AKP បន្ទាយមានជ័យ ថ្ងៃទី០៣ ខែមីនា ឆ្នាំ២០២៥--ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ អមដំណើរដោយក្រុមការងារ លោក កែវ តារារស្មី អភិបាលស្រុកអូរជ្រៅ កាលពីថ្ងៃទី០២ ខែមីនា ឆ្នាំ២០២៥ បានចុះដឹកនាំក្រុមការងារចុះពិនិត្យមើលផ្ទះរបស់បងប្អូនប្រជាពលរដ្ឋដែលរងគ្រោះដោយសារខ្យល់កន្ត្រាក់របើកដំបូលចំនួន៤២ខ្នងក្នុងឃុំសំរោង និងឃុំគុត្តសតក្នុងស្រុកអូរជ្រៅ និងបានដឹកនាំកងកម្លាំងតំបន់ប្រតិបត្តិការសឹករងខេត្តកម្លាំងនគរបាលស្រុកឃុំជួយរើ និងជួសជុលឱ្យបានល្អប្រសើរឡើងវិញ។

ក្នុងឱកាសនោះ ឯកឧត្តម អ៊ុំ រាត្រី បានសម្តែងនូវការសោកស្តាយចំពោះបងប្អូនប្រជាពលរដ្ឋដែលរងគ្រោះ និងបានលើកទឹកចិត្តបងប្អូនប្រជាពលរដ្ឋទាំងអស់កុំឱ្យបាក់ទឹកចិត្ត និងខិតខំប្រឹងប្រែងរស់នៅបន្តទៀត។ ឯកឧត្តម ក៏បានណែនាំដល់អាជ្ញាធរមូលដ្ឋាន ត្រូវយកចិត្តទុកដាក់ជួយសង្គ្រោះបងប្អូនប្រជាពលរដ្ឋដែលរងគ្រោះ និងត្រៀមលក្ខណៈជួយសង្គ្រោះបងប្អូនប្រជាពលរដ្ឋនៅពេលមានគ្រោះមហន្តរាយកើតឡើង។

ជាមួយគ្នានោះដែរ ឯកឧត្តមក៏បានអំពាវនាវទៅដល់បងប្អូនប្រជាពលរដ្ឋត្រូវមានការប្រុងប្រយ័ត្នចំពោះបាតុភូតធម្មជាតិដែលតែងតែកើតមានឡើងបើក្នុងករណីអាកាសធាតុមិនងាយស្រួល និងបាន ណែនាំដល់ប្រជាពលរដ្ឋពេលមានខ្យល់កន្ត្រាក់សូមមេត្តារកកន្លែងមានសុវត្ថិភាពជាពិសេសកុំជ្រកក្រោមដើមឈើ ឬបង្គោលភ្លើង ដែលអាចបណ្តាលឱ្យកើតមានគ្រោះធម្មជាតិដូចជារន្ទះបាញ់ជាដើម។

សូមបញ្ជាក់ផងដែរថា កាលពីវេលាម៉ោង ៦និង៣០នាទីយប់ ថ្ងៃទី០១ ខែមីនា ឆ្នាំ២០២៥ នេះមានករណីខ្យល់កន្ត្រាក់បណ្តាលឱ្យប៉ះពាល់ដល់ផ្ទះប្រជាពលរដ្ឋចំនួន៤២ខ្នង និងបាក់បង្គោលភ្លើងចំនួន១ដើម ក្នុងឃុំចំនួន២រួមមាន ឃុំគុត្តសត ប៉ះពាល់ផ្ទះសរុបចំនួន១៤ខ្នងខូចខាតស័ង្កសីសរុបចំនួន៣២សន្លឹក និងបាក់បង្គោលភ្លើងចំនួន១ដើមនៅភូមិកូបតូច ឃុំសំរោងប៉ះពាល់ផ្ទះសរុបចំនួន២៨ខ្នងខូចខាតស័ង្កសីសរុបចំនួន២៩៨សន្លឹកលើភូមិចំនួន៧៕

ដោយ ឈុន សារ៉ាត