AKP កំពង់ធំ ថ្ងៃទី២៨ ខែកុម្ភៈ ឆ្នាំ២០២៥-- លោក សាយ គឹមឡម ប្រធានគណបក្សប្រជាជនកម្ពុជាស្រុកស្ទោង បានមានប្រសាសន៍ថា អគារស្នាក់ការគណបក្សប្រជាជនកម្ពុជាថ្មីនឹងជួយឱ្យគណបក្សកាន់តែរីកចម្រើន និងឈ្នះគ្រប់សមរភូមិបោះឆ្នោត ក្នុងឱកាសដែលលោកអញ្ជើញជាតំណាងឯកឧត្តម ថោ ជេដ្ឋា ប្រធានក្រុមការងារចុះមូលដ្ឋានស្រុកស្ទោង ក្នុងពិធីក្រុងពលីបញ្ចុះបឋមសីលាបុកគ្រឹះសាងសង់ស្នាក់ការគណបក្សប្រជាជនកម្ពុជាស្រុកស្ទោង ខេត្តកំពង់ធំ ដែលមានទំហំ៣៤ម៉ែត្រគុណ៤៦,៥ម៉ែត្រ នាព្រឹកថ្ងៃទី២៨ ខែកុម្ភៈ ឆ្នាំ២០២៥។

លោក សាយ គឹមឡម បានមានប្រសាសន៍ថា ក្នុងនាមប្រធានគណបក្សស្រុក សូមថ្លែងអំណរគុណយ៉ាងជ្រាលជ្រៅចំពោះឯកឧត្តម ថោ ជេដ្ឋា ប្រធានក្រុមការងារចុះជួយមូលដ្ឋានស្រុកស្ទោង ដែលឯកឧត្តមតែងតែយកចិត្តទុកដាក់ខ្ពស់ និងជំរុញការងារកសាងស្នាក់ការគណបក្សប្រជាជនឱ្យបានគ្រប់ឃុំទាំងអស់នៅក្នុងស្រុកស្ទោង និងអាចប្រែក្លាយទីស្នាក់ការគណបក្សនេះឱ្យមានជាសកម្មភាពនយោបាយជាប់ជាប្រចាំ ជាមជ្ឈមណ្ឌលប្រមូលផ្ដុំសកម្មភាពនយោបាយរបស់បក្ស ព្រមទាំងផ្សារភ្ជាប់ជាមួយប្រជាជន និងសមាជិកគណបក្សឱ្យបានស្និទ្ធស្នាលបំផុតជាពិសេសសុំឱ្យប្រធានគណបក្សឃុំ ខិតខំប្រឹងប្រែងពង្រឹងការងារកសាងបក្សនិងការកសាងសមាជិកសមាជិកាបក្សបន្ថែមទៀត ដើម្បីគណបក្សប្រជាជន និងដើម្បីប្រជាជន ជាពិសេសទទួលបានជ័យជំនះគ្រប់សមរភូមិបោះឆ្នោត៕

ដោយ ស៊ុម វណ្ណា