AKP ភ្នំពេញ ថ្ងៃទី២៨ ខែកុម្ភៈ ឆ្នាំ២០២៥–អ្នកនាំពាក្យអគ្គបញ្ជាការដ្ឋាន នៃកងយោធពលខេមរភូមិន្ទ បានបញ្ជាក់នៅរសៀលថ្ងៃទី២៨ ខែកុម្ភៈ ឆ្នាំ២០២៥ នេះថា ករណីនាយទាហានឈ្មោះ ម៉ី តារា នេះ ជារឿងចាស់ទេ ប៉ុន្តែសម រង្ស៊ី បានយកមកបង្ហោះជាថ្មី ដើម្បីបំភាន់មតិសាធារណជន។

ឯកឧត្តម ឧត្តមសេនីយ៍ទោ ថោង សូលីម៉ូ អ្នកនាំពាក្យអគ្គបញ្ជាការដ្ឋាន នៃកងយោធពលខេមរភូមិន្ទ បានឱ្យដឹងថា ករណីធ្លាប់បានបកស្រាយតាមបណ្ដាញសង្គមម្ដងរួចមកហើយ ក្នុងខ្លឹមសារដូចខាងក្រោម:
បុគ្គលឈ្មោះ មុី ដារ៉ា បានបន្លំស្លៀកពាក់ឯកសណ្ឋានជាកងទ័ព ធ្វើឱ្យប៉ះពាល់ដល់សន្តិសុខជាតិ និងសេចក្តីថ្លៃថ្នូររបស់កងយោធពលខេមរភូមិន្ទ គឺជាអំពើល្មើសច្បាប់ដ៏ធ្ងន់ធ្ងរបំផុត មិនអាចលើកលែងឱ្យបាន។ កន្លងមកបុគ្គលរូបនេះបានអំពាវនាវឱ្យយុវជនទៅចូលរួមធ្វើបាតុកម្មប្រឆាំងនឹងរាជរដ្ឋាភិបាលស្របច្បាប់ថែមទៀតផង។

យោធភូមិភាគទី៥ បានបញ្ជាក់បុគ្គលរូបនេះបានប្រព្រឹត្តបទល្មើសឆបោក, អនុវត្តខុសនឹងបទវិន័យទូទៅកងយោធពលខេមរភូមិន្ទជាច្រើនលើក ព្រមទាំងបានបោះបង់អង្គភាពហើយបានរត់គេចខ្លួនពីការអនុវត្តច្បាប់ ទៅជ្រកកោណនៅប្រទេសអូស្រ្តាលី ថែមទាំងបានចូលរួមជាមួយក្រុមឧទ្ទាមក្រៅច្បាប់ វាយប្រហារជាបន្តបន្ទាប់មកលើកងយោធពលខេមរភូមិន្ទ និងរាជរដ្ឋាភិបាលកម្ពុជា។

ក្នុងនាមខ្ញុំជាអ្នកនាំពាក្យអគ្គបញ្ជាការ ខ្ញុំសូមអំពាវនាវឱ្យយុវជន និងប្រជាពលរដ្ឋទាំងអស់ កុំជឿតាមការឃោសនាអូសទាញ និងញុះញង់របស់ក្រុមជ្រុលនិយមមួយក្តាប់តូច ដែលនៅក្រៅប្រទេស រហូតចូលរួមក្នុងចលនាខុសច្បាប់ណាមួយដែលធ្វើឱ្យប៉ះពាល់ដល់សន្តិសុខ ស្ថិរភាព និងភាពសុខសាន្តរបស់ប្រជាពលរដ្ឋ ព្រោះនេះជាបទល្មើសព្រហ្មទណ្ឌ៕
ដោយ៖ គង់ សិរីរ័ត្ន, ប្រភព៖ អង្គភាពអ្នកនាំពាក្យរាជរដ្ឋាភិបាល