AKP ភ្នំពេញ ថ្ងៃទី០៥ ខែមីនា ឆ្នាំ ២០២៥

កាលពីមុននេះស្រ្តីត្រូវបានគេគិតថាជាភេទទន់ខ្សោយ ស្រ្តីបង្វិលចង្រ្កានមិនជុំ ប៉ុន្តែពេលបច្ចុប្បន្នស្រ្តីបានដើរតួនាទីសំខាន់ដែលត្រូវបានគេចាត់ទុកថាជាឆ្អឹងខ្នងសេដ្ឋកិច្ច ក្នុងនេះសេដ្ឋកិច្ចទាំងក្នុងសង្គម សេដ្ឋកិច្ចទាំងក្នុងគ្រួសារ ដែលនេះជាអ្វីរាជរដ្ឋាភិបាល បានយកចិត្តទុកដាក់។ ស្រ្តីបើទោះបីយើងចាត់ទុកថាជាភេទទន់ខ្សោយ ប៉ុន្តែ ស្មារតី បញ្ញា របស់ស្រ្តី មិនទន់ខ្សោយទេ ស្រ្តីខ្លះមានបញ្ញាខ្លាំងជាងបុរសទៅទៀត។ នេះជាការថ្លែងបញ្ជាក់របស់ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន ក្នុងឱកាសពិធីអបអរសាទរខួបលើកទី១១៤ ទិវាអន្ដរជាតិនារី ៨មីនា ឆ្នាំ២០២៥ ក្រោមប្រធានបទ “សិទ្ធិ សមភាព និងភាពអង់អាចចំពោះស្រ្ដី និងក្មេងស្រីគ្រប់រូប” ដោយមានការអញ្ជើញចូលរួមពីលោកជំទាវ ទុយ សិរីរតនៈ ប្រធានកិត្តិយស សមាគមនារី ដើម្បីសន្តិភាព និងអភិវឌ្ឍន៍ សាខាក្រសួងព័ត៌មាន នារសៀលថ្ងៃទី០៥ ខែ មីនា ឆ្នាំ២០២៥ នៅក្រសួងព័ត៌មាន។

ឯកឧត្តម នេត្រ ភក្រ្ដា បានមានប្រសាសន៍ថា៖ «យើងមិនត្រូវមើលត្រឹមតែជាភេទទន់ខ្សោយរបស់ស្រ្តីទេ តែផ្ទុយមកវិញយើងត្រូវមើលអំពីសមត្ថភាពរបស់គាត់ យើងត្រូវមើលអំពីទេពកោសល្យរបស់គាត់ និងត្រូវមើលតួនាទីសកម្មរបស់គាត់ ។ អីចឹងហើយបានជារាជរដ្ឋាភិបាលកម្ពុជា បញ្ចូលទៅក្នុងក្របខ័ណ្ឌថ្នាក់ដឹកនាំតាំងតែពីកំពូលរហូតដល់ក្រោមពោលគឺតែងតែមានស្រ្តី»។ ឯកឧត្តមរដ្ឋមន្រ្តីបានថ្លែងបញ្ជាក់ថា ចំនួនមន្រ្តីថ្នាក់ជាតិ និងបូករួមជាមួយសមាគមនារីកម្ពុជាដើម្បីសន្តិភាព និងអភិវឌ្ឍន៍សាខាក្រសួងព័ត៌មាន មានសរុបចំនួន៥៨៧រូប។

ឯកឧត្តមរដ្ឋមន្រ្តីបានលើកឡើងថា កម្ពុជាឆ្លងកាត់សង្រ្គាម ហើយទើបតែទទួលបាននូវសុខសន្ដិភាពពេញលេញរយៈពេល២៦ឆ្នាំក៏ដោយ ប៉ុន្តែការគោរពសិទ្ធិមនុស្ស គោរពសិទ្ធិស្រ្តី ការលើកតម្កើង និងការអនុវត្តយេនឌ័រក្នុងសង្គមកម្ពុជាត្រូវបានកោតសរសើរ ហើយជាទីទទួលស្គាល់របស់អង្គការក្នុងបណ្តាប្រទេសមួយចំនួននៅលើពិភពលោក ដោយក្នុងនោះបានចាត់ទុកថាកម្ពុជាឈានមុខក្នុងការគោរពទៅលើសិទ្ធិស្រ្តី។ ឯកឧត្ដមរដ្ឋមន្រ្ដីក្រសួងព័ត៌មានបានគូសបញ្ជាក់ថា ការគោរពទៅលើស្រ្តីនេះក៏បានឆ្លុះបញ្ចាំងពីចំនួនប្រជាពលរដ្ឋផងដែរ ដែលបច្ចុប្បន្នប្រជាជនកម្ពុជាមានជាង១៧លាននាក់ ក្នុងនេះស្រ្តីមានចំនួន៥២ភាគរយ បុរសមានតែ៤៨ភាគរយទេដែលនេះជាអត្រាកំណើតរបស់ប្រជាពលរដ្ឋកម្ពុជា។

