AKP ភ្នំពេញ ថ្ងៃទី០៤ ខែមីនា ឆ្នាំ២០២៥--លោក អ៊ួ តារា អគ្គលេខាធិការ សហព័ន្ធកីឡាបញ្ចស៊ីឡាត់កម្ពុជាបានថ្លែងប្រាប់ទីភ្នាក់ងារសារព័ត៌មានកម្ពុជា AKP នៅព្រឹកថ្ងៃទី០៤ ខែមីនានេះថា សហព័ន្ធបានយកការប្រកួតជើងឯកថ្នាក់ជាតិ ឆ្នាំ២០២៥ ឆាប់នេះ ជាការសម្រួចគោលដៅឆ្ពោះទៅប្រជែងមេដាយជូនជាតិ នៅក្នុងការប្រកួតកីឡាស៊ីហ្គេម លើកទី៣៣ នាខែធ្នូ ឆ្នាំ២០២៥ នៅប្រទេសថៃ។

សហព័ន្ធកីឡាបញ្ចស៊ីឡាត់កម្ពុជា បានប្រកាសជូនដំណឹងដល់សមាគម សាលាគុនបញ្ចស៊ីឡាត់តាមបណ្តាក្រសួង រាជធានី-ខេត្តទាំងអស់ថា សហព័ន្ធគ្រោងនឹងរៀបចំការប្រកួតកីឡាបញ្ចស៊ីឡាត់ ជ្រើសរើសជើងឯកថ្នាក់ជាតិ នាថ្ងៃទី០៧-០៨ ខែមីនា ឆ្នាំ២០២៥ នៅសាលនៃសាកលវិទ្យាល័យភូមិន្ទភ្នំពេញ។ លោក អ៊ួ តារា បានលើកឡើងថា បញ្ចស៊ីឡាត់ជាប្រភេទកីឡាថ្មីមួយសម្រាប់កម្ពុជា ដែលមានសណ្ឋាន និងទម្រង់ប្រហាក់ប្រហែលគ្នាទៅនឹងកីឡាប្រពៃណីខ្មែរយើងដែរ គឺកីឡាគុនល្បុក្កតោ។ ដោយសំឡឹងឃើញថា កីឡាករ កីឡាការិនីកម្ពុជាមានទេពកោសល្យ ក្នុងការលេងបញ្ចស៊ីឡាត់ ដែលមានប្រភពមកពីប្រទេសឥណ្ឌូណេស៊ីនេះ គឺកម្ពុជាទទួលបានលទ្ធផលល្អ ក្នុងការប្រកួតអន្តរជាតិនានា។

លោកអគ្គលេខាធិការសង្ក់តធ្ងន់ថា ៖«នាខែធ្នូ ឆ្នាំ២០២៥ ប្រទេសថៃនឹងទទួលរៀបចំធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣៣ ហើយបញ្ចស៊ីឡាត់នេះក៏ត្រូវបានដាក់បញ្ជូលឱ្យប្រកួត ក្នុងស៊ីហ្គេម ឆ្នាំ២០២៥នេះដែរ។ ដូច្នេះ សហព័ន្ធកីឡាបញ្ចស៊ីឡាត់កម្ពុជា ក្រោមការដឹកនាំរបស់ឯកឧត្តម សេង ធារិន ប្រធានសហព័ន្ធ ក៏ដូចជាសមាជិកគណៈកម្មាធិការប្រតិបត្តិទាំងមូលបានជំរុញឱ្យមានការប្រកួតជើងឯកថ្នាក់ជាតិនេះឡើង ដើម្បីបើកឱកាសដល់កីឡាករ កីឡាការិនី យុវជនខ្មែរបានចូលរួមប្រកួតប្រជែង ស្វែងរកធនធាន សម្រួចគោលដៅ ឆ្ពោះទៅប្រជែងមេដាយជូនជាតិ ក្នុងស៊ីហ្គេម ចុងឆ្នាំ២០២៥ នៅប្រទេសថៃ និងត្រៀមចូលរួមប្រកួតអន្តរជាតិនានាផងដែរ»។

