AKP ព្រះសីហនុ ថ្ងៃទី០៤ ខែមីនា ឆ្នាំ២០២៥-- ឯកឧត្តម បណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានអញ្ជើញដឹកនាំមន្ត្រីបច្ចេកទេសចុះពិនិត្យវឌ្ឍនភាពនៃគម្រោងសាងសង់របស់ក្រុមហ៊ុម ផឹនីនស៊្យូឡឺ បេ អ៊ិនវេសម៉ិន ឯ.ក (Peninsula Bay Investment Co., Ltd.) មានទីតាំងស្ថិតនៅសង្កាត់លេខ៤ ក្រុង-ខេត្តព្រះសីហនុ កាលពីរសៀលថ្ងៃចន្ទ ទី០៣ ខែមីនា ឆ្នាំ២០២៥។

លោក LAI XIAO BO Project Manager ក្រុមហ៊ុន ផឹនីនស៊្យូឡឺ បេ អ៊ិនវេសម៉ិន ឯ.ក (Peninsula Bay Investment Co., Ltd.) បានឱ្យដឹងថា គម្រោងនេះសាងសង់សម្រេចបានប្រមាណជា៣០ភាគរយ ដោយចែកចេញជា ២តំបន់ គឺតំបន់A និងតំបន់B។  តំបន់B មានដូចជាអគារខុនដូរ អគារពាណិជ្ជកម្ម អាចសាងសង់ហើយរួចរាល់នៅចុងឆ្នាំ២០២៥ ដោយឡែកតំបន់ A មានដូចជា សណ្ឋាគារលំដាប់ផ្កាយ៥ ផ្សារទំនើប និងសួនកម្សាន្តផ្សេងៗទៀត គ្រោងនឹងបញ្ចប់ការងារសាងសង់នៅឆ្នាំ២០២៨។ ចំពោះហាងលក់ដូរនៅតាមបណ្តោយឆ្នេរផ្នែកខាងក្រោម មានលក់ទំនិញជាច្រើនប្រភេទ ដែលជាផលិតផលប្រេនៗនាំចូលមកពីប្រទេសបារាំងយកមកដាក់តាំងលក់ ក្នុងនោះក៏មានសួនកម្សាន្តលំដាប់ដែលអាចទាក់ទាញភ្ញៀវទេសចរផងដែរ។ ក្រុមហ៊ុនបានធ្វើការវិនិយោគនៅលើផ្ទៃដីចំនួន១៥,៨ហិកតា ដែលមានអគាររហូតដល់៩០ម៉ឺនការ៉េ នៅពេលសាងសង់រួមក្រុមហ៊ុននឹងផ្តល់ការងារជូនប្រជាពលរដ្ឋកម្ពុជា ប្រមាណជា ៥ ០០០នាក់។

ទន្ទឹមនឹងនេះ លោក LAI XIAO BO បានបន្តថា ឯកឧត្តម បណ្ឌិតសភាចារ្យ រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងឯកឧត្តមអភិបាលខេត្តព្រះសីហនុ បានដឹកនាំប្រតិភូអញ្ជើញចុះមកពិនិត្យវឌ្ឍនភាពនៃគម្រោងសាងសង់របស់ក្រុមហ៊ុន និងបានជំរុញឱ្យក្រុមហ៊ុនពន្លឿនដំណើរការសាងសង់ ក្នុងនោះក៏បានពិនិត្យការងារបច្ចេកទេសផ្សេងៗទៀតពាក់ព័ន្ធនឹងអាងប្រព្រឹត្តកម្ម បរិស្ថាន អនាម័យជាដើម ព្រមទាំងចូលរួមដោះស្រាយចំណុចពាក់ព័ន្ធមួយចំនួនក្នុងការដ្ឋាន ហើយចំពោះការងារសាង់សង់នាពេលនេះ ក្រុមហ៊ុនផ្តោតសំខាន់ទៅលើអនាម័យ បរិស្ថាន និងសោភ័ណភាពជាចម្បងផងដែរ។

ក្នុងឱកាសដឹកនាំមន្ត្រីបច្ចេកទេសចុះពិនិត្យវឌ្ឍនភាពនៃគម្រោងសាងសង់របស់ក្រុមហ៊ុន ផឹនីនស៊្យូឡឺ បេ អ៊ិនវេសម៉ិន ឯ.ក ក្នុងក្រុងព្រះសីហនុ ឯកឧត្តម បណ្ឌិតសភាចារ្យ រដ្ឋលេខាធិការក្រសួងហិរញ្ញវត្ថុ ឯកឧត្តម ម៉ាង ស៊ីណេត អភិបាលខេត្តព្រះសីហនុ ក៏បានថ្លែងអំណរគុណក្រុមហ៊ុន ដែលបានបោះទុនវិនិយោគនៅខេត្តតំបន់ឆ្នេរនៃព្រះរាជាណាចក្រកម្ពុជា ដើម្បីជួយបង្កើនការងារ ក៏ដូចបង្កើនសេដ្ឋកិច្ចរបស់ព្រះរាជាណាចក្រកម្ពុជា និយាយដោយឡែកបង្កើនសេដ្ឋកិច្ចនៅខេត្តព្រះសីហនុ ចូលរួមកាត់បន្ថយភាពក្រីក្រ ព្រមទាំងបានជំរុញឱ្យក្រុមហ៊ុនពន្លឿនការងារសាងសង់។ ទន្ទឹមនឹងការសាងសង់ត្រូវរៀបចំអាងប្រព្រឹត្តកម្មទឹកកខ្វក់ឱ្យបានត្រឹមត្រូវ ដើម្បីធានាថា គម្រោងសាងសង់របស់ក្រុមហ៊ុនអនុវត្តតាមលក្ខណៈស្តង់ដារបច្ចេកទេសត្រឹមត្រូវ មិនមានការបំពុលបរិស្ថាននៅជុំវិញ ហើយរាជរដ្ឋាភិបាល ក៏ដូចរដ្ឋបាលខេត្តគាំទ្រនូវគម្រោងសាងសង់របស់ក្រុមហ៊ុន និងរង់ចាំជួយសម្របសម្រួលដោះស្រាយបញ្ហាប្រឈមឱ្យបានទាន់ពេលវេលា ដើម្បីធ្វើយ៉ាងណាឱ្យដំណើរការការងារសាងសង់របស់ក្រុមហ៊ុនប្រព្រឹត្តទៅមានភាពរលូនតាមការគ្រោងទុក ស្របទៅនឹងគោលនយោបាយបញ្ចកោណរបស់រាជរដ្ឋាភិបាល នីតិកាលទី៧នៃរដ្ឋសភា។ ម្យ៉ាងទៀតរាជរដ្ឋាភិបាលបានដាក់ចេញនូវគោលនយោបាយលើកទឹកចិត្តជំរុញការវិនិយោគនៅខេត្តព្រះសីហនុឆ្នាំ២០២៤ បន្តដល់ឆ្នាំ២០២៥ ដល់ក្រុមហ៊ុន សហគ្រាសមកធ្វើការវិនិយោគនៅក្នុងខេត្តព្រះសីហនុ៕

ដោយ ងូ សុមុនី