AKP កំពង់ស្ពឺ ថ្ងៃទី២៨ ខែកុម្ភៈ ឆ្នាំ២០២៥--មន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺ នារសៀលថ្ងៃទី២៨ ខែកុម្ភៈ ឆ្នាំ២០២៥នេះ បានរៀបចំពិធីប្រកាសចូលកាន់តំណែងមន្ត្រីរាជការ នៃមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺទាំង ២០ រូប  ក្រោមអធិបតីភាពលោកជំទាវ ហោ ម៉ានលីន រដ្ឋលេខាធិការ និង ឯកឧត្ដម កៅ ផល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្ដម យឹម សុខុម ប្រធានក្រុមប្រឹក្សាខេត្ត និង ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ដោយមានការអញ្ជើញចូលរួមពី ឯកឧត្ដម អភិបាលរងខេត្ត លោកប្រធានមន្ទីរអង្គភាពជុំវិញខេត្ត មន្ត្រីរាជការមន្ទីរប្រមាណ ២០០ រូប។

ជាកិច្ចចាប់ផ្ដើមប្រធានមន្ទីរកសិកម្ម លោក យឹម ណន បានអានរបាយការណ៍អំពីវឌ្ឍនភាពការងាររដ្ឋបាលបច្ចេកទេស ច្បាប់ និងបញ្ហាប្រឈមក្នុងរយ:ពេលកន្លងមក ជាពិសេសបានរំលេចឱ្យឃើញពីសមិទ្ធផលសំខាន់ៗដែលមន្ទីរសម្រេចបាន។

នាឱកាសនោះឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានមានចំណាប់អារម្មណ៍អំពីសមិទ្ធផលដ៏ធំធេងដែលមន្ទីរសម្រេចបាន និងវាយតម្លៃខ្ពស់ចំពោះកិច្ចខិតខំប្រឹងប្រែង លះបង់គ្រប់បែបយ៉ាងរបស់ថ្នាក់ដឹកនាំមន្ទីរ និងមន្ត្រីក្រោមឱវាទក្នុងស្មារតីទទួលខុសត្រូវអនុវត្តនូវរាល់គោលនយោបាយរបស់ក្រសួង ក៏ដូចជារបស់ខេត្តផងដែរ ដែលធ្វើឱ្យវិស័យកសិកម្មក្នុងខេត្តកំពង់ស្ពឺមានការវិវឌ្ឍន៍រីកចម្រើនគួរជាទីមោទន:នាពេលបច្ចុប្បន្ន។  ឯកឧត្តមបានធ្វើការណែនាំមន្ត្រីរាជការ នៃមន្ទីរកសិកម្មទាំង ២០ រូប ដែលទើបតែឡើងតំណែងថ្មី ឱ្យខិតខំថែរក្សាសមិទ្ធផលដែលសម្រេចបាននាពេលកន្លងមក និងត្រូវរួមសហការ សាមគ្គី ឯកភាពផ្ទៃក្នុងឱ្យបានល្អប្រសើរជាមួយមន្ទីរជុំវិញខេត្ត អាជ្ញាធរមូលដ្ឋាន ថ្នាក់ដឹកនាំ និងមន្រ្តីក្រោមឱវាទដើម្បីបន្តអនុវត្តគោលនយោបាយអភិវឌ្ឍវិស័យកសិកម្ម ក៏ដូចជាគោលនយោបាយអភិវឌ្ឍរបស់រាជរដ្ឋាភិបាលឱ្យកាន់តែរីកចម្រើនថែមទៀតសមស្របតាមនិន្នាការវិវឌ្ឍន៍របស់ប្រទេសជាតិ។

