំពាក្យរងរូបនេះបានឱ្យដឹងដែរថា ផ្អែកតាមព័ត៌មានជំនាញ និងការស្រាវជ្រាវ ស៊ើបអង្កេតឆ្នាំ២០២៤កន្លងទៅសមត្ថកិច្ចបើកប្រតិបត្តិការបង្ក្រាបបទល្មើសគ្រឿងញៀនបានចំនួនជាង៤ពាន់ករណី និងឃាត់ខ្លួនមនុស្សជាង១ម៉ឺននាក់ បើធៀបទៅនឹងចំណុចដៅដែលកំណត់ គឺស្ថិតក្នុងកម្រិតល្អប្រសើរ ដ្បិតតែចំនួននៃករណីបង្ក្រាបមានកំណើនជាងឆ្នាំ២០២៣។

លោកបណ្ឌិត ទូច សុឃៈ បានគូសបញ្ជាក់ថា ដើម្បីឆ្លើយតបស្ថានភាពជាក់ស្តែង ក៏ដូចជាដើម្បីពង្រឹងប្រសិទ្ធភាពនៃការប្រយុទ្ធប្រឆាំងគ្រឿងញៀនខុសច្បាប់ ក្រសួងមហាផ្ទៃ បានរៀបចំកែសម្រួលភារកិច្ច និងសមាសភាពនៃគណៈកម្មាធិការសម្របសម្រួល ជំរុញអនុវត្ត និងត្រួតពិនិត្យការងារប្រយុទ្ធប្រឆាំងគ្រឿងញៀននៃក្រសួងមហាផ្ទៃឡើងវិញ ព្រមទាំងរៀបចំដាក់ឱ្យអនុវត្តផែនការសកម្មភាព និងធ្វើការផ្សព្វផ្សាយជូនដល់សមាសភាពពាក់ព័ន្ធនៅក្រោមឱវាទក្រសួងមហាផ្ទៃសរុបចំនួន៤៥០រូប។

សូមបញ្ជាក់ថា យោងតាមរបាយការណ៍ស្ដីពីលទ្ធផលការងារឆ្នាំ២០២៤ និងលើកទិសដៅការងារបន្តឆ្នាំ២០២៥របស់ក្រសួងមហាផ្ទៃ សមត្ថកិច្ចបង្ក្រាបករណីគ្រឿងញៀនចំនួនជាង៤ពាន់ករណី សារធាតុញៀនចំនួនជាង៥តោន ឃាត់ខ្លួនបានចំនួនជាង១ម៉ឺននាក់ ក្នុងនោះមានជនបរទេសជាង៤រយនាក់៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)