AKP ភ្នំពេញ ថ្ងៃទី០១ ខែមីនា ឆ្នាំ២០២៥-- សាខាកាកបាទក្រហមកម្ពុជាខេត្តកំពង់ចាម បាន រៀបចំពិធីសំណេះសំណាល អបអរខួបលើកទី១៤ ទិវាជាតិ សុខភាពមាតា ទារក និងកុមារ ២១ កុម្ភៈ ឆ្នាំ២០២៥ ក្រោមប្រធានបទ " ពង្រឹងភាពជាដៃគូរវាងសេវាសុខាភិបាលសាធារណ: និងសេវាឯកជន ដើម្បីលើកកម្ពស់គុណភាពនៃការថែទាំសុខភាពមាតា ទារក កុមារ និងយុវវ័យ" កាលពីថ្ងៃសុក្រ ទី២៨ ខែកុម្ភៈ ឆ្នាំ២០២៥ នៅសាលប្រជុំអនុសាខាកាកបាទក្រហមស្រុកកំពង់សៀម ក្រោមអធិបតីភាពលោកជំទាវ ប៉ាង ដានី អនុប្រធានអចិន្ត្រៃយ៍សាខា និងជាប្រធានក្រុមការងារឥស្សរជនឆ្នើមថ្នាក់ជាតិនៃសាខា តំណាងដ៏ខ្ពង់ខ្ពស់ ឯកឧត្តម អ៊ុន ចាន់ដា ប្រធាន គណៈកម្មាធិការសាខា  ដោយមានការចូលរួមពីលោក លោកស្រី ក្នុងក្រុមការងារឥស្សរជនឆ្នើមថ្នាក់ជាតិនៃសាខា លោក លោកស្រី សមាជិក សមាជិកាគណៈកម្មាធិការសាខា លោកប្រធានកិត្តិយស មន្ត្រីអនុសាខាស្រុក ក្រុមគ្រូពេទ្យមណ្ឌលសុខភាពឃុំ  ក្រុមកាកបាទក្រហមឃុំ យុវជន និងអ្នកស្ម័គ្រចិត្ត ព្រមទាំង បងប្អូន ជាស្ត្រីមានផ្ទៃពោះ និង ស្ត្រី មានកូនតូច សរុបចំនួន ១២៣ នាក់។

អង្គពិធីទាំងមូលបានតាមដានស្តាប់ដោយយកចិត្តទុកដាក់នូវខ្លឹមសារទាំងស្រុងនៃសារលិខិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិដើម្បីសុខភាពស្ត្រី និង កុមារ ដែលផ្ញើជូន បងប្អូន ជនរួមជាតិ ក្នុងឱកាសទិវាជាតិសុខភាពមាតា ទារក និងកុមារ ថ្ងៃទី ២១ ខែកុម្ភៈ ឆ្នាំ២០២៥ ដែលអាន ដោយលោកជំទាវ ប៉ាង ដានី អនុប្រធានអចិន្ត្រៃយ៍គណៈកម្មាធិការសាខា និងជាប្រធាន ក្រុមការងារឥស្សរជនឆ្នើមថ្នាក់នៃសាខា។