បន្ទាប់ពីតំណាងមន្រ្តីដែលត្រូវបានតែងតាំងតួនាទីថ្មីបានធ្វើការប្តេជ្ញាចិត្តរួចមក ក្នុងនាមក្រសួង និងខ្លួនលោកជំទាវផ្ទាល់ លោកជំទាវ ហោ ម៉ានលីន រដ្ឋលេខាធិការក្រសួងកសិកម្ម បានសម្តែងនូវការកោតសរសើរ និងវាយតម្លៃខ្ពស់ចំពោះសមិទ្ធផលដែលមន្ទីរសម្រេចបាន និងបានថ្លែងអំណរគុណឯកឧត្តមអភិបាលខេត្ត អាជ្ញាធរដែនដីគ្រប់លំដាប់ថ្នាក់ ដែលបានចូលរួមសហការ ឧបត្ថម្ភ និងគាំទ្រសព្វបែបយ៉ាងលើរាល់សកម្មភាពអភិវឌ្ឍវិស័យកសិកម្មនៅទូទាំងខេត្តឱ្យមានការរីកចម្រើនគួរឱ្យកត់សម្គាល់។
ឆ្លៀតក្នុងឱកាសនោះ លោកជំទាវរដ្ឋលេខាធិការបានធ្វើការសំណេះសំណាលជាមួយអង្គពិធីដោយផ្តោតសំខាន់ទៅលើស្ថានការណ៍ថ្មីៗរបស់ប្រទេសជាតិ និងសកលលោកទាំងសេដ្ឋកិច្ច និងនយោបាយ។ ដោយឡែក វិស័យកសិកម្ម លោកជំទាវបានធ្វើការបូកសរុបដោយសង្ខេបជូនអង្គពិធីជ្រាបអំពីការវិវឌ្ឍន៍រីកចម្រើន បញ្ហាប្រឈម និងយន្តការដោះស្រាយជាបន្តបន្ទាប់។ល។ ធ្វើយ៉ាងណាឈានទៅសម្រេចឱ្យបាននូវផែនការ និងគោលនយោបាយអភិវឌ្ឍវិស័យកសិកម្ម ដើម្បីរក្សាកំណើនសេដ្ឋកិច្ចជាតិប្រកបដោយចីរភាព និងនិរន្តរភាព និងឈានទៅសម្រេចចក្ខុវិស័យនាឆ្នាំ២០៥០។ 

លោកជំទាវបានបន្ថែមទៀតថា៖ ដើម្បីឈានទៅសម្រេចជោគជ័យតាមផែនការដែលបានគ្រោងទុក និងជាពិសេសយុទ្ធសាស្ត្របញ្ចកោណដំណាក់កាលទី១ គឺដើម្បីកំណើនការងារ សមធម៌ ប្រសិទ្ធភាព និងចីរភាព ដោយផ្តោតសំខាន់លើអភិក្រមទាំង៥គឺ  មនុស្ស ផ្លូវ ទឹក ភ្លើង និង បច្ចេកវិទ្យា និងគោលដៅយុទ្ធសាស្ត្រ ៥ រួមមាន៖ (១). ធានាឱ្យបានកំណើនសេដ្ឋកិច្ច (២). បង្កើតការងារឱ្យបានកាន់តែច្រើន (៣). សម្រេចឱ្យបាននូវគោលដៅកាត់បន្ថយភាពក្រីក្រ (៤). បន្តពង្រឹងសមត្ថភាពអភិបាលកិច្ច និងលើកកម្ពស់គុណភាពស្ថាប័ន (៥). ធានាឱ្យបាននូវចីរភាពនៃការអភិវឌ្ឍសង្គម-សេដ្ឋកិច្ច លោកជំទាវបានក្រើនរំឭកថ្នាក់ដឹកនាំមន្ទីរគ្រប់ជាន់ថ្នាក់ និងមន្ត្រីជំនាញត្រូវយកចិត្តទុកដាក់បង្កើនសមត្ថភាពគ្រប់គ្រង ចំណេះជំនាញ និងបទពិសោធន៍បន្ថែមទៀតផងដែរ៕
ដោយ៖ គង់ សិរីរ័ត្ន, ប្រភព៖ AKP-កំពង់ស្ពឺ