លោក អ៊ួ តារា គូសបញ្ជាក់បន្ថែមទៀតថា ដោយសារតែសហព័ន្ធនេះថ្មី មិនទាន់ទទួលបានបញ្ចប់ថវិកាគាំទ្រប្រចាំឆ្នាំដូចសហព័ន្ធដទៃនៅឡើយទេ ប៉ុន្តែគណៈកម្មាធិការប្រតិបត្តិតែងតែប្រឹងប្រែងជំរុញការងារអភិវឌ្ឍប្រភេទកីឡាថ្មីមួយនេះ នៅកម្ពុជាដូចប្រភេទកីឡាផ្សេងៗដែរ។ ជាក់ស្តែង សហព័ន្ធបញ្ចស៊ីឡាត់កម្ពុជាបានបញ្ជូនកីឡាករ កីឡាការិនីរបស់ខ្លួនទៅចូលរួមប្រកួតអន្តរជាតិនានា និងកម្រិតពិភពលោក ដែលចុងក្រោយនេះ គឺអត្តពលិកបញ្ចស៊ីឡាត់កម្ពុជាដណ្តើមមបានមេដាយសំរឹទ្ធពីការប្រកួតជើងឯកពិភពលោក នៅ Abu Dhabi។ ការប្រកួតជើងឯកថ្នាក់ជាតិ ឆ្នាំ២០២៥នេះ គឺប្រើប្រាស់ថវិកាផ្ទាល់របស់សមាជិកគណៈកម្មាធិការប្រតិបត្តិសហព័ន្ធបញ្ចស៊ីឡាត់កម្ពុជា ដោយយើងបានសំឡឹងមើលឱកាស ក្នុងការដណ្តើមមេដាយ និងកិត្តិយសជូនជាតិ ពីលើឆាកអន្តរជាតិ។

លោក អ៊ួ តារា អគ្គលេខាធិការ សហព័ន្ធកីឡាបញ្ចស៊ីឡាត់កម្ពុជាបានគូសបញ្ជាក់ថា នេះការរៀបចំការប្រកួតជើងឯកថ្នាក់ជាតិ ប្រចាំឆ្នាំ២០២៥ ក្រោមការគាំទ្ររបស់ក្រសួងអប់រំ យុវជន និងកីឡា។ នេះជាការប្រកួតក្នុងកម្រិតថ្នាក់ជាតិមួយ ដែលសហព័ន្ធបានរៀបចំ១៥វិញ្ញាសាបុរស-នារី ក្នុងនោះមានវិញ្ញាសាប្រយុទ្ធផ្នែកបុរស ចំនួន៩ ប្រភេទទម្ងន់ និងនារីមានចំនួន៦ប្រភេទទម្ងន់។ ចំពោះផ្នែកបុរស ដែលមាន៩វិញ្ញាសា  គឺជាប្រភេទវិញ្ញាសាប្រយុទ្ធ ប្រភេទម្ងន់ ៤៨-៥១ គ.ក្រ, ៥១-៥៤ គ.ក្រ, ៥៤-៥៧ គ.ក្រ, ៥៧-៦០គ.ក្រ, ៦០-៦៣ គ.ក្រ, ៦៣-៦៦ គ.ក្រ, ៦៦-៦៩ គ.ក្រ, ៦៩-៧២ គ.ក្រ, និងប្រយុទ្ធទម្ងន់ ៧២-៧៥ គ.ក្រ។ រីឯ ៦វិញ្ញាសាផ្នែកនារីមាន ប្រយុទ្ធប្រភេទម្ងន់ ៤០-៤៣ គ.ក្រ, ៤៣-៤៦ គ.ក្រ, ៤៦-៤៩ គ.ក្រ, ៤៩-៥២គ.ក្រ, ៥២-៥៥ គ.ក្រ, និង៥៥-៥៨ គ.ក្រ៕

ដោយ ហេង ណាលីន