មានប្រសាសន៍សំណេះសំណាល លោកជំទាវ ប៉ាង ដានី បានអំពាវនាវដល់គ្រប់ថ្នាក់ គ្រប់ផ្នែក ត្រូវយកចិត្តទុកដាក់អនុវត្តតាមអនុសាសន៍៦ចំណុច  ដែលសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ បានអំពាវនាវក្នុងសារលិខិតនេះ ពិសេសស្រ្តីមានផ្ទៃពោះទាំងអស់ ត្រូវទៅពិនិត្យសុខភាពឱ្យបានទៀងទាត់យ៉ាងតិចចំនួន ៤ ដង តាមពេលវេលាកំណត់ ដើម្បីទទួលការពិនិត្យថែទាំ ទទួលបានវ៉ាក់សាំងបង្ការជំងឺ  ពិសេស ការស្ម័គ្រចិត្តធ្វើតេស្តរកមេរោគ ដើម្បីលុបបំបាត់ការចម្លងមេរោគអេដស៍/ស្វាយពីម្ដាយទៅកូន។  ត្រូវសម្រាលកូននៅមណ្ឌលសុខភាព ឬមន្ទីរពេទ្យ ដែលមានគ្រូពេទ្យជំនាញ ទទួលបានការបណ្ដុះបណ្ដាលត្រឹមត្រូវ។ ក្រោយពេលសម្រាល ស្ត្រីជាមាតាត្រូវទៅពិនិត្យសុខភាពដោយយកកូនទៅពិនិត្យផង ដើម្បីទទួលវ៉ាក់សាំងបង្ការជំងឺ១១មុខ តាមពេលវេលាកំណត់ ដោយយកចិត្តទុកដាក់ ពិនិត្យតាមដានសុខភាព និង ការលូតលាស់របស់កូន រហូតដល់កូនមានអាយុ ២ឆ្នាំ។  សូមយុវជន យុវតី និងស្ត្រីក្នុងវ័យបន្តពូជ ទៅពិគ្រោះយោបល់ ទទួលការណែនាំ ពិនិត្យព្យាបាលជំងឺ នៅមណ្ឌលសុខភាព ឬមន្ទីរពេទ្យ ហើយចូលរួមទប់ស្កាត់ជំងឺមហារីកមាត់ស្បូន ដោយនាំកុមារីអាយុ ៩ឆ្នាំ ទៅទទួលវ៉ាក់សាំងបង្ការជំងឺនេះ ឱ្យបានគ្រប់ៗគ្នា។

ទន្ទឹមនឹងនេះ លោកជំទាវប្រធានក្រុមការងារឥស្សរជនឆ្នើមថ្នាក់ជាតិនៃសាខា ក៏បានក្រើនរំលឹកដល់មន្ត្រី បុគ្គលិក យុវជន  អ្នកស្ម័គ្រចិត្តកាកបាទក្រហមកម្ពុជា និង អ្នកផ្តល់សេវាសុខាភិបាលទាំងអស់ ឱ្យខិតខំអនុវត្តគោលនយោបាយអាទិភាពរបស់រាជរដ្ឋាភិបាលកម្ពុជា ប្រកបដោយប្រសិទ្ធភាពខ្ពស់ ហើយសូមសហការជិតស្និទ្ធ ក្នុងការចូលរួមផ្សព្វផ្សាយសារអប់រំសុខភាព និងជួយតាមដាន ជំរុញ បញ្ជូនស្ត្រី ឬ យុវតី មកទទួលសេវា នៅមណ្ឌលសុខភាព ឬ មន្ទីរពេទ្យ ឱ្យបានទាន់ពេលវេលា ឬតាមការណាត់ជួប កុំបីខាន។

សូមជម្រាបជូនថា សម្តេចកិត្តិព្រឹទ្ធបណ្ឌិត ឥស្សរជនឆ្នើមថ្នាក់ជាតិ បានផ្តល់ជូនស្រ្តីដែលបានចូលរួម៨០នាក់ នូវវត្ថុអនុស្សាវរីយ៍ ដោយម្នាក់ទទួលបាន សារុង១ កន្សែងពោះគោធំ ២ សាប៊ូដុសខ្លួន១ដប ម្សៅលាបខ្លួនទារក១កំប៉ុង សំឡីអនាម័យស្ត្រី ៤ដុំ សាប៊ូម្សៅ ២កញ្ចប់ អង្ករសុខភាព២កញ្ចប់ និងថវិកា ៥០.០០០ រៀល។ បន្ទាប់ពីនោះ លោកជំទាវ ប៉ាង ដានី និងក្រុមការងារ ក៏បានបន្ត អញ្ជើញចុះសួរសុខទុក្ខ  ស្ត្រីមានផ្ទៃពោះ និង ស្ត្រីទើបសម្រាលកូននៅមណ្ឌលសុខភាពឃុំអំពិល ១៧នាក់ និង ស្រីមានកូនតូច ដែលខ្វះខាតជីវភាព នៅតាមខ្នងផ្ទះ ចំនួន ៣នាក់ ថែមទៀត ដោយបានឧបត្ថម្ភជូន ក្នុងម្នាក់ៗទទួលបានឃីត១ អង្ករសុខភាព២កញ្ចប់ រួមជាមួយ ថវិកាចំនួន៥០.០០០រៀលផងដែរ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)