AKP បន្ទាយមានជ័យ ថ្ងៃទី០១ ខែមីនា ឆ្នាំ២០២៥-- លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានជំរុញដល់កងកម្លាំងនគរបាលត្រូវបន្តខិតខំប្រឹងប្រែងបំពេញភារកិច្ចឱ្យបានល្អប្រសើរ ដើម្បីរួមចំណែកថែរក្សាសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ជូនប្រជាពលរដ្ឋក្នុងខេត្តបន្ទាយមានជ័យ។ ការជំរុញបែបនេះក្នុងឱកាស លោកឧត្តមសេនីយ៍ទោ សិទ្ធិ ឡោះ  បានដឹកនាំកិច្ចប្រជុំបូកសរុបលទ្ធផលការងារត្រីមាសទី១ ឆ្នាំ២០២៥ និងលើកទិសដៅការងារបន្ត ដោយមានការចូលរួមពីសំណាក់មន្ត្រីនគរបាលជាន់ខ្ពស់ និងមន្ត្រីពាក់ព័ន្ធជាច្រើនរូបទៀត កាលពីរសៀលថ្ងៃទី២៨ ខែកុម្ភៈ ឆ្នាំ២០២៥។

ក្នុងកិច្ចប្រជុំនោះ លោកឧត្តមសេនីយ៍ទោ សិទ្ធិ ឡោះ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងនគរបាលទាំងអស់ ដែលបានបំពេញភារកិច្ចយ៉ាងសកម្មក្នុងការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងរយៈពេលត្រីមាសទី១ ឆ្នាំ២០២៥ និងបានលើកឡើងពីសមិទ្ធផលសំខាន់ៗមួយចំនួនដូចជាការបង្ក្រាបបទល្មើសផ្សេងៗ ជាពិសេសបទល្មើសគ្រឿងញៀន និងបទល្មើសព្រហ្មទណ្ឌ ការបង្ក្រាបក្មេងទំនើង ការកាត់បន្ថយគ្រោះថ្នាក់ចរាចរណ៍ជាដើម ការផ្តល់សេវាសាធារណៈជូនប្រជាពលរដ្ឋបានល្អប្រសើរ។

ទន្ទឹមនឹងនេះ លោកស្នងការក៏បានលើកឡើងពីបញ្ហាប្រឈមមួយចំនួនដែលនៅសេសសល់ និងបានដាក់ចេញនូវទិសដៅការងារបន្តសម្រាប់ត្រីមាសទី២ ឆ្នាំ២០២៥ ដោយផ្តោតលើការពង្រឹងគ្រប់គ្រងក្តាប់សភាពការណ៍សន្តិសុខក្នុងភូមិសាស្ត្រខេត្ត និងតាមព្រំដែនកម្ពុជាថៃ ត្រូវពង្រឹងការគ្រប់គ្រងលិខិតបទដ្ឋានគតិយុទ្ធនានា និង ទ្រព្យសម្បិត្តរដ្ឋឱ្យបានល្អ។ ការពង្រឹងការងារបង្ក្រាបបទល្មើសគ្រប់ប្រភេទពិសេសការបន្តចុះបង្ក្រាបក្មេងទំនើង ការជួញដូរគ្រឿងញៀន។បន្តផ្សព្វផ្សាយគោលនយោបាយភូមិឃុំសង្កាត់មានសុវត្ថិភា ពបង្កើនការអប់រំផ្សព្វផ្សាយច្បាប់ និងការយល់ដឹងអំពីសុវត្ថិភាពចរាចរណ៍។ ការបន្តកែលម្អការផ្តល់សេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព។ ការបន្តពង្រឹងកិច្ចសហប្រតិបត្តិការជាមួយអាជ្ញាធរពាក់ព័ន្ធ និងប្រជាពលរដ្ឋ។

ទន្ទឹមនឹងនេះ លោកឧត្តមសេនីយ៍ទោ សិទ្ធិ ឡោះក៏ បានជំរុញឱ្យកងកម្លាំងនគរបាលប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំត្រីមាសទី១ ឆ្នាំ២០២៥ និង ដាក់ចេញទិសដៅអនុវត្តការងារសម្រាប់ត្រីមាសបន្ទាប់ ដល់កងកម្លាំងនគរបាលក្រោមឱវាទ៕

ដោយ ឈុន សារ៉ាត