AKP សៀមរាប ថ្ងៃទី០៣ ខែមីនា ឆ្នាំ២០២៥ -- គម្រោងផែនការធំៗចំនួន៣៩ ដែលមានតម្លៃជិត៤០លានដុល្លាអាមេរិក បាន និងកំពុងអនុវត្តយ៉ាងសកម្មនៅក្នុងវិស័យបោសសម្អាតមីន និងសំណល់សង្គ្រាមនៅកម្ពុជាក្នុងឆ្នាំ២០២៥។ នេះបើតាមការលើកឡើងរបស់ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ ក្នុងពិធីបើករបបប្រាក់ឧបត្ថម្ភអតីតភាពបម្រើការងារជូនយោធិនពលី ពិការ មរណៈ សោធននិវត្តន៍ ដែលជាអតីតមន្រ្តីអង្គភាពស៊ីម៉ាក់ នាថ្ងៃទី០៣ ខែមីនា ឆ្នាំ២០២៥នេះ នៅសារមន្ទីរតេជោសន្តិភាព ខេត្តសៀមរាប។

ឯកឧត្តម ហេង រតនា បានលើកឡើងថា នៅក្នុងឆ្នាំ២០២៥ ស៊ីម៉ាក់មានគម្រោងផែនការចំនួន៣៩ ដែលគម្រោងទាំងអស់នោះបានប្រើប្រាស់ថវិកាដែលជាជំនួយរបស់ដៃគូនានា មានតម្លៃជិត៤០លានដុល្លាអាមេរិក ក្នុងនោះក៏មានគម្រោងជាជំនួយសម្ភារបច្ចេកទេសមានតម្លៃជាង១៦លានដុល្លាអាមេរិកផងដែរ។ ដូច្នេះយើងមានថវិកាគាំទ្រសកម្មភាពបោសសម្អាតមីន និងយុទ្ធភណ្ឌមិនទាន់ផ្ទុះនៅទូទាំងប្រទេសប្រមាណជាង២០លានដុល្លាអាមេរិក។

ឯកឧត្តម ហេង រតនា ក៏បានឱ្យដឹងដែរថា បច្ចុប្បន្នស៊ីម៉ាក់មានកងកម្លាំងប្រមាណជា២០០០នាក់ និងកម្លាំងស្ម័គ្រចិត្តប្រមាណជាង១ម៉ឺននាក់។ ជាមួយគ្នានេះស៊ីម៉ាក់ក៏កំពុងធ្វើការជាមួយកម្លាំងនគរបាលប្រមាណ៥ពាន់នាក់នៅទូទាំងប្រទេស នៅក្នុងការឆ្លើយតបការអន្តរាគមន៍នៅពេលប្រទះឃើញគ្រាប់មីន ឬយុទ្ធភណ្ឌមិនទាន់ផ្ទុះ។

សូមជម្រាបថា ក្រសួងការពារជាតិ តាមរយៈអនុគណៈកម្មការបើកប្រាក់ឧបត្ថម្ភគោលនយោបាយ បានធ្វើការបើកជូនរបបប្រាក់ឧបត្ថម្ភនេះជូនយោធិនសោធននិវត្តន៍ ដែលជាអតីតមន្ត្រី បុគ្គលិករបស់ស៊ីម៉ាក់ ចាប់តាំងពីឆ្នាំ២០១៨ ដល់ឆ្នាំ២០២៥ មានចំនួនប្រមាណជា១៣០០នាក់ ដោយក្នុងឆ្នាំ២០២៥នេះ អនុគណៈកម្មការបានបើកប្រាក់របបឧបត្ថម្ភនេះ ជូនចំនួន៣៥៣នាក់ ក្នុងនោះ៤៧នាក់បានបើកជូនកាលពីថ្ងៃទី០៧ ខែកុម្ភៈ ឆ្នាំ២០២៥ នៅទីបញ្ជាការកណ្តាលភ្នំពេញ ដោយឡែកសម្រាប់វគ្គទី២នៅថ្ងៃទី០៣ ខែមីនា នេះអនុគណៈកម្មការបើកជូនចំនួន៣០៦បន្ថែមទៀត។

ឯកឧត្តម នាយឧត្ដមសេនីយ៍ ភួង ស៊ីផាន រដ្ឋលេខាធិការក្រសួងការពារជាតិ និងជាប្រធានគណៈកម្មាធិការបញ្ចូលក្របខ័ណ្ឌ និងប្រគល់ឋានន្ដរស័កកងយោធពលខេមរភូមិន្ទ បានថ្លែងនូវការកោតសសើរដល់កិច្ចខិតខំប្រឹងប្រែងរបស់បងប្អូនមន្ត្រី បុគ្គលិក ដែលជាកងកម្លាំងរបស់ស៊ីម៉ាក់ទាំងអស់ដែលបានខិតខំទាំងកម្លាំងកាយចិត្តក្នុងការកែប្រែដីចម្ការមីនទៅជាដីកសិកម្ម។ ក្នុងពេលមានសង្គ្រាមកងកម្លាំងស៊ីម៉ាក់ក៏ធ្វើការ ក្រោយពេលចប់សង្គ្រាមប្រទេសមានសន្តិភាព ស៊ីម៉ាក់ក៏នៅតែជាកម្លាំងប្រយុទ្ធយ៉ាងសកម្ម ដើម្បីរំដោះផ្ទៃដីជូនពលរដ្ឋ កាត់បន្ថយគ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះ ស្របតាមគោលនយោបាយរបស់រាជរដ្ឋាភិបាលកម្ពុជា។

ឯកឧត្តម ភួង ស៊ីផាន បន្តថា ជាការឆ្លើយតបនឹងពលិកម្មរបស់កងកម្លាំងទាំងអស់ រួមទាំងកម្លាំងរបស់ស៊ីម៉ាក់ រាជរដ្ឋាភិបាលកម្ពុជា ទាំងអាណត្តិមុនៗដែលដឹកនាំដោយសម្តេចតេជោ ហ៊ុន សែន និងអណត្តិទី៧ដែលកំពុងដឹកនាំដោយសម្តេចធិបតី ហ៊ុន ម៉ាណែត តែងតែបានគិតគូរយកចិត្តទុកដាក់យ៉ាងខ្លាំងចំពោះសុខទុក្ខ និងជីវភាពរស់នៅ ពោលគឺរាជរដ្ឋាភិបាលបានជួយបងប្អូនតាំងពីថ្ងៃចូលបម្រើការងារ រហូតដល់ថ្ងៃដែលបងប្អូនធ្វើមរណកាល។

គួរបញ្ជាក់ថា ក្នុងរយៈពេលជាង៣០ឆ្នាំកន្លងមក សកម្មភាពបោសសម្អាតមីនមនុស្សធម៌ និងសមិទ្ធផលដែលសម្រេចបានដោយអង្គភាពស៊ីម៉ាក់ សម្រេចបានការរំដោះផ្ទៃដីសរុបចំនួន ១.១០០គីឡូម៉ែត្រក្រឡា ស្មើនឹង៥៦%នៃផ្ទៃដីសរុបដែលបានបោសម្អាតមីនរួច។ ជាមួយគ្នានេះស៊ីម៉ាកក៏បានរុករកឃើញ និងកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួនជាង ៣លាន ១សែនគ្រាប់ផងដែរ៕

ដោយ ឃុត សៅ