ជាមួយគ្នានេះ ឯកឧត្តម នេត្រ ភក្រ្តា បានបញ្ជាក់បន្ថែមថា ទោះបីយ៉ាងណាបើក្រឡេកមើលក្នុងក្របខ័ណ្ឌ នៃមន្រ្តីរាជការដែលបំពេញការងារនៅទូទាំងប្រទេសគឺមាន៤៨ភាគរយជានារី ក្នុងនោះ កម្រិតជាអ្នកនាំនៅមានចំនួនតិចនៅឡើយ តែកម្រិតជើងក្រោមវិញគឺមានចំនួនច្រើន។ ចំណែកក្នុងក្របខ័ណ្ឌដឹកនាំក្បាលម៉ាស៊ីនរដ្ឋ ដូចជាអំណាចរដ្ឋទាំង៣ គឺអំណាចនីតិប្បញ្ញត្តិ អំណាចនីតិប្រតិបត្តិ និងអំណាចតុលាការ គឺមានស្រ្តី ក្នុងចំណោមថ្នាក់ដឹកនាំបក្ស យើងក៏មានថ្នាក់ដឹកនាំជាស្រ្តី ក្នុងក្របខ័ណ្ឌគណៈរដ្ឋមន្រ្តី ក៏មានរដ្ឋមន្រ្តីជាស្រ្តីចំនួន៣រូប ហើយក៏មានថ្នាក់ដឹកនាំសមាជិកសភា សមាជិកព្រឹទ្ធិសភាស្រ្តីក៏មានការកើនឡើងដូចគ្នា។ ឯកឧត្ដមរដ្ឋមន្រ្ដីអះអាងថា ទាំងអស់នេះជាចំណុចមួយដែលយើងមានមោទនភាព។

សូមជម្រាបជូនផងដែរថា ទិវាអន្តរជាតិនារី ៨មីនា ឆ្នាំ២០២៥ ខួបលើកទី១១៤ ត្រូវបានប្រារព្ធឡើងក្នុងគោលបំណងដើម្បីគូសបញ្ជាក់អំពីសារៈសំខាន់នៃការទទួលបាន និងអនុវត្តន៍សិទ្ធិ ការលើកកម្ពស់សមភាព និងការពង្រឹងភាពអង់អាចចំពោះស្ត្រីនិងក្មេងស្រីគ្រប់រូបនៅកម្ពុជា។ ប្រធានបទនេះ ក៏ផ្តោតសំខាន់ផងដែរ លើការលើកកម្ពស់ផលជះជាវិជ្ជមាន និងទាញយកអត្ថប្រយោជន៍ពីភាគលាភយេនឌ័រជូនគ្រួសារ ពង្រឹងសហគមន៍ និងវឌ្ឍនភាពសង្គម ជំរុញកំណើនការអភិវឌ្ឍសេដ្ឋកិច្ច និងលើកកម្ពស់សុខុមាលភាពសង្គម ជាមួយការឆ្លុះបញ្ចាំងអំពីវឌ្ឍនភាព សមិទ្ធផល បញ្ហាប្រឈម កាលានុវត្តភាពនានា ជាពិសេសបង្ហាញពីការប្តេជ្ញាចិត្ត និងវិធានការវិជ្ជមានក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី និងក្មេងស្រីគ្រប់រូប៕

ដោយ៖ ដេប៉ូ រូបថត៖ ខឹម សុវណ្ណារ៉ា